Le Usoga: Oka, so Tatou Manaomiaina o le Tasi ma le Isi
E tatau ona tatou taofia le taulai atu i o tatou eseesega ae ia vaavaai i mea ua tatou tutusa ai.
Sa tatou vaai i lena vitio i ni atunuu se valu ma faalogo i isi gagana ese e iva. Mafaufau pe fia isi gagana ua faaopoopo i lena fuaiupu mulimuli. E ese le ofoofogia o le iloaina, i le avea ai ma se usoga i le lalolagi atoa ua mafai ona tatou sii ae o tatou leo i molimau i le upumoni faavavau o i tatou o afafine o se Tama Faalelagi alofa.
O se faamanuiaga sili le i ai iinei i lenei sauniga faasolopito ma lauga atu i tamaitai uma o le Ekalesia e tai valu tausaga ma matutua atu. O loo i ai se malosiaga maoae i lo tatou lotogatasi i lenei afiafi. A o ou vaai atu ia i tatou uma o potopoto faatasi i le Maota Autu mo Konafesi ma mafaufau i le faitau afe o isi o loo maimoa i lenei faasalalauga mai nofoaga i le salafa o le lalolagi, o le tuufaatasia o le mana o a tatou molimau ma le faatuatua ia Iesu Keriso ua mautinoa lava ua fatuina ai se tasi o faatasiga mamana a tamaitai ua sili ona faatumulia i le faatuatua i le talafaasolopito o le Ekalesia, a le o lena o le [talafaasolopito o le] lalolagi.
O le afiafi nei ua tatou olioli ai i le tele o a tatou matafaioi eseese o ni tamaitai i le Ekalesia. E ui tatou te eseese ma tulaga ese i le tele o auala, ae ua tatou faailoa atu foi o i tatou uma o afafine o le Tama Faalelagi lava e tasi lea ua avea ai i tatou o ni uso. Ua tatou aufaatasi i le fausiaina o le malo o le Atua faapea ma feagaiga ua tatou osia, e tusa lava po o a o tatou tulaga. O lenei faatasiga tuufaatasi, e aunoa ma se masalosalo, o se usoga faatamaitai sili ona faamamaluina i luga o le fogaeleele!1
O le avea ma usoga e tau mai ai e i ai se sootaga lemamotusiaina i lo tatou va. E tausi e le tasi uso le isi, e leoleo e le tasi le isi, e fefaamafanafanaai le tasi ma le isi, ma e i ai iina mo le tasi ma le isi i taimi lelei ma taimi faigata. Na fetalai mai le Alii, “Ou te fai atu ia te outou, ia tasi outou; ma afai tou te le tasi e le a a’u outou.”2
E uunaia i tatou e le fili ina ia tatou faitio pe sailiili masei le tasi i le isi. E manao o ia ia tatou taulai atu i o tatou eseesega ma faatusatusaina i tatou lava i isi. Atonu e te fiafia e faamalositino mamafa mo se itula i aso taitasi ona e te maua ai se faalogona lelei, ae ou te mafaufau o se savali i luga o ni faasitepu nai lo le alu i le lifi o se taunuuga faamalositino maoae lea. E mafai lava la ona tatou uo, a ea?
I le avea ai o i tatou o ni tamaitai e mafai ona tatou matua faitio ia i tatou lava. A tatou faatusatusaina i tatou lava i isi o le a tatou lagonaina pea le le atoatoa po o le ita i isi. Na saunoa Sister Patricia T. Holland i se tasi taimi, “O le manatu autu, e le mafai ona tatou tauina i tatou o ni tagata Kerisiano ae faaauau pea ona faamasinoina e le tasi le isi—po o i tatou lava—i se tulaga matuia.”3 Sa ia ta’ua e leai se mea e tatau ai ona aveesea lo tatou agalelei atu ma le tulaga faaleusoga. E manaomia le tau lava ina tatou malolo ma olioli i o tatou eseesega paia. E manaomia ona tatou iloa tatou te mananao uma e auauna atu i le malo e faaaoga ai a tatou taleni ma meaalofa tulaga ese i o tatou lava ala. Ona mafai lea ona tatou olioli i la tatou usoga, ma i a tatou fegalegaleaiga, ma amata ona auauna atu.
O le mea moni, tatou te matuai manaomia moni lava le tasi ma le isi. E masani lava ona sailia e tamaitai se faauooga, lagolago, ma ni mafutaga. E tele naua mea tatou te aoao mai le tasi ma le isi, ma e tele lava ina tatou faatagaina papupuni o o tatou lava vaivaiga e taofia ai i tatou mai le fiafia i fegalegaleaiga ia e ono avea ma faamanuiaga silisili i o tatou olaga. Mo se faataitaiga, e manaomia e i tatou o tamaitai ua matutua teisi atu mea e ofoina mai e outou teineiti o le vaitausaga o le Peraimeri. E mafai ona matou aoao le tele o mea mai ia te outou e uiga i le auaunaga ma le alofa faaKeriso.
