Te ora maitai o te tino e o te feruriraa

No te tahi feia apî, e nehenehe te oreraa e faaohipa i te mau parau tumu o te ora maitai o te tino e riro mai ei haafifiraa ia ratou ia roaa te hoa e ia faatupu i te tiʻaturiraa ia ratou iho. Hau atu i te reira, e mea faufaa te parau no te ora maitai o te tino e o te feruriraa, tera râ, aita te reira na tuhaa e haapaʻo-maitai-hia ra i roto i te ohipa faaineineraa no te tavini i te hoê misioni. I roto i na api 52–53 o teie veʻa, te parau nei Elder Adrián Ochoa no te Hitu Ahuru e, mai te mea e, e aupuru tatou i to tatou tino, e nehenehe i te reira e paruru i te ora maitai o te tino e o te feruriraa. Te faahaamanaʻo mai nei oia ia tatou ia faahaʻuti i to tatou tino e ia haapaʻo i te parau paari (hiʻo PH&PF 89) e maitai ïa to tatou ea e e rahi atu to tatou oaoa. Mai te mea e, e tauturu outou i ta outou mau tamarii ia haapii e ia faaohipa i te mau parau tumu o te ora maitai o te tino e o te feruriraa, e tiʻa ïa ia ratou ia faarahi i to ratou tiʻaturiraa ia ratou iho e ia faaineine no te ohipa taviniraa a muri aʻe.

Mai ta Elder Ochoa e parau nei : « Ia atuatu outou i to outou tino, e haamaitai atoa ïa te reira i to outou feruriraa, e e tauturu ia outou ia haamanaʻo e, e tamarii outou na te Atua, e e nehenehe e roaa te tiʻaturiraa e te oaoa. Ua nati-hoê-hia to tatou pae feruriraa, pae tino e te pae varua ».

Te mau manaʻo tauturu no te haapii i te feia apî

A taiʻo amui i te papaʻiraa a Elder Ochoa e a faanaho i te hoê faanahoraa ohipa faaetaetaraa tino na te utuafare ma te haapapû maitai i te mau fâ i te pae o te ea.
A taiʻo outou e ta outou mau tamarii taure‘are‘a i te tuhaa no niʻa i te ora maitai o te tino e o te feruriraa i roto i te No te Puai o te Feia Apî (te mau api 25–27). A aparau no niʻa i te auraa o te parau ra, te ora maitai i te pae o te feruriraa.
A himene amui « Noa’tu te peʻapeʻa » (Te mau himene, no. 60) e a aparau eaha ta te ti‘a-faahou-raa e haapii mai nei ia tatou no niʻa i te faufaa o to tatou tino tahuti nei.
A tuatapapa i te mau irava i tapurahia i roto i teie papaʻiraa e a aparau i te mea ta te reira mau irava e haapii mai nei no niʻa i te ora maitai o te tino e o te feruriraa.

Te mau manaʻo tauturu no te haapii i te mau tamarii

A faaite i ta outou tamarii i te hoê hohoʻa o te hiero. A aparau i te auraa o te mau parau a te aposetolo Paulo a haapii ai oia e, « e hiero to [tatou] tino no te Varua Maitai » (1 Korinetia 6:19) e nahea teie ite e nehenehe ai e tauturu ia tatou ia atuatu i to tatou tino e to tatou feruriraa.
A hamani i te hoê tapura no te mau ohipa faaoaoaraa maitai ta ta outou tamarii e hinaaro e rave e te utuafare. I muri iho a hamani i te hoê faanahonahoraa no te faariro i te reira mau faaoaoaraa ei tuhaa no te oraraa utuafare.
A aparau i te mau raveʻa no te haroʻaroʻa e no te arai i te mau manaʻo o te aau, tae roa’tu i te riri e aore râ, te oto. A himene « Pour montrer ta joie » (Chants pour les enfants, 125), « Jésus-Christ est mon modèle » (Chants pour les enfants, 40), e aore râ, te tahi atu himene no niʻa i te mau manaʻo o te aau e te raveraa i te mau maʻitiraa maitai.

Faahohoʻaraa na Taia Morley