Ia Lotofaafetai i Soo Se Tulaga
Pe le o i ai ea ni mafuaaga ia i tatou e faatumulia ai i le lotofaafetai, e tusa lava po o a ni tulaga tatou te oo i ai?
I le gasologa o tausaga ua ou maua ai le avanoa paia e feiloai ai i le tele o tagata o o latou faanoanoaga ua foliga mai ua matua nutimomoia ai o latou agaga. I ia taimi, ou te faalogo atu ai i ou uso ma tuafafine ma faanoanoa faatasi ma i latou e tusa ma a latou avega. Ou te mafaufau loloto po o a ni mea e tau atu ia i latou, ma o le faigata ia ona iloa o le auala e faamafanafana ai ma lagolagoina i latou i o latou tofotofoga.
O le tele lava o lo latou faavauvau e mafua mai ua foliga atu ia i latou o se mutaaga. O nisi o loo feagai ma se mutaaga o se mafutaga faapelepele, e pei o le maliu o sē pele po o le nofo valavala ai ma se tasi o le aiga. O nisi e lagonaina ua feagai ma le mutaaga o le faamoemoe—o le faamoemoe o le faaipoipo po o le faia o ni fanau po o le faatoilaloina o se gasegase. O isi atonu o loo feagai ma le mutaaga o lo latou faatuatua, pe a faaosoosoina i latou e ni faatosinaga fenumiai ma feteenai i le lalolagi ia fesiligia ai, pe lafoaia ai foi mea na latou talitonu muamua i ai e moni.
Pe vave pe tuai foi, ou te talitonu lava tatou te oo uma lava i ni taimi e pei ai ua sese ai mea uma i o tatou olaga, ma tuuatoatasi ai i tatou i le faanoanoa ma le fesesetai.
E mafai ona tupu i soo se tasi. E leai se tasi e puipuia mai ai.
E Mafai Ona Tatou Lotofaafetai
E eseese tulaga mo tagata uma, ma o auiliiliga o olaga taitasi e tulagaese. E ui i lea, ua ou aoaoina o loo i ai se mea na te aveesea le oona lea e ono oo mai i o tatou olaga. O loo i ai se mea e mafai ona tatou faia ina ia suamalie atili ai le olaga, olioli atili, e oo lava i le mamalu.
E mafai ona tatou lotofaafetai!
Atonu e feteenai ma le poto faalelalolagi le fautuaina o se tasi o loo mamafatu i faanoanoaga e tatau ona faafetai atu i le Atua. Ae o i latou e tiaiina le fagu oona ae tago atu i le ipu o le lotofaafetai e mafai ona latou mauaina se vai faamamaina o le faamalologa, filemu, ma le malamalama.
I le avea ai ma soo o Keriso, ua poloaiina i tatou ia “faafetai atu i le Alii [lo tatou] Atua i mea uma,”1 ia “pepese atu ia Ieova i le [faafetai],”2 ma ia “tuu [o tatou] loto ia tumu i le faafetai i le Atua.”3
Aisea ua poloaiina ai i tatou e le Atua ia lotofaafetai?
O Ana poloaiga uma ua tuuina mai ina ia maua ai o tatou faamanuiaga. O poloaiga o avanoa ia e faatino ai lo tatou faitalia ma ia maua ai faamanuiaga. Ua silafia e lo tatou Tama Faalelagi alofa e faapea o le filifili e atiae se agaga o le lotofaafetai o le a aumaia ai ia i tatou le olioli moni ma le fiafia sili.
Ia Lotofaafetai mo Mea [e Maua]
Ae atonu e faapea nisi, “Ou te lotofaafetai mo ni ā o lea e matua lofituina au i faafitauli?”
Masalo o le taulai atu mo mea tatou te lotofaafetai ai o le auala sese lea. E faigata ona atiae se agaga o le lotofaafetai pe afai e na o le pau le mea tatou te faafetai ai ua na o faamanuiaga e mafai ona tatou faitauina. E moni lava, e taua le “faitau soo o o tatou faamanuiaga”—ma e iloaina e soo se tasi na faataitaia lenei mea le tele o faamanuiaga—ae ou te le talitonu e faamoemoeina i tatou e le Alii ia tau lē faafetai i taimi o tofotofoga nai lo taimi e tele ai a tatou mea ma faigofie le olaga. O le mea moni, o le tele o maufaasino e le o talanoa i le lotofaafetai mo ni mea ae ua fautua mai se agaga atoa po o se uiga o le lotofaafetai.
