A ataata noa e a parau e, aita
Te ora nei te taata papaʻi i Metro Manila, Philipino.
Ua patoʻi au i te mau titauraa ia inu, tera râ, i teie nei, te horoʻa mai nei te peresideni o te taiete i te hoê hapaina uaina na’u.
Faahohoʻaraa na Sudi McCollan
I te hoê puʻe tau mahanahana, ua haere atu vau i roto i te hoê tau haapiipiiraa i niʻa i te hoê motu no Bicol, i te fenua Philipino. E mea nehenehe te hiʻoraa o te moana, e tia‘i no vau i te reira i te mau poʻipoʻi atoa.
I te pô râ, e mătaʻu vau. Te reira te taime te taata i roto i te puhaparaa e haamata ai i te inu e i te arearea. E mea pinepine te ani-manihini-raa ia haere i taua mau arearearaa ra, e ua titauhia ia matou ia haere i te reira mau faaarearearaa, i te mea e, e ere i te mea faatura ia oe e haere i te reira.
Te arearearaa matamua, e arearearaa ïa no te farii i te mau piahi apî. Ua taiâ vau ia haere atu, no te mea ua papû maitai ia’u e, e horoʻa mai ratou i te mau inu na’u, e aita vau i papû e, nahea ia pato‘i i te reira. Ua niuniu vau i te hoê hoa to’u i roto i ta’u paroisa i to’u fenua, e ua horoʻa mai oia i te tahi mau haapiiraa maitai roa o tei faaitoito ia’u.
I te haamataraa te arearearaa, ua horoʻa mai ratou ia matou i te mau inu, auaʻe râ, aita ratou i faahepo ia matou ia inu. Ua farii to’u mau hoa i ta’u pato‘iraa eiaha e inu, no reira, e mea huru ohie te pato‘iraa i te inu i muri iho—e tae roa’tu i te hoê pô. I roto i te hoê o te mau arearearaa, ua haere mai te peresideni o te taiete. Te tape‘a ra oia i te hoê mohina lambanog (e uaina no te reira fenua tei hamanihia i te pape haari). Aita i maoro toʻna taeraa mai, ua ite atura vau ia’na i te maniiraa i te uaina na te tahi pae. I muri iho na ô aʻera oia e, « E tiʻa ia outou ia haapii e nahea ia inu » e ua horoʻa’tura i te hapaina i te hoê piahi ra. Ua inu oioi aʻera oia i te reira.
Ua haamata aʻera to’u mafatu i te tupaʻipaʻi puai. Faatata to’u taime. Ua muhumuhu mărû noa vau ia’u iho e, « Eita vau e inu. Eita vau e inu ». E ua ite atura vau i te peresideni i te tororaa mai i te hapaina ia’u. Aita vau i ite e, eaha te ohipa e rave. Te hiʻo noa mai ra to’u mau hoa piahi ia’u, ma te tiaʻi ia ite e, eaha ta’u ohipa e rave. Ua ataata atu vau i niʻa i te peresideni e parau atura ma te haehaa e, « Eiaha oe i inoino, eita vau e inu ».
Ua ite au e, ua inoino oia. Ua ui mai ra oia e, no te aha aita vau e inu. Na ô atura vau e, « E momoni au ».
Na ô mai ra oia e, « Aitâ vau i faaroo aʻenei i te parau no taua haapaʻoraa ra. Mai te huru ra e, te tahi huru maa te reira ». Ua ata te mau taata atoa.
Ua ataata atoa vau, eiaha no ta’na parau haʻuti, no te mea râ e, ua rave au i te ohipa tiʻa.
Aita roa hoê taata i horoʻa faahou mai i te inu na’u. Tera râ, ua vai noa te faaôôraa, na roto roa atoa mai i to’u iho mau hoa. Ua parau roa mai te tahi e, te haavare ra vau, e e mea fifi ia feruri e, aita te mau melo o te Ekalesia e inu. I taua taime ra to’u iteraa i te teimaha e fariihia e te mau melo o te Ekalesia.
I roto i taua taime ra a parahi ai au i niʻa i taua fenua ra, e rave rahi haapiiraa tei roaa ia’u, eiaha no te ite pae tino noa, no te pae varua atoa râ. Ua ite aʻera vau e, eita te tahitohitoraa e faaea, tera râ, e tamau noa te Varua o te Fatu i te arataʻi ia outou no te rave i te ohipa tiʻa.