Rongorongo man te Moan Beretitentii
Te Kabanea n Tamaroa n Tai n Unika te Aroka
I Rome n taai akekei, Janus ngaia bon atuan moan bwaai. E kaotaki bannana n tainako ma uoua ubuna—teuana e tarai taai aika a tia n nako, ao are teuana e tarai taai aika a na roko. Tabeua taetae a arana te namwakaina ae Tianuare bwa ingoana ibukina bwa moan te ririki bon te tai n uriuring irarikin te tai ni babaire.
Nga ma nga n ririki imwina, a mwaiti katei ni kabuta te aonaaba aika reitanako te katei ni karaoan kouru ibukin oin rikirakeia n te ririki ae boou. E koaua ae katean te kouru ibukin oin rikirakem e bebete—ma karaoan nanona bon te bwai ae kaokoro.
Temanna te mwane are e a tia ni karinani mwaitin ana kouru ibukin rikirakena n te Ririki ae Boou e namakina te kukurei ibukin rikirakena. E iango i bon irouna, “Ni karokoa ngkai, I a tia ni kawakina au taeka bwa N na kauarerekea kanau, N na aki manga un, I a ira raoi au kataumwane, ao n tuai ni manga ngureakina taekan aia kamea kaain rarikiu. Ma te bong aei bon Tianuare 2 ao e tibwa toki beeron te tai bwa ai te tai n teirake man au kainiwene. E na reke bwa te kakai ngkana I teimatoa n iri ni kabane nanon au kouru.”
Moanna mai Moana
Iai te bwai ae rang ni kantaningaaki ibukin te waaki ae boou. Au kantaninga n te tai teuana ke tetaina ti bane n tangiria ni manga moanna mai moana n akea taian kaairua ke kantaninga ake mai mwaaina.
I tangiria ni karekea te kaombiuta ae boou ma ana ate turaaiu ae itiaki ao ae matoatoa. N te tai aei e mwakuri raoi. Ma inanon boong ma wiiki aika a nako ao n ririkiraken mwaiti riki burokuraem aika karinaki (tabeua n oin nanom, ao tabeua tiaki n oin nanom), n tokina te kaombiuta e a moanna n nakobuaka, ao bwaai ake e kakaraoi ni waekoa mai mwaaina a rangin ni waeremweremwe. N tabetai e a bon aki mwakuri. Kataakin kamaiuakina e a riki bwa te mwakuri teuana n te auti ngkai e a kainnano te hard drive ni mangaongaon kanoana n rongorongo ake akea manenaia ao bwaina ake aki bongana. Iai taai ngkana ti ngaia kawaina ae kona ni karaoaki bwa e na kamaunaki kanoan te kaombiuta ao ni manga karina ana tititem ae boou ao ni moanna mai moana.
A kona aomata ni karawawataki ma taian maaku, nanououa, ao bukibuki aika aki eti. Kaairua ake ti a tia ni karaoi (n nanom ao n tiaki n nanom) e kona ni karawawataira ni karokoa te tai are e a tara ni kaangaanga karaoan te bwai ae ti ataia ae ti riai ni karaoia.
N te bwai ae te bure, iai te kawai ae moan te tamaroa ae atongaki bwa te rairannano are e kariaira bwa ti na kaitiaki bwain nanora are e kamangaoi nanora. Te euangkerio, rinanon Ana Mwakuri ni Kamaiu Iesu Kristo ae kamimi man ibuobuoki, e kaota te kawai nakoira bwa ti na kaitiaki tamneira man mabubun te bure ao n riki kanga ai aron te ataei ae boou, itiaki, ao n akea ana bure.
Ma tabeua bwaai a kawaeremweira ao n tauira, ni kariki iango aika akea uaaia ao mwakuri ake a karawawataira bwa ti na aki kona ni waaki.
Karirikara Bwa Kabanea n Tamaroa Ae Ti Kona n Riki Nako Iai
Katean kouru bon te mwakuri ae uaana. Ti ataia bwa iai ana kouru Tamara are i Karawa ibukina bwa E a tia n tuangira bwa Ana mwakuri ao mimitongina bon “uotakin te aki mamate ao te maiu are akea tokina iroun te aomata” (Moses 1:39).
E kona oin ara kouru n uota te kabanea n tamaroa inanora. Ma, teuana te bwai ae urua aron ara mwakuri ni karaoi ao ni wakin ara kouru bon te iremwe. N tabetai ti mwarara ni waki, n tataninga te tai ae riai ni wakinaki iai—moanibongin te ririki ae boou, moan tain te tiamwa, ngkana ti a weteaki bwa bitiobi ke te beretitenti n te Bootaki n Aine, imwin ae a reirei iai ataei, i mwin motirawara man te mwakuri.
