Reirein te Euangkerio
Te Utu n Atua ae Tabu
Gordon B. Hinckley, te ka 15 ni beretitenti n te Ekaretia, e bungiaki n Tuun 23, 1910. E kabiraki bwa te Abotoro n Okitobwa 5, 1961, ngke 51 ana ririki, ao ni Maati 12, 1995, e kamatoaki bwa te Beretitenti n te Ekaretia.
Mairoun “The Father, Son, and Holy Ghost,” Ensign, Nobembwa 1986, 49–51; kabuburaan maan ao tuan te koroboki a katiteuanaaki.
Ara onimaki iroun te Atua te Tama ae Akea Tokina; iroun Natina, Iesu Kristo; ao n te Tamnei ae Raoiroi bon te kabanea ni kakawaki n onimaki n ara aro.
N reiakinan bwaai aika kakawaki n ara reirei, te Burabeti Iotebwa e iangoia bwa te bwai ae rang ni kakawaki ngaia are e a kateia bwa te nambwa teuana:
“Ti kakoauaa te Atua, te Tama ae Akea Tokina, Natina, Iesu Kristo, ao te Tamnei ae Raoiroi” (Taekan te Onimaki 1:1).
[E reirei naba te Burabeti]: “Bon te moan n reirei n te euangkerio atakin raoi anuan te Atua aika kakawaki” (History of the Church, 6:305).
Katanoata aika a rang ni kakawaki ao ni kaineti ma ana taeka te Uea … : “Ao aio te maiu are aki toki, ti ataiko ae te Atua ae ti temanna ae koaua, ao Iesu Kristo, ae Ko kanakomaia” (Ioane 17:3). …
Te Atua te Tama ae Akea Tokina
I kakoaua ma te aki nanokokoraki ke te katabeaki iroun te Atua, te Tama ae Akea Tokina. Ngaia bon Tamau, Taman tamneiu, ao Tamaia tamneia aomata ni kabane. Ngaia bon te Tia Karikibwai ae kakannanto, te Tia Tautaeka n te Aonaaba. … E karaoaki te aomata ni Katotongana. Bon te aomata. E boni koaua. Iai rabwatana ae iai irikona ao riina ae kona n ringaki kanga te aomata (tara D&C 130:22).
N rongorongon karikan te aonaaba, “E taku te Atua, Ti na karika te aomata bwa ai arora, ni katotongira” (Karikani Bwaai 1:26).
Iai te taetae ae kona ni matata riki? E kamangora te Atua, n aroia tabeman ni karikira bwa ti na kakoaua, bwa e karikaki te aomata ni Katotongana? Ma, e riai ni karikirakea inanon te mwaane ao te aine te kakaaitau ae korakora riki ngkai teuaanne ke neienne bon natin te Atua te mwaane ao te aine. …
… Ngke ngai te mitinare, I taetae [i London, England, ngke e a roko naba temanna te tia kamangao n takaarua ao n taekin taeka aika aki riai], “Ibukin tera ko aki tiku ma reirein te Baibara are e taekinaki n Ioane (4:24), ‘Bon te Tamnei te Atua’?”
I kauka au Baibara nakon te kibu are e taekinna ao ni wareka te kibu ni kabane nakoina: “Te Atua bon te Tamnei: ao ane e taromauria e riai n taromauria n te tamnei ao te koaua.”
I taku, “E koaua ae te Atua bon te tamnei, ao titebo ma ngkoe, n ikotakin te tamnei ao te rabwata ngaia are e a karikiko bwa te aomata ae maiu, ao titebo ma Ngai.”
Ngaira n tatabemanira nako bon rabwata aika uoua te rabwata n tamnei ao te rabwata ae mamate. Ni kabane aomata a ata koauan te mate … , ao ngaira n tatabemanira ti bane n ataia naba ae te tamnei e maiu inanon rabwatara n tatabemanira nako ao n tabetai, iaan te baire mai karawa e kona n riki man ana karea Natin te Atua, e na iai ikotakin te tamnei ao te rabwata. Ana taeka Iesu are te Atua bon te tamnei e aki kakewea are Ngaia (te Atua) iai rabwatana, n aron te rongorongo are Ngai bon te tamnei e aki kakewea are iai rabwatau.
