Ni karokoira n te Tokanikai
Te tia korea te boki e maeka i São Paulo, Brazil.
Kamatata n te korotamnei iroun J. Beth Jepson
Ngke ai te 14 au ririki, au tia reirei n te physics e noora au tarena n te warebwai ao e karinai n te kabo n te Brazilian Mathematics Olympiad. Iai teniua aron wakinana. Te moan ao te kauoua a na karaoaki n te Kaonobong. I kamenaaki n te kateniua ni waaki ao n nooria bwa e na karaoaki inanon uoua te bong, Kaonobong ao te Tabati.
I a tuanga au tia reirei ao te tarekita n te Olympiad bwa N na aki karaoa te ukeuke n te Tabati bwa ana bong te Uea. Te tarekita e tuangai bwa N na taetae nakoia au taan kairiiri n te Ekaretia bwa I aonga ni kainaomataaki ni karaoa te ukeuke n te Tabati, bwa ngkana I aki karaoia ao N na katukaki. I taku bwa I kona ni katikui bwaai ni kabane ma tiaki te Atua.
I aki nanokawaki, ibukina bwa iai au kantaninga bwa te Atua e karineia ake a karinea. I uringnga Mataio 6:33: “Ma kam na ukoukora moa uean te Atua ma ana raoiroi; ao a na bane n raonaki baikai nako imi.”
Tabeua te wiiki imwiina ti reitaki ma te tia koroboki n te Olympiad, are e taekinna bwa I aki kona ni karaoa te ukeuke ni boong ake tabeua bwa N na katukaki. Imwiin te maroroo ae bati, e taku bwa N na kanakoa nakoina au i-meeri ni kabwarabwara arou. Imwiin kanakoan au i-meeri, I tataro nakon te Tama are i Karawa ao n taku bwa N na karaoa Nanona.
Te tairiki are imwiina, I karekea te i-meeri man te kouotineita ni koreia bwa I kona ni karaoa ukeuken te Tabati n te Moanibong n te tai are e rangi n angaraoi ibukiu, ao e tuangai naba bwa e na karaoaki te ukeuke n oin au kaawa bwa I aonga n aki kabua au kiraati n te ingabong n te reirei.
Imwiin karekean te rongorongo ae tamaroa aio, I tataro ni karabwa te Uea ibukin are E a tia ni buokai. Au karo a nakon te tembora ni kaota te karabwarabwa.
Ngke e a otinako bwiina, I karekea te metera te koora. Te Uea e karineia te koraki ake a karinea