Ibukin Kakorakoraia Kairake
I Bon Ururingnga n Taainako
Te kawai ae ti kawakina te bong ae te Tabati bwa e na tabu bon kaotakina nako tinaniku man ara berita aika tabu n ururingnga n taainako Iesu Kristo.
Kamataata n te tamnei iroun Ben Sowards
I uringnga, ngke te 11-au ririki, ni kairakiu iroun au bitiobi nakon nanon te umantabu ae boou n ara kateitei n ara uoote, ike e a tekateka ma ngai i matan taibora n toa. E taku, “Ko ataia, Larry, ko na katabuakaki nakon te nakoa n riikan n te Nakoanibonga ae te Aaron. Ko ataia bwa tera te kakabwaia ao te tabe ae onoti anne?” E tuangai bwa N na karekea te mwioko ae tabu ni mwakuri n aron te Tia Kamaiu are karaoia ni karekea te kanikina ae tabu man te toa nakoia ara taan taromauri. I bon taonaki ni korakoran weteau n te nakoanibonga are N na karekea.
Au bitiobi e titirakinai bwa N na kamatenanoa tataron te toa ake uoua ao n iangoia bwa a kanga ni botau nakon nanon maiu. E taku bwa N na riai ni kataia ni karaoi bwaai ake e tuangiira n tatabemaniira nako n te tataro n toa ngkana N na mwakuri ibukin te Tia Kamaiu ni katauraoa te toa nakoia tabeman. Imwiina ngke I okira mweengau, tamau e buokai ni kaota taromaurin te toa ni booki aika uoua te Doctrine ao Covenants (20:76–79) ao Ana Boki Moomon (Moronaai 4; 5). I wareki raoi n te moan tai inanon maiu. I kakauongo raoi ngke a warekaki n te taromauri. I iangoi raoi taeka ngke te kariki e a kabutaki, ma korakoran raoi te berita n toa e mataata ngke I ongo taeka aikai ni kakabwaiakin te ran: “bwa aki toki n ururingnga.” I titirakinai ibon irou, “Ngai I aki toki n ururingnga? Tera ae aki toki nanona? N na kanga n ururingnga n aki toki?” Ni katoa te tai are I ongo tataron te toa akana a tabu akanne I bon kaungaaki nakon iangoan raoi titiraki aika titebo aikai.
Te kawai are ti kawakina iai te bong ae te Tabati bwa e na tabu bon kaotakina nako tinaniku man ara berita aika tabu ma te Tama are i Karawa n ururingnga n taainako Iesu Kristo. Te bong ae te Taabati e riai n riki bwa aan ara ururing Ibukina ibukin boong ake onoua n te wiiki.
Te Tabati bon te bong ni karaurau rikaaki, n toki, ao n ururing. Ti irii bootakin ara Ekaretia; n tarai marurungira, kakabwaia, ao kabwakara; n ukoukora te kabwara bure; ni kana te toa; ao n iangoa raoi korakain te Tia Kamaiu ibukira. Ti kataia n aki katikaki ara iango man bwaai tabeua are a na tukiira man Neboakina, bwa “i aon te bong aio,” n aron are e a tia n taekinna te Uea, “ko na aki karaoa te bwai teuana” (D&C 59:13). Te mwakuri are karaoia n tain te Tabati e riai ni kawakina tamnein uringakin te Kristo. Ngkana te bwai are ti karaoia ni mwakoron nako te Tabati e kairiira nako man uringakin te Tia Kamaiu ao ni karoa te mwakuri ni mitinare n te Tabati n aron are E na karaoia, ngkanne tao ti riai ni manga iangoia terana are ti karaoia. Uringnga, te Tabati bon te bong are e rineaki tiaki bwa ti na motirawa man am mwakuri ma ngaia naba ti na taromauriia are Moan te Rietata (D&C 59:10).
Ti riai ni bairea maiura n te aro are akea te taeka are e na kamaiuko ibukin anaakin tabun mwakoron nako ana bong te Uea. Bon te bong ibukin Ana bitiniti, te bong are maiura ni kabane a kona ni kakabwaiaaki ao ni kabouaki man karekean te mwakuri aika tabu iroun temanna ao ma ara utu. Bon te bong ibukin kaubwain tamneira.
Kabanea tabeua te tai n te bong aio ni karika bairean bwaai aika tamaroa ake ko na karaoia are e na karaoa te bong n Tabati n tabu man mimitong i nanon maium. Imwiina mwakuria am baire anne.
Uringa ana berita te Uea ae kamiimi nakoia ake a karinea raoi te Tabati bwa ibukina bwa ko karaoi bwaai aikai ma te karabwarabwa ma te nano ao te moa ae kakukurei ao bwaninin te aonaaba bon ami bwai (tara D&C 59:15–16). Ti kona ni kariaia ni kanakoi kakabwaia aikai inanon maiura ao inanon maiuia kaain ara utu?
I kakoaua ni karinean te bong ae te Tabati. I taekinna ma te ninikoria ao te nanorinano I kaota au koaua bwa kawakinan te bong ae te Tabati bon ana tua Atuara, are e maiu ao e tangiriira n tatabemaniira nako. I kakoaua bwa ngkana ti na iria ao maiuakin tuua mai karawa ni kawakina te bong ae te Tabati ni katabua, te Uea, ni kabooa mwiina, e na kakabwaiaira, kairiira, ao ni kaungaira ni kakaai tokin kaangaanga ake a kaitaraira.