I aki kabotaua rabwatau ma Ngaia n nakoraoina, ni mwaakana, n tikiraoina ao ni kimwareireina. E maiu n aki toki. Ngai I mamate. Ma anne e ti karikirakea au karinerine nakoina. … I ukoukoria bwa N na tangiria ma nanou, au kantaninga, au iango, ao korakorau ni kabane. E korakora riki wanawanana nakon wanawanaia aomata ni kabane. … Ana tangira e namakinaki irouia Natina ni kabane, ao bon Ana mwakuri ao Mimitongina bwa e na uota te aki mamate ao te maiu are akea tokina irouia Natina mwaane ao aine … (tara Moses 1:39). …
Te Uea ae Iesu Kristo
I kakoaua te Uea Iesu Kristo, ana Nati te mwaane ae akea tokina, te Atua ae maiu. I kakoaua Irouna bwa ana Moannati te Tama ao Ana rikitemanna te Tama n te iriko. I kakoaua Irouna bwa te aomata temanna, ae kaokoro ao n onoti mai iroun Tamana. …
I kakoaua bwa inanon Maiuna ae mamate ti Ngaia te aomata ae kororaoi are e a tia ni maiu. I kakoaua bwa n Ana taeka e kona ni kuneaki iai te ota ao te koaua are, ngkana e iraki ao e na kamaiua te aonaaba ao n uota te karietataaki nakoiia aomata. I kakoaua bwa n Ana nakoanibonga e katikua te kariaiakaki mai iroun te Atua—te mwaaka ni kakabwaia, te mwaaka ni kamaiu, te mwaaka n tautaeka n ana mwakuri te Atua iaon te aba, te mwaaka ni kabaeaki i karawa are e na kabaeaki naba iaon te aba.
I kakoaua bwa rinanon Ana angakarea ni kamaiu, ana karea ngke e anga Maiuna iaon te tabuki ae aranaki bwa te Ta banou, E karawawataki ibukin aia bure aomata, ni kamaiura man korakoran ara bure ngkana ti na tokanikai iaon te buakaka ao n Iria. I kakoaua ni koauan ao mwaakan Manga Utina. … I kakoaua bwa rinanon Ana Mwakuri ni Kamaiu, … ngaira n tatabemanira nako ti na karekea te bwaintangira n te kamaiuaki man te mate. I kakoaua riki bwa rinanon te angakarea anne are a bane ni karekeaki irouia mwaane ao aine, ni kabane natin te Atua mwaane ao aine, te tai ibukin te maiu are akaea tokina ao te karietataaki n ana aba n uea Tamara, ngkai ti … karinei Ana tua.
Akea ae kakannato ae e a tia ni maeka n te aonaaba. Akea te aomata ae e a tia ni karaoa te aeka n angakarea ke n anganaki te aeka ni kakabwaia aei. Ngaia bon te Tia Kamaiu ao te Tia Kabooa te aonaaba. I onimakinna. I katanoata arona n Atua… . I Tangiria. I taekina Arana ma te karinerine ao n te tangira. …
… Koroboki aika tabu a taekiniia [naake] E kaotia nakoiia ao ma nake E taetae bwa Natin te Atua are e manga kautaki ae maiu. N te kawai ae titebo inanon boong aikai E a tia ni kaoti, ao naake a Nooria a katanoata:
Imwin taian koaua aika bati ake a tia ni kaotaki Ibukina, aei te kakoaua, te kabanea ni koaua, bwa E maiu!
Bwa ti noria, n angatain te Atua; ao ti ongo te bwana are uota te rekooti bwa Ngaia bon ana Rikitemanna te Tama—
Bwa aonaaba ni kabane a karaoaki ngkai ao ngkekei mai irouna, ao rinanona, ao Irouna, ao kaaina akana iaona bon natin te Atua aika mwaane ao aine. (DC 76:22–24).
Aio te Kristo ae I onimakinna ao ngaia ae I kakoaua.
