E hoʻi anei o Matthew ?

Ua tapeʻahia te iʻoa

Te vai ra i roto i ta matou paroisa te hoê pŭpŭ feia apî tamaroa puai roa, tera râ, ua haere o Matthew na muri iho i te hoê pŭpŭ melo ore tei here i te pereoo uira e te mau taoʻa matini atoa. Te vahi fifi râ, no roto mai teie taureʻareʻa i te hoê utuafare aita i haafaufaa i te parau no te faaroo. Ua faati‘a na metua i te inu e te pupuhi avaava i roto i to ratou fare e aita i tiʻaturi e, e mea faufaa ia vai viivii ore noa i te pae morare.

Ua roaa ia Matthew te tiʻaraa teitei roa i roto i te ohipa Scout, tera râ, aita oia i tae i roto i te putuputuraa no te haamauruururaa no te mea ua faaea oia i te haapaʻo i te mau faatureraa o te ohipa scout. Ua haaputuputu vau i ta’na mau fetiʻa scout atoa e ua hamani i te hoê afata faaiteite. E ua vaiiho vau i te reira i te hoê vahi, ma te tiʻaturi e, i te hoê mahana, e faufaahia te reira no’na. I te 16 toʻna matahiti, te puhipuhi ra o Matthew i te avaava, te inu ra, e te rave ra i te raau taero. Ua faaruʻe oia i te haapiiraa e ua faaea i te hoê tamahine. E mea varavara roa matou i te ite faahou ia’na no te tahi tau matahiti te maoro.

Ua oto roa matou. Aita matou i ite e, e hoʻi anei oia i roto i toʻna utuafare e te faaroo, tera râ, ua faaoti aʻera matou ia pee i te hiʻoraa o Alama i roto i te parau no ta’na tamaiti haapaʻo ore. Ua tamau noa Alama i te here i ta’na tamaiti e ua pure ma te faaroo ia tiʻa ia’na « ia arataʻihia i te ite i te parau mau » (Mosia 27:14).

Ua pure tamau noa matou ia haere mai te Fatu i roto i te oraraa o Matthew, e ua rave matou i te mau raveʻa atoa no te faaite na roto i te parau e i te ohipa i to matou here ia’na. I toʻna hoʻiraa mai i te fare, aita matou i parau i te hoê parau o ta’na e nehenehe e faariro ei parau faaino e aore râ, ei parau haavâ. Ua faaite noa matou i to matou oaoa i te iteraa ia’na.

I te hoê mahana, ua haere mai Matthew i te fare ma te parau mai e, ua hinaaro oia e paraparau. Ua parau mai oia e, ua farerei oia i te hoê tamahine i roto i te hoê faaoaoaraa, e e uiraa ta’na no niʻa i te Ekalesia. Hou a tiʻa ai ia’na ia parau atu ia’na e, aita oia i ite faahou i te pahonoraa, ua haamata aʻera te mau parau i te matara mai na roto mai i toʻna vaha. E ua ite oia ia’na iho i te pahonoraa i ta’na mau uiraa ma te vitiviti. Ua parau o Matthew e, aita oia e haamanaʻo ra i te taime a haapii mai ai oia i te mau mea ta’na i parau ra, tera râ, ua ite oia e, e parau mau ta’na mau parau. Ua mana‘o oia e, no te aha pai oia e ora ra mai te reira te huru inaha hoʻi te tiʻaturi noa ra oia i te evanelia.

I muri aʻe e toru mahana i te feruri-maite-raa, ua faaoti aʻera oia ia faaruʻe i te huru oraraa ta’na e ora nei. Ua hoʻi mai oia i te fare no te ani i te tauturu no te haamata apî faahou.

Ua taniuniu o Matthew i te tahi taeaʻe fetii toʻna i te tahi atu tuhaa fenua tei upooti‘a atoa i taua huru fifi ra, e ua ani ia’na e nehenehe anei ta’na e faaea ia’na ra. Ua farii toʻna taeaʻe fetii, e ua haamata o Matthew i te haere i te pureraa na muri iho ia’na e ua farerei i te episekopo no te farii i te tauturu no te faanahoraa o te tatarahaparaa. Ua ite oia i te here e i te patururaa e ua itoito faahou mai i roto i te Ekalesia.

I muri aʻe, ua farerei oia i te hoê tamahine maitai e te au. Ua here raua e ua faaipoipo i roto i te hiero.

I te fanauraahia mai ta raua tamarii matamua, ua haere mai au e farerei ma te afaʻi mai i te afata faaiteite ta’u i hamani no ta’na mau fetiʻa scout. Ua oaoa roa oia e ua faatarere i te reira i te hoê vahi ite-maitai-hia i roto i toʻna fare.

Aita te melahi i fâ mai i ta maua tamaiti, mai tei tupu i niʻa ia Alama tamaiti. Tera râ, mai te hoê semeio ra te huru o te hoʻiraa mai Matthew i roto i te parau mau.