John S. Tanner

Fesoasoani Muamua i le Au Peresitene Aoao o le Aoga Sa

Mai lona tamaitiiti, na maua e John Sears Tanner le olioli i le aoaoina.

Na faalautele atu lena fiafia i lana aoga, matata, ma le tele o ona avanoa e aoao atu ai le talalelei: muamua i le avea ai ma se faifeautalai i le Misiona a Pasila i Saute ma avea ai ma se epikopo, peresitene o le siteki, fautua maualuga, faiaoga o Aoaoga Faavae o le Talalelei, peresitene o le Misiona a Pasila São Paulo i Saute (lea e faaiuina i le taumafanafana lenei), ma i le taimi nei o le fesoasoani muamua i le au peresitene aoao o le Aoga Sa.

“Afai e sao le [aoao atu], e i ai le Agaga Paia iina ma e te lagona le fiafia o le aoaoina; e te lagona e pei o e i ai i luga o se nofoaga paia,” o le tala lea a Peresitene Tanner.

Na fanau i le Aai o Sate Leki, Iuta, i le aso 27 o Iulai, 1950, ia William Coats Tanner Jr. ma Athelia Sears Tanner, o Peresitene Tanner na tuputupu ae i Pasadena i Saute, Kalefonia, ISA, o le lona lima o le fanau e toa 13. Na fatuina e ona matua se siosiomaga oa i totonu o le aiga, e aofia ai se autu malosi o le talalelei. “Ou te le manatua le aoaoina o se isi lava mea i le lotu ou te lei aoaoina mai le fale,” o lana tala lea. Sa ia atiina ae ai foi se faamemelo atu mo tusi lea sa ai tausia ao tulimatai atu i se faailoga o le gagana Peretania mai le Iunivesite o Polika Iaga ma se faailoga faafomai i le gagana Peretania i le Iunivesite o Kalefonia, Berkeley.

Ao i ai i BYU, sa ia feiloai ai ia Susan Winder. Na atiina ae e le toalua se faauoga malosi lea sa la fausia mulimuli ane ai se mafutaga mafana. Sa la faaipoipo i le Malumalu o Sate Leki i le 1974. Na la tausia faatasi se fanau e toalima.

Sa amata e Peresitene Tanner lana galuega faaleaoaoga i le avea ai ma se polofesa lagolago i le Iunivesite o le Setete o Florida. Na avea o ia ma se tasi o faiaoga i le BYU i le 1982; sa ia faigaluega iina talu mai lena taimi o se fesoasoani, paaga, ma polofesa o le gagana Peretania, ma o le taitaifono o le matagaluega ma sui peresitene o le aoga.

Na fai mai o ia, o le vaega sili ona taua o le aoaoina o le talalelei, e sau lea mai se mea sa ia aoaoina vave i lana matata: o le aoaoina e le tatau ona sau mai se nofoaga o le fefe po o le faamaualuga ae mai se nofoaga o le alofa— mai le alofa moni, o le alofa mama o Keriso.