Te Tamnei ae Raoiroi
Te atatai anne e roko man ana taeka te booki ae tabu, ao bwa te kakoaua e roko man mwaakan te Tamnei ae Raoiroi. Bon te bwaintangira, e tabu man tikiraoi, e uotaki n te kaotioti mai iroun te kateniman n Taian Atua. I kakoaua te Tamnei ae Raoiroi bwa bon rabwatan te tamnei are e kaaina te tabo ma te Tama ao te Nati, teniman aikai a karika te Utu n Atua ae tabu. …
E kakoauaki bwa te Tamnei ae Raoiroi e kinaaki n taai ake ngkoa bwa kaain te Utu n Atua ibukina bwa te maroro imarenan Betero ao Anania ngke e taua mwakoron te mwane are e reke man kaboakinakoan te aba Anania.
“Ma e taku Betero, Anania, e aera ngkai e kaona nanom Tatan bwa ko na kewe nakon te Tamnei ae Raoiroi … ?
“… Ko aki kewe nakoiia aomata, ma ko kewe nakon te Atua” (Mwakuri 5:3–4).
Te Tamnei ae Raoiroi [bon] te Tia Buobuoki are e beritanaki iroun te Tia Kamaiu are e na reireiniia taan Iriiria bwaai ni kabane ao E na kaururing i nanomi bwaai ni kabane … (tara Ioane 14:26).
Te Tamnei ae Raoiroi bon te Tia Katai taian Koaua, are e kona n reireiniia aomata bwaai aika aki kona n reireiniia i bon irouia. … Ataakin te koaua n Ana Boki Moomon e beritanaki “ni mwaakan te Tamnei ae Raoiroi.” E a manga taku ngkanne Moronaai, “Ao mani mwaakan te Tamnei ae Raoiroi kam na kona n atai koauan bwaai ni kabane” (Moronaai 10:4–5).
I kakoaua te mwaaka aei, te bwaintangira aei, e tauraoi nakoira n te bong aei.
E Koaua ao n Tatabemania
… I kakoaua te Atua, te Tama ae Akea Tokina, ao iroun Natina, Iesu Kristo, ao n te Tamnei ae Raoiroi.
I bwabetitoaki inanon ara aika tenua aikai. I mareaki inanon ara aika tenua aikai. Akea au titiraki ni kaineti ma koauaia ao aroia bon irouia. Aroia bon irouia anne a matata karaoakiia ngke e bwabetitoaki Iesu iroun Ioane i Ioretan. Ikekei inanon te ran e tei Natin te Atua. E ongo te aba Bwanaan Tamana ni katanoata Natina ae kakannato, ao te Tamnei ae Raoiroi e ruo n ai aron te taobe (tara Mataio 3:16–17).
I ataia bwa e taekinna Iesu bwa ane e a tia n Noria ao e a tia naba n noora naba te Tama [tara Ioane 14:9]. E aki kona n taekinaki ae titebo irouia aika bati bwa te nati te mwaane e katotonga ana karo?
Ngke e tataro Iesu nakon te Tama, ni koauana E aki tataro bon nako Ina!
A Katiteuanaki Raoi
Aomata aika a kaokoro, ma a katiteuanaki n te kantaninga ao n aia mwakuri. A katiteuanaki n ti teuana ibukin kaokan te kabanea ni baire mai i karawa ibukin kamaiuakiia ao karietatakiia natin te Atua.
… Kristo e tataro ma Tamana ibukia Abotoro, ake E tangiriia, e taetae ni kangai:
“I aki tataro ibukiia ti aikai, ma ibukiia naba ake a onimakinai n aia taeka,
“Ba a na bane n riki n teuana, te Tama, ngkai ko mena inanou, ao Ngai i nanom, ba a na mena naba i nanora” (Ioane 17:20–21).
Bon te riki teuana ae kororaoi anne imarenan te Tama, te Nati, ao te Tamnei ae Raoiroi are e kabaeiia teniman aikai nakon te nano teuana irouia te Utu n Atua ae tabu.
3 Nephi 11:15: Temanna imwiin Temanna, iroun Walter Rane, a na mwamwannano te Church History Museum
Te Tataro i Keketemwane, iroun Del Parson