Ko aki tangira te beeba ni kakao imwaain ae ko wakin am kouru aika raoiroi. Ko aki kainnanoa te tataninga ibukin te kariaiakaki n riki bwa te aomata are ko karikaki nako iai. Ko aki kainnanoa te tataningaa kaoakim nakon te nakoa n te Ekaretia.
Ti kona n tabetai ni kabanebuakai ririkin maiura n tataninga bwa ti rineaki (tara D&C 121:34–36). Ma anne te katautau ae bure. Ko a tia ni kaman rineaki!
Inanon maiu I a tia ni kabanei tairiki n aki mamatu n raraoma ibukin kangaanga, tabeaianga, ke rawawatau. N aki tabeakinna bwa buakakara bwai n taraakiia, e kaungaaki nanou ma te kantaninga ae te bong ae boou ana nakoraoi riki.
Ni kabane boong aika boou, e na roko te karangaina ae boou—tiaki ti ibukin te aonaaba ma bon ibukira naba. Ao rokon te bong ae boou e roko te waaki ae boou—te tai are ti manga waaki iai mai i moana.
Ma Tera Ngkana Ti Aki Kakoroa Bukina?
N tabetai te bwai ae tauira bon te maaku. Ti kona ni maaku bwa ti taku bwa ti na aki tokanikai, bwa ti na bon tokanikai, bwa ti na aki mwengaraoi, bwa te tokanikai e na bitira, ke e na bitiia aomta aika ti tangiriia.
Ai ngaia ae ti tataninga. Ke ni bwarannano.
Te bwai teuana are ti kainnanoia n uringnga ngkana ti katei ara kouru bon aei: Ti kuri ni koaua iai bwa ti na aki nakoraoi—i nanon te tai ae aki maan. Ma irarikin are te bwarannano, ti kona n anganaki te korakora ibukina bwa te ota aei e kanakoa rawawatan te riki ni kororaoi n te tai aei. E kakoauaki man moan bwaai bwa n te tai teuana ke tetaina, ti na aki kona ni kakoroi nanon bwaai aika ti a tia ni mwiokoaki nako iai. Ataakin aei mai moana e kanakoi angiin kamimi ao te bwarannano man aki koron bukiia.
Ngkana ti waaki ni karaoi ara kouru n te kawai aei, aki koron bukiia e na aki tiatianiira. Uringnga, e ngae ngkana ti aki roko nakon tokin kawaira ke te tabo are ti na nako iai ngkengkei naba, ti na bae n tia ni karaoa te rikirake inanon te kawai are e na kairiiri nako iai.
Ao anne ae kakawaki—e korakora nanona.
E ngae ngkana ti kabwaka ni karokoira n te tia, ti reitakinakon te mwananga are e na kakorakoraira riki nakon arora are mai mwaaina.
Te Kabanea n Raoiroi n Tai ni Waki Boni Ngkai
E taku te taeka n rabakau ae rang ni maan, “Te kabanea n tamaroa n tai n unika te aroka bon 20 te ririki n nako. Te kabanea n raoiroi n te kauoua n tai boni ngkai.”
Iai te bwai ae kamimi ao ni kantaningaki ibukin te taeka ngkai. Iai te bwai ae rang ni kakorakora ibukin te koaua are ngkana ti rineia bwa ti na baireia ngkai, ti kona ni waakirake n te tai naba aei.
Ngkai aio te kabanea n raoiroi n tai ni moanna ni karaoiko bwa te aomata ae ti a tangiria bwa e na riki n aekakina—tiaki ti 20 te ririki man te tai aei ma ibukin naba te tai ae akea tokina.
Reirei man te Rongorongo Aei
Beretitenti Uchtdorf e kabwarabwara bwa ngkana ti aki kakoroi nanon ara kouru, “ti kona ni kakorakoraaki. … E ngae ngkana ti kabwaka ni karokoira n te tia, ti reitakinakoan te mwananga are e na kakorakoraira riki nakon arora are mai mwaaina. Tuangiia kaain te utu bwa a na tibwaa aia atatai n aron te bwai are a reiakinna riki man rinanoana nakon are man mwiina, n aron banen am tai man te reirei ao ni karekea te kaniwanga.
Tamnei man iStockphoto/Thinkstock