Ko A Kaoaki
Antai ae e aki tangiria ni karekea te kakao? Ngkana ti karekea te kakao n iira te bootaki n te koronririki ke n te bootaki ni mare, ti na namakina te kukurei ni kona ni bukamarua ma tabeman te bwai ae kakawaki inanon maiuia. Iai naba inanon te botoniango ibukin te Iwawaki ibukin 2014 te kakao ni kimwareirei ae akea tokin kakawakina: “Nakomai nakon Kristo, ao ni kakororaoaki irouna, ao ma ni kakeai bwaai ni kabane aika tiaki aron Atua” (Moronaai 10:32).
Kakao aika bati a tangira te kaeka—te RSVP—ni kaotia bwa tao ti butimaea ke tiaki. Ko a tia ni kaeka te kakao aio inanon maium? Nakomai nakon Kristo nanona bwa ti bon kawakina te berita ae tabu are ti karaoi n te bwabetito. Nanona bwa ti a tia ni butimaea Iesu Kristo bwa ara Tia Kamaiu te Tia Kabooira. Nanona bwa ti kinaa ao ni kakoaua tera are Aramwa e reireina natina Tiburon: “Akea riki te kawai are te aomata e kona iai ni karekea te kamaiuaki, ti rinanon Kristo” (Aramwa 38:9). Butimwaean te kakao aio nanona bwa ti a tia ni kabaeira n iira ana katoto ae kororaoi Kristo man maiuakinan te maiu ae itiaki ao n tabu ao man tangirakiia ao ni beku ibukiia tabeman.
Te kakao aio bon tiaki ibukin te tai ae ti teuana; bon te mwakuri ae reitinako. Ti bon kaoaki n iira te kawai are e na kairiira nakon te tembora, ike ti na karaoi riki berita aika tabu ma Tamara are i Karawa ao n iiri otenanti aika a kakawaki nakon karietakira. Te kawai aio are e kona inanona karaoan am mwakuri ni mitinare. E na karinaki inanona te mareaki n te tembora ao n riki bwa mwaane ao aine aika raraoi inanon abanuean te Atua. E nanonaki naba te teimatoa ni karokoa te toki. N aron are e taekinna te kakao, ngkana ti nakomai nakon Kristo, ti kona ni kakororaoaki Irouna. Kristo e karaoia bwa ti na kona n tiku i aon te kawai ni berita aio rinanon te onimaki Irouna ao rinanon te rairannano. Te mwakuri n riki ni kakororaoaki aio e kona ni moanaki n te bong aio; ana Mwakuri ni Kamaiu Kristo e karaoi bwa e na kona n riki.
Te kakao aio e tuangiira bwa ti na kakeai mai iroura bwaai ni kabane aika tiaki aron Atua—ni kaokoro man arora, kainibaire, ao mwakurin te aonaaba. Ti a kaoaki bwa “ni katikui bwain te aonaaba aio, ao ni ukoukori bwaai aika tamaroa riki” (D&C 25:10). Ti kakoaua bwa butimwaean te kakao nakon “nakomai nakon Kristo e kona ni kakororaoaki” e na kairiira nakon te kukurei n te maiu aio ao nakon te maiu are akea tokina n te aonaaba ae na roko. Ko a kaoaki bwa ko na kaeka n te bong aio!