Parau poroʻi na te mau tuahine hahaere
Te misioni hanahana a Iesu Mesia : E Hamani
A taiʻo i teie haapiiraa na roto i te pure, e a imi eaha te mea ta outou e faaite i te mau tuahine ta outou e hahaere atu. Nahea te haroaroaraa i te oraraa e te misioni a te Faaora i te faarahi i to outou faaroo Iaʻna e i te haamaitai i te feia ta outou e tiaʻi nei ? No te mau haamaramaramaraa hau atu, a haere i niʻa ia reliefsociety.lds.org.
Te Faaroo, Te Utuafare, Te Totauturu
« Ua hamani Iesu Mesia i te mau raʻi e te fenua » (3 Nephi 9:15). Ua rave Oia i te reira na roto i te mana o te autahuʻaraa, i raro aʻe i te arataʻiraa a to tatou Metua i te Ao ra (hiʻo Mose 1:33).
« E ti‘a ia tatou ia mauruuru i te mea e, ua hamani mai te hoê Hamani paari i te hoê ao e ua tuu ia tatou i ô nei », te na reira ra te Peresideni Thomas S. Monson, « … [ia] ite tatou i te taime tamataraa, te hoê rave‘a no te haamaitai ia tatou iho ia ti‘a ia tatou ia farii i te mau mea atoa ta te Atua i faaineine no tatou ».1 Ia faaohipa anaʻe tatou i to tatou tiʻamâraa no te haapaʻo i te mau faaueraa a te Atua e no te tatarahapa, e riro mai tatou ei mea tiʻamâ no te hoʻi e ora i pihaʻi iho Ia’na.
No niʻa i te poieteraa, ua parau te peresideni Dieter F. Uchtdorf, tauturu piti i roto i te Peresideniraa Matamua :
« O tatou te tumu i hamani ai Oia i te ao nui !…
« Teie te hoê haataupupuraa mana‘o na te taata : ia faaauhia i te Atua, e mea faufaa ore te taata ; noa’tu râ, e mea faufaa roa tatou no te Atua ».2 No te iteraa tatou e, ua hamani Iesu Mesia i te fenua nei no tatou no te mea o tatou te mea faufaa rahi no te Metua i te Ao ra, e nehenehe i te reira e faarahi i to tatou here no Raua.
No roto mai i te mau papaʻiraa moʻa
Ioane 1:3 ; Hebera 1:1–2 ; Mosia 3:8 ; Mose 1:30–33, 35–39 ; Aberahama 3:24–25
No roto mai i to tatou aamu
Ua hamanihia tatou ia au i te hohoʻa o te Atua (hiʻo Mose 2:26–27),e e faito puai hanahana to tatou. Ua aʻo te peropheta Iosepha Semita i te mau tuahine i roto i te Sotaiete Tauturu ia « A Ora mai te au i to [ratou] haamaitairaa ».3 Mai taua faaitoitoraa ei niu, ua haapiihia ïa te mau tuahine i roto i Te Ekalesia a Iesu Mesia i te Feia Mo‘a i te Mau Mahana Hopea Nei ia ora mai te au i to ratou faito puai hanahana na roto i te faatupuraa i te mau opuaraa a te Atua no ratou. « Ia noaa ana‘e ia ratou te iteraa e o vai mau râ ratou—e mau tamarii tamahine na te Atua, e te hoê aravihi i roto ia ratou no te here e te aupuru—ua rae‘ahia ïa ia ratou to ratou hopearaa ei mau vahine mo‘a ».4
« Ua tuuhia outou i teie nei i roto i te hoê ti‘araa i reira e nehenehe ai ia outou ia rave mai te au i taua mau hinaaro ra ta te Atua i tanu i roto i to outou mau ouma », te na reira ra te peropheta Iosepha Semita. « Mai te mea e ora outou mai te au i teie mau parau haapiiraa auê ïa te faahiahia e te hanahana e !—mai te mea e ora outou mai te au i to outou haamaitairaa, eita ïa te mau melahi e tape‘ahia ia riro ei mau hoa ohipa no outou ».5
Hohoʻa no Te Mesia na David Nystul ; te hoho‘a na muri na Hemera/Thinkstock