Antai ae Tangiria n Tataro?

Jarrel M., Biribin

I aon au tai ni mitinare, Ngai ma toau ti reireina te utu ae mwaiti natiia. N te tai teuana mai buakon ara tai ni babaire, ti tataro ao ni maroroakinna bwa tera te reirei are ti na reireinia iai ataei n are i mwina, ao ti uaia ni boonnano bwa ti na reireia taekan te tataro.

Ngke tia roko n aia auti, te tibu te unaine ma ataei a bon rangin kukurei. Ti moana ara reirei ma te tataro. A aki karongoa ataei ao a tauraoi n ongora. Ti kamatata nakoia bwa ti na kanga ao bukin tera ti tataro. Ni motikan ara reirei, ti titirakinia, “Antai ae e na kainira n te tataro?” A tangiria ni kan tataro ni kabane! Ngaia are ti a bairea aia tai n tataro ni katoa te tai are ti roko iai n angania te reirei. Ti tuangia naba bwa a kona n tataro ngkana akea ngaira irarikia.

I mwin te reirei anne, I iango, “Bukin tera e rangin bebete irouia ataei aika uarereke n tataro nakoia riki ake a ikawai ae e kaangaanga irouia bwa a na tataro?” I kunea te kaeka n te Bible Dictionary: “N te tai are ti reiakina iai te reitaki ae koaua are ti tei ni baineta iai te Atua (are aranaki, iai bwa te Atua bon Tamara, ao ngaira Natina), ngkanne n te tai ae waekoa e a riki te tataro bwa te oinibwai ao ae ti na riai n taneiai iai ni kakaraoia (Mataio. 7:7–11). Angin kaangaanga aika kantaningaki ibukin te tataro a kaoti man manuokinan taekan te reitaki aei” (“Tataro”; tara naba Kairi nakon Koroboki aika tabu, “Tataro,” scriptures.lds.org).

Man te tai anne, I kataia ni buokia aomata n ota ni koauan n aia reitaki ma Tamara are i Karawa. Tamara are i Karawa e tangiria n taetae ma natina, n ai aroia ara karo aika i aon te aba ae a kan taetae ma ngaira. E tangirira. E tangiria n taetae ma ngaira, ao E tangiria bwa ti na taetae nakoina.