E faigofie le lotofaafetai mo ni mea pe a foliga mai ua sologa lelei le olaga. Ae faafefea taimi na pe a tatou le maua ai mea tatou te mananao i ai?
E mafai ona ou fautua atu ia tatou mafaufau i le lotofaafetai o se aga masani, o se ala o le olaga e tutoatasi e aunoa ma le aafia i ni tulaga tatou te oo i ai?” I se isi faaupuga, ou te fautua atu e faapea nai lo le “faafetai mo mea,” ia tatou taulai atu ia “faafetai i o tatou tulaga”—e tusa lava po o a na mea.
O loo i ai se tala ua leva o se ueita na fesili atu i se tagata faatau pe na fiafia i lana taumafataga. Sa tali mai le mālō sa lelei mea uma, ae semanu e lelei atu pe a na latou faateleina ni falaoa. O le aso na sosoo ai, ina ua toe foi atu le alii lea, sa faaluaina e le ueita le aofaiga o falaoa, ma tuu atu ai ia te ia ni fasi falaoa se fa i lo le lua, ae sa lei fiafia lava le tamaloa. O le aso na sosoo ai, na toe faaluaina ai foi e le ueita le falaoa, ae sa le faamanuiaina lava.
O le aso lona fa, sa naunau moni ai lava le ueita e faafiafia le tamaloa. Ma o lea sa ia avatu ai le papa falaoa e iva futu (2.7-m) le umi, tipi lua, ma faatasi ai ma si ana ataata, sa ia tuu atu ai i le tagata lea. Sa matua naunau le ueita e fia vaai po o le a se tali mai a le tamaloa.
Ina ua maea le taumafataga, sa tepa atu le tamaloa i luga ma faapea atu, “O loo lelei lava e pei ona masani ai. Ae ou te vaai atu ua e toe foi lava i fasi falaoa e lua.”
Ia Lotofaafetai i o Tatou Tulaga
Uso e ma tuafafine pele, o tatou e faia filifiliga. E mafai ona tatou filifili e faatapulaa lo tatou lotofaafetai, e tusa ai ma faamanuiaga tatou te lagonaina ua le maua. Pe mafai foi ona tatou filifili ia pei o Nifae, o le sa le faavaivai lona lotofaafetai. Ina ua saisai o ia e ona uso i luga o le vaa—lea sa ia fauina e ave ai i latou i le nuu folafolaina—sa matua tiga lava ona tapuvae ma tapulima “sa fulafula tetele lava” faapea ai ma se matagi malosi na taufaamatauina le tofatumoanaina o ia i le loloto o le sami. “E ui i lea,” sa fai mai Nifae, “Sa ou tepa taulai a’e i lo’u Atua, ma sa ou viia o ia i le aso atoa; ma sa ou le muimui e faasaga i le Alii ona o o’u puapuaga.”4
E mafai ona tatou filifili ia pei o Iopu, o le na foliga mai na i ai mea uma ae na toe maumau uma. Ae sa tali atu lava Iopu i le faapea atu, “Na ou sau le lavalava mai le manava o lo’u tina, o le a ou foi atu … [ma le] le lavalava; na foaiina mai e Ieova, ua aveeseina foi e Ieova; ia faamanuina le suafa o Ieova.”5
E mafai ona tatou filifili ia pei o paionia Mamona, o e na faatumauina se agaga o le lotofaafetai i le taimi o la latou malaga telegese ma mafatia sa agai atu i le vanu Tele o Sate Leki, e oo lava i pesega ma siva ma viiga i le lelei o le Atua.6 O le toatele o i tatou [pe ana ō ai] semanu e lagonaina le le fiafia, faitio, ma le faalogologotiga i faigata o le malaga.
E mafai ona tatou filifili e pei o le Perofeta o Iosefa Samita, o lē a o avea ma se pagota i tulaga faanoanoa i le Falepuipui o Lipereti, na tusiaina nei upu musuia: “Le au uso pele e, ia tatou faia ai ma le fiafia mea uma ua i ai lo tatou mana; ona mafai lea ona tatou tutu ma le mautinoa atoatoa, e vaai i le faaolataga a le Atua, ma mo lona aao e faaali mai.”7
E mafai ona tatou filifili ina ia lotofaafetai, e tusa lava po o le a.
