N Ai aron Raoi Koroboki aika Tabu!
E maeka te tia koro karaki i Utah, USA.
Ti taku bwa e nakoraoi te nakonako, ni karokoa ae ti noora te mwaneka n te kawai.
“N na kabeebetei naba taian uota ake a katokaki i aon angami” (Motiaea 24:14).
Tenaan tebwi n ririki a boni wanawana. Ti tangiria ni kan karaoi bwai i bon iroura.
E ak toki n tuangai tamau bwa N na kabootaui kanoan koroboki aika tabu nakon maiu. Kabootaua nanona bwa ko na kataia ni kabongana are ko reiakinaki iai man koroboki aika tabu inanon maium. Ngaia are, ngkana ti wareware ni kabane n aron te utu, n tabetai I mangamangara te bwai teuana i mwain are e kamatata nakoira tamara. N aron, “I ataia, Tamau, ti bon riai n aki mamatam ao n tataro, n aron are e taekinaki ni koroboki aika tabu.”
E moangare ibukina I aki toki ni karekea te rongorongo ae eti.
Ma n te tai teuana, I kunea bwa koroboki aika tabu a kona n ti te arona ma maiu! E riki aei ni kaean ara botaki n utu are e boo n te tabo ni kaembwa ike ti uoti baika ti kainnanoi inanon ara baeki.
I uouota oin au baeki baeki ae bubura ma au bwai ni matu, ao I aki ngurengure. I mwin te tai anne, e kantaningaki bwa ti na rianna n te raroa ae aua te maire (6.5 kiromita) nakon te nei n ran. I kona n roko iai, bon akea te kaangaanga.
E aki rangin kaangaanga te nakonako, ma I kukurei n tiku ni motirawa i mwin uoua te maire (3 kiromita). Ngkanne, ti a noora te moan kanikina ni kawai are e mena i moara. E taekinna bwa te nei e teimatoa naba n onoua te maire (9.5 kiromita) raroana. E aki riai bwa e na tuangai tamau ae te kawai e taboro riki raroana n aron are ti iangoia. E a kaman reke irou anne. E bon riai ni kauringira bwa ti na karaurau n nima nimara te ran bwa e aonga n aki kai waekoa ni bane.
E rangin kakawaki ana taeka n reirei tamau ma e matoatoa irakina. E rangin kabuebue riringan te tawanou anne, ao e kuri kaangaanga reken ara tabo ni katantan inanon kawaira. E tara n ae kanga ti nang aki kona n roko n te nei.
Tenan ikawai a mena ibuki ma ataei aika uarereke, ao ai tariu aika ikawai a rimoa. I tiku ma ai tariu ake teniman aika bon rorou, ao tia karina naba ni mena i marenaia.
Ngke ti aikoa kona ni manga nooria riki ake i moara ke ake i bukira, a moanna n nako nanora. A moanna n tinebu ara baeki baeki, ao a kani bane kanoan ara bwatoro n ran. Raroara riki ae ti na nako iai?
N te kabane, ti a rangin raraoma ao ni kua ao ti a baireia bwa ti na tei ao n tataro.
I mwin ara tataro, ti tabeki ara baeki baeki ao ni karaurau ni waaki n nakonako n iranako te kawai.
Teutana te tai i mwina ti a ongo tangin waen te aoti i aon te kawai. Ti tataninga ao ti a noora te mwaane i aon ana aoti ae biri nakoira.
E tei ao e anganira nimara te ran. E kamatata bwa ai tarira ake a ikawai a kawaekoa nakon te nei ma te bwai n kanoa ran bwa a na itiran ao n uotia nakoira. E ongo kainnanora te mwaane anne ibukin te ran ao e kukurei ni buokira. “Iai mairoumi ae kainnanoa buokana n ana baeki baeki?” e titiraki.
I taraiia ai tariu, ao a moangare nakoiu. Ti namakina te nakoraoi!
“Ko riai ni waakinako ao ni buokia ake temwangina,” ti taetae nakon te mwaane arei. “A nakoraoi arora.”
Ao e boni koaua! Nikiran kawaira nakon te nei kanga ai aron ae a tabekaki ara baeki baeki irouia anera ao ni butuira nako. Ngke I tuangia au karo taekan aei i mwina, e moangare Tamau ma te kukurei ao Tinau a bon ranran matana.
N te wiiki are i mwina au utu a warekaMotiaea 24. A uremanganga matau ngke ti wareki taeka aikai: “Ao N na kabeebetei naba taian uota ake a katokaki i aon angami, bwa kam na aki kona n namakin i aon nukami” (te kibu 14).
“Anne te bwai ae riki i aon te kawai,” I karina naba n taekinna. I aki riai n iangoia bwa N na kanga ni kabongana te koroboki ae tabu aei inanon maiu—te koroboki ae tabu aei e a kaman tia ni kabwarabwara aron maiu! E boni kamimi! I a bon aki kona n tataninga ni kani kunei koroboki riki tabeua ake ti te arona ma aron maiu.
Ao anne aron ae I reiakinna bwa N na kanga ni kamwakuri koroboki aika tabu nakon maiu, ao I kona naba ni kabootaua maiu ma te bwai are I warekia inanon boki aika tabu!
Kamatata n te korotamnei iroun Scott Peck