O Le Avega Faafiafiaina o le Avea ma Soo
O le lagolagoina o o tatou taitai o se faamanuiaga; e vaavaalua mai ma se tiutetauave patino ina ia fefaasoaai a latou avega ma ia avea ma soo o le Alii o Iesu Keriso.
I le aso 20 o Me o le tausaga ua tea, sa matua faaleagaina ai e se asiosio maoae nuu i tua o le Aai o Okalahoma, i le vaega tutotonu o Amerika, ma pei na sua ai se auala e silia ma le maila (1.6 km) le lautele ma le 17 maila (27 km) le umi. O lenei afa, o se osofaiga o asiosio matautia, na suia ai le faataatiaga o le laueleele ma olaga o tagata na aafia i lona ala matagi.
I le na o le vaiaso talu ona mavae le afa matautia, sa tofia ai au e asiasi i le eria lea na i ai fale na solo i lalo ma meatotino na felelei solo i nuu na matua faaleagaina.
Ae ou te lei alu, sa ou talanoa ma lo tatou perofeta pele, o Peresitene Thomas S. Monson, lea e fiafia tele e fai nei feau mo le Alii. Faatasi ai ma le faaaloalo e le gata i lona tofi ae faapea foi i lona agalelei, sa ou fesili ai, “O le a se mea e te finagalo ou te faia? O le a se mea e te finagalo ou te tau atu?”
Sa ia uu atu lo’u lima ma le agalelei, lea semanu na te faia foi i tagata taitasi ua mafatia ma tagata taitoatasi o le a fesoasoani atu i le faalavelave pe ana i ai o ia iina, ma fai mai:
“Muamua, tau atu ia i latou ou te alofa ia i latou.
“Lua, tau atu ia i latou o loo ou tatalo mo i latou.
“Tolu, faamolemole faafetai atu ia i latou uma o loo fesoasoani.”
I le avea ai ma se tasi o le Au Peresitene o Fitugafulu, na mafai ona ou lagonaina le avega i ou tauau i upu na fetalai ai le Alii ia Mose:
“Ina faapotopoto mai ia ia te au o tagata e toafitugafulu o toeaina o Isaraelu o e ua e iloa lava o toeaina i latou o le nuu ma o latou faipule; …
“Ona ou alu ifo ai lea ta te tautala ma oe i lea mea: ou te avae foi nisi o le agaga o loo ia te oe [Mose], ma ou tuuina atu ia te i latou; ona latou tauave ai lea faatasi ma oe le avega o le nuu ina ia e le avea toatasi.”1
O upu nei mai aso anamua, peitai e lei suia lava ala o le Alii.
I le taimi nei i le Ekalesia, ua valaauina e le Alii ni Fitugafulu e 317, o loo galulue i ni korama se 8, e fesoasoani i Aposetolo e Toasefululua i le tauaveina o le avega ua tuuina i luga o le Au Peresitene Sili. Ou te lagonaina ma le fiafia lena tiutetauave i le taele o lou lava agaga, e pei foi o ou Uso. Peitai e le na o i tatou o loo fesoasoani i lenei galuega mamalu. I le avea ai ma tagata o le Ekalesia i le lalolagi atoa, ua tatou maua uma le avanoa matagofie o le faamanuiaina o olaga o isi.
Sa ou aoaoina mai lo tatou perofeta pele le mea na manaomia e tagata na mafatia i le afa—o le alofa, tatalo, ma le agaga faafetai mo lima fesoasoani.
I lenei aoauli o le a taitasi i tatou ma siiina o tatou lima taumatau i le sikuea ma lagolagoina le Au Peresitene Sili ma le Korama a Aposetolo e Toasefululua o ni perofeta, tagatavaai, ma talifaaaliga o Le Ekalesia a Iesu Keriso o le Au Paia o Aso e Gata Ai. O lenei mea ua le na o se faiga faatulagaina, pe o se mea ua faapolopolo mo i latou e valaauina i tofiga aoao. O le lagolagoina o o tatou taitai o se faamanuiaga; e vaavaalua mai ma se tiutetauave patino ina ia fefaasoaai a latou avega ma ia avea ma soo o le Alii o Iesu Keriso.