O lenei ituaiga o lotofaafetai e mafai ona i ai i soo se taimi e tusa lava po o le a le mea o tupu i o tatou talaane. E sili atu i lo le ita, lotovaivai, ma le faanoanoa. E fuga pea ma le matagofie i taimi e sou ai le tai faapena foi ma le taimi e malū ai.
A tatou lotofaafetai i le Atua i o tatou tulaga, e mafai ona tatou lagonaina le filemu toafimalie i le lotolotoi o faigata. I taimi o faanoanoaga, e mafai lava ona sii ae o tatou loto i viiga. I o tatou tiga, e mafai lava ona tatou viia le Togiola a Keriso. A tatou lagonaina le matuitui o tiga, e mafai lava ona tatou lagonaina le mafanafana ma le filemu o le pa’i mai o le lagi.
O nisi taimi tatou te manatu ai o le lotofaafetai o le mea lea tatou te faia pe a mavae ona foia o tatou faafitauli, ae e papa’u tele lena manatu. E tele naua mea tatou te misia o le olaga pe a tatou faatalitali ia vaai atu i se nuanua a o lei faafetai atu i le Atua mo le timu?
O le lotofaafetai i taimi o le faanoanoa e le faapea ua tatou fiafia ai i o tatou tulaga. E le faapea foi o le a faaaoga ai lo tatou faatuatua e faapasi ai la tatou vaai i o tatou luitau o loo i ai i lena taimi.
E le o le lotofaafetai lenei ua na o laugutu ae o le agaga. O se lotofaafetai lea e faamaloloina ai o tatou lagona tiga ma musuia ai o tatou mafaufau.
O Le Lotofaafetai o se Faatinoga o le Faatuatua
O le lotofaafetai i o tatou tulaga o se faatinoga o le faatuatua i le Atua. E manaomia ai lo tatou faatuatuaina o le Atua ma le faamoemoe mo mea e le o mafai ona tatou vaaia ae ua moni.8 E ala i le lotofaafetai, tatou te mulimuli ai i le faataitaiga o lo tatou Faaola pele, lea na fetalai mai, “Ia aua ne’i faia lo’u loto, a o lou finagalo.”9
O le lotofaafetai moni o se faailoaga lea o le faamoemoe ma le molimau. E sau mai le faailoaina atu tatou te le malamalama i taimi uma i tofotofoga o le olaga ae faatuatuaina lava o le a i ai se aso tatou te malamalama ai.
I soo se tulaga lava, o lo tatou lagonaina o le lotofaafetai e faafaileleina i le tele o upumoni paia tatou te iloaina: e faapea ua tuu mai e lo tatou Tama i Ana fanau le fuafuaga sili o le fiafia, e auala mai i le Togiola a Lona Alo, o Iesu Keriso, e mafai ona tatou ola ai e faavavau faatasi ma e pele ia i tatou; ma i le iuga, o le a tatou mauaina ni tino mamalu, atoatoa, ma ola pea, ua le toe mafatia i ma’i ma le le atoatoa; ma o le a suitulagaina o tatou loimata o le faanoanoa i le anoanoai o le fiafia ma le olioli, “le fua lelei, e lolomi ma luluina, e tumu ma [taumasuasua].”10
Masalo e tai faapea se ituaiga o molimau na liua ai Aposetolo a le Faaola mai ni alii matata’u ma masalosalo, i ni avefeau totoa ma olioli a le Matai. I ni nai itula na sosoo ai ma Lona faasatauroga, sa lofituina i latou i le faanoanoa ma le faavauvau, na le mafai ai ona malamalama i le mea faatoa tupu. Ae tasi lava le mea na tupu na suia uma ai na mea. Na faaali atu lo latou Alii ia i latou ma tautino atu, “Ia outou vaavaai mai i o’u lima ma o’u vae, aua o a’u lava lenei.”11
Ina ua iloaina e le au Aposetolo le Keriso toetu—ina ua latou vaai i le toetu mamalu o lo latou Faaola pele—na avea i latou ma ni tamalii uiga ese. Sa leai ma se mea na taofia i latou mai le faataunuuina o la latou misiona. Sa latou taliaina ma le lototele ma le naunautai le sauaina, faamaasiasia, e oo lava i le oti lea o le a oo atu ia i latou ona o la latou molimau.12 Sa lei taofia i latou mai le vivii atu ma le auauna atu i lo latou Alii. Sa latou suia ai olaga o tagata i soo se mea. Sa latou suia ai le lalolagi.
