Te feia apî e te mau fafauraa o te hiero
Na roto i te tuuraahia te matahiti misionare rave tamau i raro, e rave rahi ahuru atu â tauatini feia apî e rave nei i te mau fafauraa o te hiero i teie nei.
Ei feia rave ohipa no te hiero, ua farii matou i te haamaitairaa ia farerei i te feia paari apî e haere mai nei i te hiero no te farii i to ratou iho oroʻa hiero. Teie ta matou i ite, ua tauturu maitai te hoê haapiipiiraa faaineineraa no te hiero ia ratou, tera râ, e mea faufaa atu te faaûruraa a te mau metua e te feia faatere maitai no te tauturu ia ratou ia faaineine no te rave i te mau fafauraa o te hiero. Tatou te mau metua, titauhia ia tatou ia tauturu i te feia apî eiaha i te faaineine-noa-raa no te ohipa misionare rave tamau o te hope i roto i te tahi tau avaʻe noa, e faaineine atoa râ no te rave e no te haapaʻo i te mau fafauraa o te hiero o te vai e a tau a hiti noa’tu. E nehenehe i te taahiraa matamua e haamata i te tamariiriiraa.
Faaineine i te mau tamarii
E nehenehe ta te mau metua e faaite i ta ratou mau tamarii i te faufaa o te hiero na roto i te haereraa e haamori i roto i te hiero e na roto i te faaiteraa i to ratou iteraa papû no niʻa i te ohipa o te hiero. Noa’tu e, tei roto outou i te mau fenua eita e nehenehe e haere pinepine i te hiero, e nehenehe ta te mau metua e faatupu i roto i ta ratou mau tamarii i te hinaaro ia haere i te hiero.
Ua haapii mai te peresideni Howard W. Hunter (1907–95) i te mau metua e : « E faaite tatou i ta tatou mau tamarii i te mau manaʻo pae varua tei roaa ia tatou i roto i te hiero. E e haapii maite atu tatou ia ratou e ma te au i te mau mea o ta tatou e nehenehe e parau no niʻa i te mau opuaraa o te fare o te Fatu ».1 E tiʻa i ta tatou mau tamarii ia ite e, te hiero, e vahi ïa i reira tatou e farii ai i te mau pahonoraa i ta tatou mau pure e i reira tatou e ite ai i te here o te Atua.
E nehenehe atoa i te mau metua e haapii i ta ratou mau tamarii ia tiaʻi e ia ora ma te parau-tiʻa no te hoê parau faati‘a tei ta‘oti‘ahia, o ta ratou ïa e nehenehe e farii mai te mea ua tiʻamâ ia taeʻahia to ratou matahiti i te 12. Ia tae ana‘e te taime no teie mau feia apî no te tomo i roto i te hiero, e ite tatou i to ratou oaoa e te haapeu ia faaite i te reira parau faati‘a i te hiero.
Faaineine i te Feia apî
E nehenehe i te mau metua e tauturu i ta ratou mau tamarii ia rave i te ohipa maʻimiraa i te aamu utuafare ia tiʻa hoʻi ia ratou ia hopoi i te mau iʻoa o te utuafare i te hiero ia taeʻahia to ratou matahiti i te 12. I te feia apî e rave nei i te reira, ua fafau mai Elder David A. Bednar no te Pŭpŭ no te Tino Ahuru Ma Piti Aposetolo e : « E tupu rahi to outou here e to outou mauruuru no to outou tupuna. E riro to outou iteraa papû e te faafariuraa i te Faaora ei mea hohonu e te tamau noa. E te fafau nei au e e paruruhia outou i mua i te faahemaraa onoono a te enemi ».2
Ua ite tatou e rave rahi hiʻoraa o teie fafauraa i te tupuraa. Aita i maoro aʻenei ua parau mai te hoê vahine apî ia matou e, i muri aʻe i toʻna maʻimiraa i te iʻoa o toʻna mama ruau, ua haere mai oia i te hiero no te rave i toʻna mau oroʻa. Ua parau oia e, i te taime a bapetizohia ai oia no toʻna mama ruau, ua puta mai te hoê iteraa papû i roto ia’na e, e haamauruuru mai oia ia’na i roto i te oraraa a muri aʻe. Na teie mau huru iteraa e haapuai i te iteraa papû e e faatupu i te hinaaro ia rave i te tahi atu â mau oroʻa i te hiero.
E rave rahi feia apî e farerei nei i te mau faahemaraa ia ahu i te ahu tano ore. Ia oomo anaʻe te mau metua e te feia faatere i te mau ahu nehenehe e te au maitai o te nehenehe e tapoʻi i te ahu hiero, e ite ïa te feia apî e, e nehenehe atoa ta ratou e na reira. E tiʻa i te feia apî ia ite e, na te huru o ta ratou ahuraa e te huru no ta ratou raveraa i to ratou tino e faaite mai i te huru o to ratou tiʻaraa pĭpĭ.
E nehenehe i te mau metua e tauturu i te feia apî ia faaineine no te tomo i roto i te hiero na roto i te tautururaa ia ratou ia maramarama i te mau fafauraa ta ratou e rave i reira. I roto i te mau fafauraa o te hiero te vai ra te mau euheraa ia « haapaʻo i te ture no te peu tiʻa e te viivii ore, ia riro ei taata aroha, horoʻa i te taime, te huru farii e te mâ ; ia horoʻa i te tareni e te mau raveʻa no te haaparare i te parau mau e no te faati‘a i te [utuafare taata nei] ; ia haapaʻo tamau noa i te parau mau ; e ia imi i te mau raveʻa atoa ia tauturu i te faaineineraa rahi ia ineine te fenua no te farii i toʻna Arii—te Fatu o Iesu Mesia ».3 E nehenehe i te mau metua e faaite papû e, e farii te feia apî i to ratou iho mau haamaitairaa puai i roto i to ratou oraraa mai te mea e, e haapaʻo ratou i teie mau fafauraa, e e riro mai teie mau fafauraa ei mau mea faufaa roa no te feia apî na roto i te tautururaa a te mau metua ia ite ratou e, e tupu te mau haamaitairaa e te mau fafauraa na roto i te Taraehara a Iesu Mesia.
Ua rau te mau raveʻa e nehenehe ta tatou e tauturu i te faaineineraa i ta tatou mau tamarii e i te feia apî ia farii i te mau haamaitairaa o te hiero. Rahi atu to ratou ineine, rahi atoa’tu te hau e roaa ia ratou e te Varua e fariihia, e na roto i te reira, e roaa ai ia ratou te mau iteraa pae varua rarahi, a farii ai ratou i to ratou oroʻa hiero. Na roto i te hoê iteraa maitai no ni‘a i te hiero e fafau rahi ai ratou ia ratou iho ei pĭpĭ na te Mesia e ei mau misionare maitai aʻe—ma te manaʻo puai ia tauturu i te feia ta ratou e haapii ia faaineine no te farii i to ratou iho mau oroʻa moʻa no te hiero.
Faahohoʻaraa na Steve Kropp