Te Rongorongo ni Kakawari n Reirei

Ana Mwakuri Iesu Kristo ae Tabu: Te Katoto

Tataromwaaka ni kamatebwaia te bwai n reirei aei ao ukeria n ataia bwa tera ae e na tibwaaki. E na kanga atakin maiun ao ana mwakuri te Tia Kamaiu ni karikirakea am onimaki Irouna ao ni kakabwaiaia naake ko tararuaia rinanon te kakawari n reirei? Ibukin rongorongo riki tabeua, nakon reliefsociety.lds.org.

Onimaki, Utu, Buoka

Aio mwakoron te Rongorongo ni Kakawari n Reirei are e kaota iai anuan ana mition te Tia Kamaiu.

Ngkai ti a ataia bwa Iesu Kristo bon ara banna ni katoto ni bwaai ni kabane, ti kona ni karekei nanora n Iria. A onrake booki aika tabu ma kaunganano ibukira bwa ti na ira mwanekan Kristo. Nakoia tenaan Nibwaite, e taku Kristo, “Bwa mwakuri ake kam noorai ni karaoi ao anne ae kam riai naba ni karaoi” (3 Nibwaai 27:21). Nakon Toma, e taku Iesu, “Boni Ngai te kawai, ao te koaua, ao te maiu: akea ane nako n te Tama, bwa ti i Irou” (Ioane 14:6).

N te bong aei a kauringira ara tia kairiiri bwa ti na katea te Tia Kamaiu bwa ara banna ni katoto. Linda K. Burton, te beretitenti ni kabuta n te Bootaki n Aine, e taku, “Ngkana ngaira n tatabemanira nako iai iroura reirei n te Mwakuri ni Kamaiu ni koreaki i kabin nanora, ngkanne ti na riki bwa aekan aomata aika e tangiria te Uea bwa ti na katotong.”¹

Beretitenti Thomas S. Monson e taku, “Ara Uea ao ara Tia Kamaiu, Iesu Kristo, bon ara Katoto ao korakorara.”²

Ti a kakaai arora ni kaanirara nakon Iesu Kristo, ni karinei Ana tua, ao ni mwakuri korakora bwa ti aonga n oki nakon Tamara are i Karawa.

Man Koroboki aika tabu

2 Nibwaai 31:16; Aramwa 17:11; 3 Nibwaai 27:27; Moronaai 7:48

Man Rongorongora

“E kanikinaea te kawai ao e kaira te kawai,” e koroboki Eliza R. Snow, te kauoman ni beretitenti ni kabuta n te Bootaki n Aine, ibukin ana mwakuri iaon te aba Iesu Kristo.³ E kawariia n tatabemaniia—temanna imwiin temanna. E reireinira bwa ti riai ni kitania ake ruangaun ma ruaman ni kamaiua are e bua (tara Ruka 15:3–7). E kamaiuia ao e reireiniia n tatabemania, riki ni karekea ana tai ibukiia aomata aika uaanao n te mwaiti ae 2,500 te aomata (tara 3 Nibwaai 11:13–15; 17:25).

Ibuakoia aine Aika Itiaki ni Boong aika Kaitira, Beretitenti Dieter F. Uchtdorf, Kauoman Tia Ibuobuoki n te Moan Bereitentii, e taku: “Ngkami aine aika kam tikiraoi aika kam anga te mwakuri n nanoanga nakoia tabeman ibukin bukina aika a korakora riki nakon are ko tangiria ibukin oin kabwaiaia. N aei ko ira ana katoto te Tia Kamaiu iai. … Ana iango n taai nako aio bon te buobuokiia tabeman.”⁴

Bwaai aika a na taraaki

1. Linda K. Burton, “Is Faith in the Atonement of Jesus Christ Written in Our Hearts?” Riaona, Nobembwa 2012, 114.

2. Thomas S. Monson, “Meeting Life’s Challenges,” Ensign, Nobembwa 1993, 71.

3. “How Great the Wisdom and the Love,” Boki n Anene, no. 195.

4. Dieter F. Uchtdorf, “Happiness, Your Heritage,” Riaona, Nobembwa 2008, 120.

Tera ae I Kona ni Karaoia?

1. Bukin tera ao e kanga n riki Iesu Kristo bwa au banna ni katoto?

2. E kanga buokaia aine aika I kawariia e buokai n ira te Tia Kamaiu?

TE MANGAUTI, iroun Harry Anderson