Pōpoaki ʻa e Kau Palesitenisī ʻUluakí
Fāmilí mo e Kaungāmeʻá ʻo Taʻengata
Neongo pe ko e fē feituʻu ʻokú ke nofo aí, ʻoku ʻi ai maʻu pē hao kaungāmeʻa ʻoku nau fekumi ki he fiefia lahi ange kuó ke maʻu ʻi hono moʻui ʻaki ʻo e ongoongolelei kuo toe fakafoki mai ʻo Sīsū Kalaisí. Mahalo he ʻikai ke nau maʻu ha lea feʻunga ke fakamatalaʻi ʻaki e fiefia ko iá, ka te nau lava ʻo ʻiloʻi ia heʻenau mamata ki ai ʻi hoʻo moʻuí. Te nau vēkeveke ke ʻilo ki he tupuʻanga ʻo e fiefia ko iá, tautautefito ki he taimi ʻoku nau mamata ai ʻokú ke fehangahangai mo e faingataʻá ʻo hangē pē ko kinautolú.
Kuó ke ongoʻi ʻa e fiefiá ʻi hoʻo tauhi e ngaahi fekau ʻa e ʻOtuá. Ko e fua ia kuo talaʻofa mai ʻo hono moʻui ʻaki ʻo e ongoongoleleí (vakai, Mosaia 2:41). ʻOku ʻikai fai fakamamata pē hoʻo talangofua faivelenga ki he ngaahi fekau ʻa e ʻEikí, ka ko e niʻihi ko ia ʻoku nau mamata atu ki hoʻo fiefiá, ʻoku teuteuʻi kinautolu ʻe he ʻEikí ke nau fanongo ki he ongoongo fakafiefia ʻo e ongoongolelei kuo Toe Fakafoki Maí.
Kuo hanga ʻe he ngaahi tāpuaki kuo ʻoatú maʻaú ʻo kamataʻi ha ngaahi tufakanga mo e faingamālie fakaʻofoʻofa maʻau. ʻI hoʻo hoko ko ha ākonga ʻo e fuakava ʻa Sīsū Kalaisí, ʻokú ke haʻisia ai ke ʻoatu ki he niʻihi kehé ha faingamālie ke nau maʻu ha fiefia ʻoku lahi angé, tautautefito ki ho kaungāmeʻá mo e kau mēmipa ho fāmilí.
Naʻe ʻafioʻi ʻe he ʻEikí ho faingamālié peá Ne fakamatalaʻi ho tufakangá ʻi he fekau ko ʻení: “Pea ʻoku taau mo e tangata kotoa pē kuo fai ki ai ʻa e fakatokangá ke ne fakatokanga ki hono kaungāʻapí foki” (T&F 88:81).
ʻOku ʻai ʻe he ʻEikí ke faingofua ange ʻa e talangofua ki he fekau ko iá, ʻi he liliu ho lotó peá ke tali mo moʻui ʻaki ʻa e ongoongolelei ʻo Sīsū Kalaisí. Ko hono olá, ko e tupulaki hoʻo ʻofa ki he niʻihi kehé, ʻo tatau pē mo hoʻo fakaʻamu ke nau aʻusia ʻa e fiefia tatau kuó ke maʻú.
Ko ha sīpinga ʻe taha ʻo e liliu ko iá, ko e anga ko ia hoʻo tali loto fiemālie ʻa e faingamālie ke tokoni ʻi he ngāue fakafaifekau ʻa e ʻEikí. He ʻikai fuoloa kuo ʻiloʻi ʻe he kau faifekau taimi kakató ʻe tali loto fiemālie ʻe he taha ului moʻoní ha kole atu ke ʻomi ha taha ke akoʻi. ʻOku fakaʻamu e tokotaha uluí ke vahevahe ʻe hono kaungāmeʻá mo e fāmilí ʻenau fiefiá.
ʻI he taimi ʻoku kole ai ʻe he taki faifekau fakauōtí pe kau faifekaú ha hingoa ʻo ha niʻihi ke akoʻi, ko ha fakahīkihiki moʻoni ia kiate koe. ʻOku nau ʻiloʻi kuo mātā ʻe he ngaahi kaungāmeʻá hoʻo fiefiá pea kuo mateuteu ʻa e ngaahi kaungāmeʻa ko iá ke fanongo pea nau fili ke tali ʻa e ongoongoleleí. Pea ʻoku nau falala ko koe ʻa e kaungāmeʻa te nau fie maʻu ʻi heʻenau omi ki he puleʻangá.
