Folafolaga a Porter
Mai le “E I Ai Se Mafuaaga Sili mo i Tatou e Olioli ai,” Liahona, Nov. 2013, 115–16.
Ina ua maliu le tama o lo’u toalua, sa faapotopoto faatasi lo matou aiga e faafeiloai tagata na o mai e faaalia o latou faaaloaloga. I le afiafi atoa, a o matou faatasi ma aiga ma uo, sa masani ona ou matauina le atalii o le ma tama teine e 10-tausaga-le-matua, o Porter, o loo tu i talaane o lo’u tina faaletulafono—lona tinamatua. O nisi taimi sa ia tu i tua atu o ia, ma vaaia o ia. O se tasi taimi sa ou vaaia lona lima o uu mai le lima o lona tinamatua. Sa ou vaai ia te ia ao pōpō ona lima, tuu atu ia te ia ni nai opo laiti, ma tutu i ona tafatafa.
Mo ni nai aso ina ua mavae lena aafiaga, sa le mafai ona ou tuuese lena ata mai lo’u mafaufau. Sa uunaia au e auina atu ia Porter se i-meli. Sa ou tau atu ia te ia le mea na ou vaaia ma lagonaina. Sa ou faamanatu atu foi ia te ia feagaiga na ia faia ina ua papatisoina o ia, ma sii mai upu a Alema i le Mosaea mataupu 18:
“Ma o lenei, ona ua outou mananao e o mai i le lafu a le Atua, ma ta’ua o ona tagata, ma ua outou loto e tauave avega a le tasi, ina ia mama;
“Ioe, ma outou loto e faanoanoa faatasi ma e e faanoanoa; ioe, ma faamafanafana atu ia te i latou o e e manaomia le faamafanafanaga, ma tutu o nimolimau a le Atua i taimi uma ma i mea uma, ma i nofoaga uma atonu tou te i ai, seia oo lava i le oti, … ina ia mafai ona outou maua le ola e faavavau—
“… Afai o le manao lea o o outou loto, se a se mea tou te tetee ai i le papatisoina i le suafa o le Alii, o se molimau i ona luma ua outou ulu atu i se feagaiga faatasi ma ia, o le a outou auauna atu ia te ia ma tausi ana poloaiga, ina ia mafai ona liligi atili tele mai e ia lona agaga i luga o outou?” (fuaiupu 8–10).
Sa ou faamatala atu ia Porter na aoao mai Alema e tatau ia i latou o e mananao e papatiso ona naunau e auauna atu i le Alii e ala i le auauna atu i isi—mo lou olaga atoa! Sa ou fai atu: “ou te le iloa pe ua e iloaina, ae o le ala sa e faaalia ai le alofa ma le popole mo Tinamatua o le tausiga lea o au feagaiga. Tatou te tausia a tatou feagaiga i aso uma pe a tatou agalelei atu, faaali atu le alofa, ma fetausiai le tasi ma le isi. Ou te fia manao ia e iloa ua ou mitamita lava ia te oe i le avea ma se e tausi feagaiga! Pe a e tausia feagaiga na e osia ina ua e papatiso, o le a e saunia ina ia faauuina i le perisitua. O lenei feagaiga faaopoopo o le a atili tuuina atu ai ia te oe avanoa e faamanuia ma auauna atu i isi ma fesoasoani ia te oe e saunia ai mo feagaiga o le a e osia i le malumalu. Faafetai tele lava mo le avea ma se faataitaiga lelei ia te au! Faafetai mo le faaalia mai ia te au o foliga o se tagata tausi feagaiga!”
Na toe tali mai Porter: “Tinamatua, faafetai mo le savali. O taimi uma ou te fusiina ai Tinamatua, ou te lei iloa o loo ou tausia au feagaiga, ae sa ou lagona le mafanafana i lo’u loto ma sa matuai lelei lava le faalogona. Ou te iloa o le Agaga Paia lea sa i lo’u loto.”
Sa ou lagonaina foi le mafanafana i lo’u loto ina ua ou iloaina ua malamalama Porter afai na te tausia ana feagaiga, o le a ia “maua pea le Agaga [o le Tama Faalelagi] e faatasi ma [ia] [MF&F 20:77]. O se folafolaga na maua mai e ala i le mauaina o le meaalofa o le Agaga Paia.