E faaite au i te evanelia i te mau tamarii atoa a te Atua

Ua amu aʻenei outou i te hoê mea au roa e ua hinaaro outou i te faaite atu ? I te hoê taime ua moemoeahia te peropheta Lehi, te amu ra oia i te hoê hotu au roa. No toʻna au, ua faaî te reira « i toʻna varua i te oaoa rahi » (1 Nephi 8:12). Ua hinaaro aʻera Lehi ia tamata atoa toʻna utuafare i taua hotu au ra.

Te hotu i roto i te moemoea a Lehi e au ïa i te here o te Metua i te Ao ra. Ua hinaaro Lehi i toʻna utuafare ia ite i te here o te Metua i te Ao ra. Ua hinaaro oia e horoʻa i te evanelia ia ratou no te mea ua ite oia e, e faaoaoa te reira ia ratou.

Pinepine te mau tamarii ia riro ei mea maitai roa i roto i te faaiteraa i te evanelia ia vetahi ê.

Ua ite o Maria, e vaʻu matahiti, i te mau misionare i niʻa i te purumu no Ecuador. Ua ani atura oia ia raua e haapii anei raua ia’na i te evanelia. Ua haere mai ra na misionare i te fare o Maria no te haapii i toʻna utuafare. O Maria te matamua i roto i toʻna utuafare tei bapetizohia. Ua oaoa roa oia i te tomo-atoa-raa mai toʻna utuafare taatoa i te pae hopea i roto i te Ekalesia.

Ua oaoa roa o Eric, e iva matahiti, no niʻa i te faanahoraa a te Paraimere no te pureraa oroʻa, no reira, ua ani manihini oia i te mau taata na piha‘i iho i to ratou fare ia haere mai. E ua haere mai ratou.

Ua faaite teie na tamarii i te hoê mea taoʻa rahi i te taata ta ratou i here. Ia faaite anaʻe outou i te evanelia, e tupu to outou iteraa papû i te rahi. Mai ia Lehi, e ite outou i « te oaoa rahi ».

Aui : faahohoʻaraa na Mark Jarman ; atau, ia au i te ohuraa o te nira uati : faahohoʻaraa na Jim Madsen, Jared Beckstrand, Eric Barclay, e o Celeste Smith