E Kanga Kan Ataakin Te Utu n Atua Ni Bitai?
Nimaua koaua ibukin taian Atua are e kona ni karaoa te kaokoro n arom ni maiu.
E taku Iotebwa Timiti, “Bon te moan koaua man te euangkerio ibukin ataakin raoi aron te Atua.”1 Tera are ti ataia ibukin te Utu n Atua e kona ni bita arora ni maiu, tiaki tii ni bwaai aika bubura ma aika uarereke, ni bwaai ni katoabong. Iangoia bwa e kanga rabakaum n taian Atua n roota maium ngkana ko wareki koaua aika nimaua aikai.
Te Utu n Atua e tangiriira ao n tangira te kabanea n raoiroi ibukira.
Kaain te Utu n Atua bon akea tokiia ao akea tiani mwaakaia, ma A teimatoa n tabeakiniira bwa ti na kukurei ao ni waaki raoi. Beretitenti Gordon B. Hinckley (1910–2008) e kaota ana koaua: “A nano iroura, ao ngaira bwaai ake a rangi n tabeakiniira. A tatauraoi nakoira n tatabemaniira nako. Ti kawara te Tama rinanon te Nati. Ngaia are ara tia tei n ana kaintokanuea te Atua. Ai kamimira bwa ti na kona n taetae nakon te Tama n aran te Nati.”2
Ibukina bwa kaain te Utu n Atua a tangiriira ao n tangira te kabanea n tamaroa ibukira, ara rinerine e riai ni mutiakinaki bwa e kakawaki, riki bwaai aika uarereke ake ti karaoi ni katoabong are a uotiira ni kaniira riki Nakoia. Iai ara konabwai aika akea tiaia, ao te Atua e tabeakini ara tokanikai, ni bwaai aika uarereke.
Te Tama are i Karawa e anganiira bwaai ni kabane.
Ti ataia bwa te Tama are i Karawa e a tia n anganiira bwaai ni kabane, ngaia are ti riai ni kataia ni kina Baina ao ni kakaitau. Ngkana ti kakaitau, ti karaoa te mwakuri ae kaokoro. Beretitenti Thomas S. Monson e berita bwa “ti kona n tabekiira rake ma tabeman naba ngkana ti rawa n iangoi bwaai aika buakaka ao ni karikirakea i nanora te anua ni kakaitau.”3
Ibukina bwa bwaai ni kabane ake a reke iroumi a roko mai iroun te Atua (taraa Motiaea 2:20–21; D&C 59:21), ara kakaaitau e kona riki ni karaoira bwa ti na tatauraoi n tibwai bwaai ma tabeman. Aio kanoana ara tai ao tarena n ikotaki ma kakabwaia ni bwaai aika iai rabwataia.
Te Tama are i Karawa e onrake n te nanoanga.
Ana mwakuri ao mimitongin te Atua bon “uotakin te aki mamate ao te maiu are akea tokina iroun te aomata.” (Moses 1:39). E tangira ara tokanikai, ai ngaia are E anganiira te kabwara bure ibukin ara kaairua ake ti karaoi. Ana nanoanga e katauraoi kabwara bure ngkana ti karaoa te kaairua ae titebo riki. Te Tama are i Karawa, Iesu Kristo, ao te Tamnei ae Raoiroi a na buokiira ni bitiira.
Ana nanoanga te Atua e reireiniira bwa ti na kabwarai buure. Beretitenti Dieter F. Uchtdorf, te Kauoman n Tia Ibuobuoki n te Moan Beretitentii, e taku, “Ibukina bwa te Atua e rangi n tangiriira, ngaira naba ti riai n tangiriira ao ni kabwara bure imarenara.”4 Aio inanona kabwaran ara bure i bon iroura.
Iesu Kristo e korakai ibukira.
Rinanon te Mwakuri ni Kamaiu, te Tia Kamaiu e na rinanon marakira ma te karawawataki n aekaia nako (taraa Aramwa 7:11–13). Ngkana iai ara bong ae matoatoa ao n namakina bwa akea ae oota iai ti kona n ataia bwa te Tia Kamaiu e bon oota. Ao ngkana iai ara bong ae kamimi ao n tangira temanna n tibwaia ma ngaia, te Tia Kamaiu e bon mena ikekei ibukira. E tangiria n tibwaua ara kimareirei n aron are E tibwa marakira.
Te Tamnei ae Raoiroi e kairiira.
Iesu Kristo e beritaniia Ana Abotoro bwa te Tia Karaunano, ke te Tamnei ae Raoiroi, e na kona n raoniia n tainako n reireiniia ao ni karau nanoia (Ioane 14:16–17, 26–27). Ngaira naba ti kona ni karekea ana bwaintituaraoi te Tamnei ae Raoiroi ni kairiira. Ao ti na kona ni kakoaua bwa kaeka are e na anganiira te Tamnei ae Raoiroi e na buokiira. Ma man Ana kairiiri, ti kona ni karekea te reitaki ae teimatoa ma taian Atua. Ao ngkai ti iira ana wirikiriki are ti karekea, ti na moanna n rangi n ataia riki.
Reirei n Tabati
Te Reirei n te Namwakaina aio: Te Utu n Atua
Te kamataata n te rawetamnei iroun Welden C. Andersen ao Matthew Reier; Te Moan Mii ni Burabeti, Iroun Del Parson; Kristo i Keketemwane, iroun Harry Anderson