Man te Ro nakon te Oota

Te Ara ae tauaki

Ti kona n ataia ma te koaua n te tai are a ro iai maiura bwa e kona Iesu Kristo ni bita te ro anne nakon te oota ngkana ti rairannano ni koaua.

Iai taai inanon ngke I namakinna are kanga akea te kantaninga ibukiu bwa N na kukurei ke n oki nakon Tamara are i Karawa. Tabeua te ririki n nako I katinanikuaki man te Ekaretia. I a tia ni maiuakina te maiu ni kainikatonga ao ni bure ao n tia n rootaki n ae korakora ibukin au mwakuri. Kabaeakiu nakon te aine ae I tangira e aki korobukina, au reitaki ma tabeman e bon aki nakoraoi, ao I aki kukurei.

E ngae ngke I a tia n rineia bwa N na bwaina te nanorinano e maan imwaain te tai anne, I kairoroaki bwa N na nanorinano ao n ukera karaoan nanon te Uea. I moanna ni wareki booki aika tabu n tai nako, n tataro n tai nako, ao ni kataia ni buokiia tabeman. I kataia ni kanakoraoa te reitaki are I a tia ni kaakea bonganana n taai aika nako, n ikotaki ma au reitaki ma te Tama are i Karawa. I tangira raoi te bitaki n nano.

E karangaina ngke I buti nakon te reirei n te bong teuana, ao e tuai oti. E a ota mainiku n oraitan ao e ro maeao, ma namwakaina are tabwanin n ruo rikaaki mai bukina. I a tia ni karikirakea te katei n reitaki ma Tamau are i Karawa n au tai ni buti. Ngke I tataro n au tai ni buti aei, au iango e kabebeteaki, ao te kantaninga ae boou e katukaki inanou.

I namakinna bwa e rikirake n ota maiu ao ni waekoa rikiraken otamwaakana riki, kanga aron otan te oraitan mai mainiku. Te ro e tabe ni bubua, ao au bure, are kanga buburan namwakaina are tabwanin, a tabe ni maunanako. A tuai maunanako, ma I ataia bwa a na waekoa ni buanako ngkana I kateimatoa au rairannano ni koaua. Iai au kantaninga bwa n tetaina e na otanako maiu kanga raneanean te tawanou.

N ikotaki ma te tai ao ngkana I tataro ibukin te tangira ibukin Tamau are i Karawa ao tabeman, I moanna n nanorinano riki. Te rikirake n nanorinano e kairai nakon te beku ibukin te Atua ao tabeman n aki ti iangoai, ao au kantaninga ibukin te maiu are akea tokina ao nakoraoin te tai ae na roko e kaboouaki ao ni manga kakorakoraaki riki. Ngkai e a rikirake te kantaninga anne, ai ti tearona naba ma au onimaki bwa au Tia Kamaiu, Iesu Kristo, iai korakorana ni kamaiuai ao ni kaitiakai man au bure ni kabane. I ataia bwa ana taeka Moomon a bane ni koaua: “Kam na karekea te kantaninga rinanon ana mwakuri ni kamaiu Kristo ao mwaakan mangautina, bwa kam na kateirakeaki nakon te maiu are akea tokina” (Moronaai 7:41).