Te mau mana‘o no te pureraa pô utuafare

I roto i teie veʻa te vai nei te mau parau papaʻi e te mau ohiparaa o te nehenehe e faaohipahia no te pureraa pô utuafare. Teie e piti mana‘o.

« Te riroraa ei misionare Ia Poro Haere i Ta’u nei Evanelia », api 46 : A feruri ia aparau i roto i te utuafare i na titauraa e pae o te mau misionare Ia Poro Haere i Ta’u nei Evanelia. I muri iho a tamata ia faaohipa i na parau tumu. E nehenehe ta outou e hiʻo amui vitiviti noa i te hoê tuhaa o te Ia Poro Haere i Ta’u nei Evanelia e e horoʻa i te taime i te tahi mau melo o te utuafare ia haapiipii i te tahi mau tuhaa haapiiraa o te mau haapiiraa misionare, e a faariro ai te tahi atu mau melo o te utuafare ia ratou ei mau hoa no te Ekalesia. E nehenehe ta outou e aparau i niʻa i te mau titauraa o te ohipa misionare e ia tuatapapa i te mau raveʻa no te faananea i te mau titauraa i tatarahia mai e Elder David A. Bednar.

« Ia puai, ia tino maitai, ia maramarama », api 52 : Ia oti outou i te taiʻo i te papaʻiraa a Elder Adrián Ochoa, a faanaho i te hoê ohipa haʻutiraa ia tiʻa i te mau melo o to outou utuafare ia rave amui i te ohipa faahaʻuti i te tino. E nehenehe ta outou e haʻuti i te hoê tuʻaro e aore râ, e haere e orihaere. A faaau i ta outou ohipa haʻutiraa i niʻa i te matahiti e i te aravihi o te mau melo o te utuafare (ei hiʻoraa, e nehenehe ta outou e ani i ta outou mau tamarii paari ia tauturu i te mau tamarii naʻinaʻi ia faaoti i te ohipa haʻutiraa). Ia oti ta outou ohipa haʻutiraa, a aparau e te utuafare taatoa i te mau maitai o te hoê oraraa e faahaʻuti tamau i te tino. E nehenehe atoa ta outou e faanaho i te mau raveʻa ia pee tamau noa te utuafre i te aʻoraa a te mau peropheta ora no niʻa i te atuaturaa i to tatou tino.

Na roto i to outou reo

Te vai nei te Liahona e te tahi atu mau materia a te Ekalesia na roto i te mau reo e rave rahi i ni‘a ia languages.lds.org.

Hohoʻa faahoho‘araa na Craig dimond