Sa ou faalogo talu ai nei i se tala matagofie e uiga i se teineitiiti e igoa ia Sara, lea sa maua e lona tina se avanoa e fesoasoani ai i se isi tina i lana uarota e igoa ia Brenda, lea na aafia lona tuasivi ma le faiai. E fiafia Sara e o ma lona tina e fesoasoani ia Brenda. Na te tuuina le kulimi i lima o Brenda ma fofo ona tamatamailima ma ogalima aua e tele lava ina tiga. Ona aoao lea e Sara e fālō lemu lima o Brenda i luga o lona ulu e faamalosi ai ona musele. E selu e Sara le lauulu o Brenda ma talatalanoa ma ia a o tautuaina e lona tina isi ona manaoga. Na aoaoina e Sara le taua ma le olioli i le auauna atu i se isi tagata ma malamalama ai e oo lava i se tamaitiiti e mafai ona ia faia se eseesega tele i le olaga o se tagata.
Ou te fiafia i le faataitaiga o tatou mauaina i le mataupu muamua o Luka lea o loo faamatala ai se mafutaga fiafia i le va o Maria, le tina o Iesu, ma lona tausoga o Elisapeta. Na avea Maria ma se tamaitai talavou i le taimi na tau atu ai ia te ia lana misiona ofoofogia ina ia avea ma tina o le Alo o le Atua. I le taimi muamua, atonu na foliga o se tiutetauave mamafa le tauaveina toatasi. Na tuuina atu e le Alii Lava Ia ia Maria se tasi la te tauaveina faatasi lana avega. Na auala mai i le savali a le agelu o Kaperielu, na tuuina atu ai ia Maria le igoa o se tamaitai faatuatuaina ma agaalofa lea e mafai ona ia liliu atu i ai mo le lagolagosua—o lona tausoga o Elisapeta.
Na faasoaina e lenei tamaitai talavou ma lona tausoga o le sa “matuai matua lava,”4 se sootaga masani i a laua maitaga faavavega, ma e mafai ona ou vaai faalemafaufau atu i le taua tele ia i laua uma o masina e tolu sa la faaaluina faatasi a o la talatalanoa faatasi ai, femalamalamaai ma le tasi ma le isi, ma lagolago e le tasi le isi i o laua valaauga tulagaese. O i laua o se faataitaiga matagofie o le fetausiai faatamaitai i le va o augatupulaga eseese.
E mafai e i tatou o e ua matutua teisi atu ona i ai se aafiaga maoae i tupulaga laiti ifo. A o laitiiti lou tina, e leai se tasi o ona matua na malosi i le Lotu. E oo lava i le lima o tausaga, e savali toatasi i le lotu ma auai i ana sauniga—Peraimeri, Aoga Sa, ma le sauniga faamanatuga—e eseese uma taimi.
Sa ou fesili i lou tina talu ai nei pe aisea na ia faia ai lena mea i vaiaso taitasi ae sa na le maua se lagolagosua po o se faamalosiauga mai le aiga. Na ia tali mai: “sa i ai ni ou faiaoga Peraimeri sa alolofa ia te au.” Na popole nei faiaoga ia te ia ma aoao atu ia te ia le talalelei. Na latou aoaoina o ia e i ai sona Tama o i le Lagi e alofa ia te ia ma o lo latou popolega mo ia na ia sau ai i lea vaiaso ma lea vaiaso. Na fai mai lou tina ia te au, “O se tasi na o faatosinaga sili ona taua i le amataga o lo’u olaga.” Ou te faamoemoe o le a mafai ona ou faafetai atu i na uso i se aso! E leai se papupuni o tausaga pe a oo i auaunaga faaKeriso.
O ni nai vaiaso ua mavae atu sa ou feiloai ai i se peresitene o Tamaitai Talavou a le siteki i Kalefonia lea na tau mai ia te au le valaauina talu ai nei o lona tina ua 81 tausaga e avea ma faufautua o le Maea Meite. Sa matua lofituina au, o lea sa ou valaau ai i lona tina. Ina ua talosagaina Sister Val Baker e lona epikopo la te feiloai, sa ia tulimatai atu i le valaauina o ia e avea o se tagata o le potutusi po o le tusi talafaamaumau a le uarota. Ina ua talosagaina o ia e galue o se faufautua o le Maea Meite i Tamaitai Talavou, o lana tali vave atu, “Ua e mautinoa?”
Na tali atu ma le faamaoni lana epikopo, “Sister Baker, e le o sese; o lenei valaauga e mai le Alii.”
Sa ia fai mai e leai se isi ana tali nai lo le, “Ioe.”
Ou te fiafia i le musumusuga na lagona e lenei epikopo i le tele o mea e mafai ona aoao e Maea Meite e toafa o lana uarota mai le tomai, aafiaga, ma faataitaiga o le olaga atoa o lenei uso matua. Ma e mate mai po o ai e alu i ai Sister Baker pe a ia manaomia se fesoasoani i le setiina o lana itulau o le Facebook?
