I Kona ni Wareka te Boki Anne?
Neil R. Cardon, Utah, USA
Tao 50 te ririki n nako, toau ni mitinare ao ngai ti rianna ni kakaai auti ni kaan ma te Uniwetirii ae Córdoba i Argentina, te kairake ni mwane e kaoira nakon ana ruu. N te tai ae waekoa e waekoa n ota bwa ngaia ma kain ana ruu a butimwaira bwa a na kauntaeka ngkana bon iai te Atua.
Ti aki kan kauntaeka, ma ngaia n onean mwiina ti butimwaea are ti na manga kaitibo imwiina ni maroroakina ara rongorongo n te tabo ae tau ibukin te reirei. Ngke ti oki, te kairake n ataeinimwane e kabwarabwara bwa bukin tera ngkai e kakoaua bwa akea te Atua. E taku bwa aomata a karika te Atua ibukin kainnanona ni kakoaua n te bwai ae korakora, n te bwai ae mwaaka.
Ngke e a roko n ara tai, I titiraki, “ko kanga n ataia ae iai te United States?” I kakoaua ni koauana ao n titiraki ngkana iai riki bwai ni kakoaua bwa bon iai. E taku bwa e wareka taekana inanon booki ao nutibebwa. Imwiina I titirakinna ngkana e kakoaua au koaua n te bwai are e a tia ni warekia. E kaotia n taku bwa e kakoaua.
“Ngaia ngkanne ti aki kona ni kakewei aia koaua nakekei, n aron au koaua, man te United States.” I taku. “Ti aki naba kona ni kakewei aia koaua naake a tia ni korea taekana.” E kakoaua te kairake n ataeinimwane.
Imwina I titiraki, “E boboto iaon te iango aei, ae kangai bwa ti kona ni kakewea aia koaua naake a tia n noora te Atua ao a koroi bwaai ake a rinanona?” I kaota nakoina te Baibara, n tuangnga bwa iai inanona aia koaua mwane ao aine ake a tia n noora ao n taetae ma te Atua ao Iesu Kristo. I titiraki ngkana e kona ni kakewei aia koaua ake a koreaki inanon te Baibara ao e rawa n taekina tiaki.
Imwiina I titiraki, “Tera am iango n te boki ae koreaki irouia aomata irarikiia naake n te Baibara ake a noora naba te Atua n aroia taan korea te Baibara?” E kaeka akea te boki anne.
Ti kaota nakoina ana Boki Moomon ao n reireinna bonganana. Ti kakoaua bwa e bon koaua ao te Atua e teimatoa n reitaki rinanon ana burabeti ae maiu ni bong aikai.
E mimi, te ataeinimwane ao e taku, “Ia tia n aitara ma taan kabwarabwara ma ekaretia ake tabeua. Iai iroumi te bwai ae I tuai man ongo mai imwaina. I kona ni wareka te boki anne?” Ti anganna te boki ao ti kakoaua n ana tangira te Atua are kaotia ibukiia Natina.
Ibukina bwa e a toki te tiemetita, ti aki kona ni manga kaitibo ma te kairake n ataeiniwane aei imwain ae e okira mweengana I Bolivia. E ngae n anne, I tataro bwa e na kona ni wareka te boki ao ni karekea ana koaua.
N 2002 I weteaki bwa nna riki bwa te beretitenti n te mwaanga n te Tienta Ni Kataneiai Ibukiia Mitinare I Provo. N te Tabati teuana I karakina au karaki are I eta nakoia mitinare. Imwiina te mitinare mai Bollivia e tuangai bwa e a tia n ongo taekan te mwaane ae ea kara n ana titeiki ni karakina rairakina—te karaki are titebo ma are I karakinna ikai.
A kaonaki matau n rannimata. Imwiin 40 te ririki n nako, Ia tia ni karekea kaekaan au tataro ibukin te kairake n ataeinimwane mai Bolivia. E a tia n reke ana koaua bwa iai te Atua ao Ana babaire ni kakukurei are korakora. I ataia bwa n te bong teuana ti na manga kaitibo, ao Nna rangi ni kukurei ni kaitibo ma ngaia n te euangkerio.