E le manaomia ona e vaai i le Faaola, e pei ona vaai ai le au Aposetolo, ina ia oo ai i sea liua lava e tasi. O lau molimau ia Keriso, lea e fanau mai i le Agaga Paia, e mafai ona fesoasoani ia te oe ia laaloa ai lau vaai i taunuuga lē fiafia i le olaga faaletino ae vaai atu i le lumanai manuia lea ua uma ona saunia e le Togiola o le lalolagi.
E Le i Foafoaina i Tatou mo ni Mutaaga
E tusa ai ma mea ua tatou malamalama i ai e faatatau i lo tatou taunuuga e faavavau, ua manino ai o soo se taimi lava tatou te fetaiai ai ma ni taunuuga oona o le olaga, e foliga mai lava tatou te le taliaina. E foliga mai o loo i ai se mea i o tatou loto o loo teenaina ia taunuuga.
Aisea e tupu ai lenei mea? Ona ua faia i tatou i elemene o le faavavau. O i tatou o tagata faavavau, o fanau o le Atua Silisiliese, o lona suafa e le Gata13 ma o le ua folafolaina mai faamanuiaga e faavavau e le mafaitaulia. O mutaaga e le o lo tatou taunuuga lena.
O le faatele ona tatou aoao e uiga i le talalelei a Iesu Keriso, o le faatele foi lena ona tatou iloaina o mutaaga iinei i le olaga faaletino e le o mutaaga ia o mea uma. O na mea ua na o ni mea faalavefau—o taofiga le tumau ia o le a i ai se aso e foliga ai e faatauvaa pe a faatusatusa atu i le olioli e faavavau o loo faatalitali mai mo e faamaoni.
Ou te matua faafetai lava i lou Tama Faalelagi ona i Lana fuafuaga e le o i ai ni mutaaga le moni, ua na o ni amataga e leai se iuga.
O i Latou e Lotofaafetai O Le A Faamamaluina
Uso e ma tuafafine, pe le o i ai ea ni mafuaaga ia i tatou e faatumulia ai i le lotofaafetai, e tusa lava po o a ni tulaga tatou te oo i ai?
Tatou te manaomia ea se isi mafuaaga sili atu ia tuu atu ai o tatou loto “ia tumu i le faafetai i le Atua”?14
“Pe le o ia i tatou ea se mafuaaga sili tatou te olioli ai?”15
E matua faamanuiaina lava i tatou pe a tatou faailoaina galuega alofilima o le Atua i o tatou olaga ofoofogia. O le lotofaafetai i lo tatou Tama i le Lagi e faalauteleina ai la tatou vaai ma manino ai lo tatou malamalama. Na te musuiaina le lotomaualalo ma faafaileleina le tigaalofa i o tatou uso a tagata faapea ai ma foafoaga uma a le Atua. O le lotofaafetai o se vaega taua o uiga paia uma faaKeriso! O le lotofaafetai o le tina lea o amioga mama uma.16
Ua tuuina mai e le Alii ia i tatou Lana folafolaga e faapea o i latou “o [e] e taliaina mea uma ma le faafetai o le a faamamaluina; ma o mea o le lalolagi lenei o le a faaopoopoina ia te [i latou], i le sautuaselau lava, ioe, e sili atu.”17
Tau ina tatou “ola i le faafetai i aso uma”18—aemaise lava i taimi ua foliga mai ai ua oo mai mutaaga le mafaamatalaina o vaega o le olaga faaletino. Tau ina ia tatou faatagaina o tatou agaga ia faatumuina i le faafetai i lo tatou Tama Faalelagi alofa mutimutivale. Tau ina ia tatou sii atu e le aunoa o tatou leo ma faaali atu i upu ma galuega lo tatou lotofaafetai i lo tatou Tama i le Lagi ma Lona Alo Pele, o Iesu Keriso. Ou te tatalo ai, ma tuu atu ai lau molimau ma faamanuiaga, i le suafa o lo tatou Matai, o Iesu Keriso, amene.