ʻOua naʻá ke manavasiʻi ʻe mole ho kaungāmeʻá ʻi haʻo fakaafeʻi ʻa e kau faifekaú ke feʻiloaki mo kinautolu. ʻOku ʻi ai haku kaungāmeʻa kuo nau fakasītuʻaʻi e kau faifekaú ka kuo nau fakamālō mai kiate au he ngaahi taʻu lahi ʻi hono foaki ange ha meʻa naʻa nau ʻilo naʻe fuʻu mahuʻinga kiate au. Te ke lava ʻo fakakaungāmeʻa ʻo lauikuonga ʻaki haʻo foaki ʻa e ongoongoleleí, ʻa ia ʻoku nau sio kuó ne ʻomi ha fiefia kiate koe. ʻOua naʻa teitei mole ha faingamālie ke fakaafeʻi ai ha kaungāmeʻa pea tautautefito ki ha mēmipa ʻo e fāmilí ke fili ke muimui ʻi he palani lahi ʻo e fiefiá.
ʻOku ʻikai ha faingamālie maʻongoʻonga ange ke fai ai e fakaafe ko iá ka ʻi he ngaahi temipale ʻo e Siasí. ʻE lava ai ʻe he ʻEikí ke foaki e ngaahi ouau ʻo e fakamoʻuí ki heʻetau ngaahi kui naʻe ʻikai ke nau lava ʻo maʻu kinautolu ʻi he moʻuí. ʻOku nau vakai mai kiate kimoutolu ʻi he ʻofa mo e ʻamanaki lelei. Kuo ʻosi talaʻofa ʻa e ʻEikí te nau maʻu ʻa e faingamālie ke hū mai ki Hono puleʻangá (vakai, T&F 137:7–8), pea kuó Ne ʻosi tokoniʻi kimoutolu ke mou ʻofa kiate kinautolu.
Kuo ʻosi ongoʻi ʻe hamou tokolahi ha fiefia ʻi hono foaki ʻo e ngaaahi ouau ʻo e temipalé ki he niʻihi kehé, ʻo hangē pē ko ia ʻoku mou fai ʻi hoʻomou ʻoange e hingoa ʻo e kakaí ki he kau faifekaú ke nau talanoá. Kuo mou ʻosi ongoʻi ha fiefia lahi iange ʻi hono fakahoko ʻo e ngaahi ouaú maʻa hoʻomou ngaahi kuí. Naʻe fakahā ki he Palōfita ko Siosefa Sāmitá ʻoku toki malava pē ke maʻu ʻetau fiefia taʻengatá kapau te tau foaki e founga ki he tāpuaki ko iá ki heʻetau ngaahi kuí ʻo fou ʻi he ngaahi ouau fakafofonga ʻo e temipalé (vakai, T&F 128:18).
ʻOku fakatafoki hotau lotó ʻe he taimi ʻo e Kilisimasí ki he Fakamoʻuí pea mo e fiefia kuo ʻomi ʻe Heʻene ongoongoleleí kiate kitautolú. ʻOku tau fakahaaʻi lelei taha ʻetau houngaʻia ʻiate Iá ʻi heʻetau foaki ʻa e fiefia ko iá ki ha niʻihi kehe. ʻOku liliu ʻa e houngaʻiá ko e fiefia ʻi heʻetau ʻoange e ngaahi hingoá ki he kau faifekaú pea mo ʻetau ʻave e hingoa ʻo ʻetau ngaahi kuí ki he temipalé. ʻE lava ʻe he fakamoʻoni ʻo ʻetau loto houngaʻiá ʻo fakatupu ha ngaahi kaungāmeʻa mo ha ngaahi fāmili ʻe tuʻuloa ʻo taʻengatá.
Ko e Faiako mei he Pōpoaki ko ʻEní
ʻOku fakamatalaʻi ʻe Palesiteni ʻAealingi te tau lava ʻo fakahaaʻi ʻetau houngaʻia ʻi he Fakamoʻuí ʻaki ʻetau vahevahe ʻa e ongoongoleleí mo e niʻihi kehé. Te ke lava ʻo aleaʻi mo kinautolu ʻokú ke akoʻí e anga hono tāpuekina ʻenau moʻuí ʻe he meʻaʻofa ʻo e ongoongoleleí. Fakakaukau ke ke fakaafeʻi kinautolu ke nau feinga ke ʻilo ʻi he faʻa lotu ʻa kinautolu ʻoku nau fie vahevahe ki ai e meʻaʻofa ʻo e ongoongoleleí mo e founga te nau ala fakahoko ai iá.