Hoê afata hohoʻa

Cindy Heggie, Alberta, Canada

E rave rahi matahiti i maʻiri aʻenei, te faaruʻe ra maua o ta’u tane i te pehu i niʻa i te faaruʻeraa pehu a te oire, ite atura vau i te hoê o te mau vahine rave ohipa i te raveraa i te hoê afata no te tuu i roto i te umu auahi. I taua iho taime ra, ua parari te afata, e ua purehu mai ra te tahi mau hohoʻa i rapae.

A hiʻo noa ai au i te reira, ua tupu mai ra te hoê manaʻo puai i roto ia’u ia haere e rave mai i taua afata hohoʻa ra. Ua ouʻa aʻera vau i rapae i te pereoo no te tauturu e ohi i te mau hohoʻa. Tera vahine e o vau, maua toopiti atoa ra i te manaʻoraa e, ua hape te faaruʻe-raa-hia taua mau hohoʻa ra, e ua taparu atura vau ia’na ia horoʻa mai i te reira no te tamata ia imi i te taata e hinaaro e rave i te reira.

A hiʻohiʻo ai au i roto i taua mau hohoʻa ra e rave rahi i roto i te afata, ua itehia mai ia’u hoê vehi rata na te hoê taata i Warburg, Alberta, Canada. I roto i te mau matahiti e rave rahi i muri iho, ua papaʻi au i te tahi mau rata i te mau taata hoê â paeraa, tera râ, aita hoê pahonoraa i tae mai.

I te taime a roaa ai ta matou Itenati, ua ite aʻera vau e, te vai ra hoê taiete aamu i Warburg. Ua ani au e, te vai ra anei te hoê taata e rave ra i te ohipa i reira o tei ite i te mau iʻoa tei itehia ia’u i muri i te mau hohoʻa.

Hoê avaʻe i muri iho ua farii au i te hoê niuniu na te hoê taata tei farereihia e te taiete aamu. Ua parau mai oia e, e tuahine toʻna e faaea ra e ere i te mea atea roa ia maua, e ua ani mai ra, e nehenehe anei i toʻna tuahine e hiʻo i taua mau hohoʻa ra. Na ô atura maua e, oia mau roa.

I te mahana i muri iho, ua haere mai ra o Floyd e o Beth Hawthorn, Feia Mo‘a i te Mau Mahana Hopea Nei, e hiʻo i taua mau hohoʻa ra. I to’u iritiraa i te afata, na ô mai ra te taeaʻe Hawthorn e, « Teie oia », ma te faatoro i niʻa i te hohoʻa i niʻa roa. E hohoʻa ïa no te papa ruau o te tuahine Hawthorn.

A rave ai raua i te tahi hoho‘a i muri i te tahi hohoʻa, ua faatia mai te taeaʻe e te tuahine Hawthorn i te mau aamu no niʻa i te mau taata i roto i te hohoʻa tataʻitahi. Aita i papû ia Hawthorn mâ e, e fetii anei raua e te taata i faaruʻe i teie mau hohoʻa, e aita roa raua e taa ra e, no te aha teie mau hohoʻa i faaruʻehia ai i niʻa i te faaruʻeraa pehu.

Ua papû roa ia’u e, ua tauturu mai te Metua i te Ao ra ia’u ia faahoʻi i te mau hohoʻa i te utuafare Hawthorn ra. Te faaite papû nei au e, te ohipa aamu utuafare, o te hoê ïa o te mau ohipa faufaa roa aʻe e tiʻa ia ravehia. Mai te mea e, ua hinaaro tatou ia rave i te ohipa, e tauturu mai te Fatu ia tatou ia rave i te reira.