Ou te mafaufau i le fesoasoani sili e mafai ona avea ai uso o le Aualofa i le faafeiloaia o tamaitai talavou lea ua faatoa i ai i Tamaitai Talavou. E masani lava ona lagonaina e o tatou uso talavou le leai o so latou nofoaga po o se mea e tutusa ai ma i latou o i le Aualofa. Ae latou te lei aulia le 18, latou te manaomia taitai o Tamaitai Talavou ma tina o e o le a molimau atu e uiga i faamanuiaga maoae o le Aualofa. Latou te manaomia se lagona naunautai i le avea ai o se vaega o lena faalapotopotoga faamamaluina. Pe a amata ona auai atu tamaitai talavou i le Aualofa, o le mea e sili ona latou manaomia o se uo lea e nofo i ona autafa, o se lima e opoina o latou tauau, ma se avanoa e aoao ma auauna atu ai. Ia tatou taufai aapa uma atu e fesoasoani le tasi i le isi e ala i suiga ma taimi taua o o tatou olaga.
Faafetai i tamaitai uma o le Ekalesia o e o aapa atu i vaitausaga ma aganuu eseese ina ia faamanuiaina ma auauna atu i isi. O loo auauna atu tamaitai talavou i fanau Peraimeri ma tagata matutua. O tamaitai nofofua o soo se vaitausaga o loo faaaluina le tele o taimi e tausia ai manaoga o i latou o loo siomia i latou. Ua tatou iloa le faitau afe o tamaitai talavou o e ua faaaluina ia masina e 18 o o latou olaga e faasoa atu ai le talalelei i le lalolagi. Ua faamautinoa mai nei mea, e pei ona ta’ua e la tatou viiga pele, “O le galuega a agelu lava, ua tuuina mai [i tamaitai].”5
Afai o i ai ni papupuni, o lona uiga o i tatou lava ua faia na papupuni. E tatau ona tatou taofia le taulai atu i o tatou eseesega ae ia vaavaai i mea ua tatou tutusa ai; ona mafai lea ona amata ona tatou iloaina o tatou faamoemoega sili ma ia ausia mea lelei silisili i lenei olaga. Sa saunoa mai Sister Marjorie P. Hinckley i se tasi taimi, “Oka, so tatou manaomiaina o le tasi ma le isi. E manaomia e i matou ua matutua outou o loo talavou. Ma e faamoemoe, e manaomia e outou o talavou nisi o i matou ua matutua. O se tulaga faaagafesootai le manaomia e tamaitai o tamaitai. Tatou te manaomia ni faigauo mafana ma faamalieloto ma le faamaoni o le tasi i le isi.”6 E sao lava Sister Hinckley; oka, so tatou manaomiaina o le tasi ma le isi!
Uso e, e leai se isi vaega o tamaitai i le lalolagi ua mauaina ni faamanuiaga silisili nai lo i tatou o tamaitai o le Au Paia o Aso e Gata Ai. O i tatou o tagata o le Ekalesia a le Alii, ma e tusa lava po o a o tatou tulaga faaletagata lava ia, e mafai ona tatou olioli i faamanuiaga atoatoa o le mana o le perisitua e ala i le tausia o feagaiga ua tatou osia i le papatisoga ma i le malumalu. Ua i ai o tatou perofeta soifua o loo taitaia ma aoaoina i tatou, ma ua tatou olioli i le meaalofa sili o le Agaga Paia, lea o loo galue o se faamafanafana ma se taiala i o tatou olaga. Ua faamanuiaina i tatou ia galulue soosootauau ma tuagane amiotonu a o tatou faamalosia aiga ma auaiga. Ua tatou maua le malosi ma le mana o sauniga o le malumalu ma le anoanoai o isi mea.
E le gata i le faafiafiaina i nei faamanuiaga ofoofogia uma, ua tatou maua le tasi ma le isi—o uso i le talalelei a Iesu Keriso. Ua faamanuiaina i tatou i natura agamalu ma limafoai lea e fesoasoani ia i tatou ia faatino le alofa ma le auaunaga faaKeriso ia i latou o siomia i tatou. A o tatou tagai i tala atu o o tatou eseesega i tausaga, aganuu, ma tulaga ina ia tausia ma auauna le tasi i le isi, o le a faatumulia i tatou i le alofa le pona o Keriso ma musumusuga ia e taitaiina i tatou ina ia iloa ai po o le a le taimi ae po o ai foi e auauna atu i ai.
Ou te tuuina atu ia te outou se valaaulia lea na tuuina atu muamua, e se peresitene aoao o le Aualofa ina ua saunoa atu, “Ou te valaau atu ia te outou ina ia le gata ia alolofa atili i le tasi ma le isi, ae ia sili atu ona loloto le alofa o le tasi i le isi.”7 Tau ina ia tatou iloa lo tatou manaomiaina tele o le tasi ma le isi, ma tau ina ia loloto le alofa o le tasi i le isi, o lau tatalo lea, i le suafa o Iesu Keriso, amene.