Na saunoa mai Peresitene Monson:
“Ua siomia i tatou e i latou e manaomia lo tatou gauai atu, la tatou faamalosiau atu, la tatou lagolago, la tatou faamafanafana, lo tatou agalelei—pe o nisi o le aiga, uo, paaga, po o ni tagata ese. O i tatou o aao o le Alii i luga o le fogaeleele, faatasi ai ma le poloaiga e auauna atu ma ia sii ae Ana fanau. O loo faalagolago mai o Ia ia i tatou taitoatasi. …
“‘… Aua na faia e outou i le tasi o e aupito itiiti o ou uso nei … , o au lea na outou faia i ai.’ [Mataio 25:40].”2
Pe o le a tatou tali atu ea ma le alofa pe a tatou mauaina se avanoa e fai ai se asiasiga, po o se valaau i le telefoni, tusi se tusi, po o le faaalu o se aso e taulima ai manaoga o se isi tagata? Pe o le a tatou faapei o le alii talavou lea na faailoa atu ua mulimuli i poloaiga uma a le Atua:
“Ua ou tausia na mea uma talu ina ou itiiti: se a se mea o toe ou te lei faia?
“Ua tali atu Iesu ia te ia, Afai e te manao ina ia atoatoa ona lelei o lau amio, ia e alu ma e faatau atu au mea, i le e avatau ai i e matitiva, ona ia te oe lea o le faulaigaoloa i le lagi, i le e sau ma mulimuli mai ia te au.”3
Na valaauina le alii talavou i se auaunaga sili atu i le itu o le Alii e faia le galuega o le malo o le Atua i le lalolagi, ae peitai sa ia alu ese, “aua e tele lava ana mea.”4
O le a se taua o a tatou meatotino faalelalolagi? Ua tatou vaai i le mea e mafai ona faia e se asiosio i na mea i ni nai minute. E taua tele mo i tatou taitoatasi le taumafai ina ia teuina a tatou oa faaleagaga i le lagi—e faaaoga ai o tatou taimi, taleni, ma le faitalia e auauna ai i le Atua.
O loo faaauau pea ona tuuina mai e Iesu Keriso le valaau “Sau ma mulimuli mai ia te au.”5 Sa Ia savalia Lona nuu faatasi ma Ona soo i se aga le manatu faapito. O loo faaauau pea ona Ia savali faatasi ma i tatou, tu mo i tatou, ma taitai i tatou. O le mulimuli i Lana faataitaiga atoatoa o lona uiga o le iloa lea ma faamamalu le Faaola, o le na tauaveina a tatou avega uma e ala i Lana Togiola paia ma faaolaina, o le galuega tupito lea o le auauna atu. O le mea o loo Ia aioi mai ia i tatou taitoatasi ia mafai ma naunau e tauave ma le fiafia le “avega” o le avea ma soo.
A o i ai i Okalahoma sa ou maua le avanoa e feiloai ai i nai aiga na matua lofituina e le asiosio malosi. A o ou asia le aiga o Sorrels, sa ou matua ootia lava i le mea na oo i lo la afafine, o Tori, a o i le vasega lima i lena taimi i le Aoga Maualalo o Plaza Towers. O loo tatou faatasi ai iinei ma ia ma lona tina i le asō.
Na faapupuu Tori ma se vaega o ana uo i le faleletaua mo se lafitaga a o osofaia e le asiosio le aoga. Faafofoga a o ou faitau atua upu a Tori lava ia i le tala o lena aso:
“Sa ou faalogo i se mea o tau i le taualuga. Sa ou faapea ua na o se faailo. Na faasolo ina leotele. Sa ou faia se tatalo ina ia puipui ma tausia saogalemu i matou uma e le Tama Faalelagi. Na faafuasei lava ona matou faalogoina se pa’o leotele e pei o se masini mimiti otaota, ma na nimo ese le taualuga i luga ae o o matou ulu. Sa matua tele le savili ma otaota na felelei solo ma taia ai lo’u tino atoa. Sa pogisa atu fafo ma na foliga mai ua pouliuli le lagi, ae leai—o totonu lea o le asiosio. Sa na o lo’u moeiini ma faamoemoe ma tatalo o le a vave ona mouese atu.
“Na faafuasei lava ona filemu.
“Ina ua ou pupula atu, sa ou vaaia se laupapa faailo taofi i luma tonu o ou mata! Na toeitiiti lava a pai i lou isu.”6
O Tori, lona tina, ma ona tei e toatolu, ma le tele o uo, ia na latou i ai foi faatasi i le aoga, na faasaoina faavavega mai i lena asiosio; ae toafitu a latou uo aoga sa lei faasaoina.
I le faaiuga o lena vaiaso na faia ai e uso perisitua le tele o faamanuiaga i tagata na mafatia i le afa. Sa faamaualaloina au e tuu atu se faamanuiaga ia Tori. A o ou tuuina ou lima i luga o lona ulu, na oo mai i lou mafaufau se mau ou te fiafia lava i ai: “O le a Ou alu muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma sio faataamilo outou e au agelu, e sapasapai outou i luga.”7
Sa ou fautuaina Tori ina ia manatua le aso na faaee atu ai e se auauna a le Alii ona lima i luga o lona ulu ma folafola atu o le a puipuia o ia e agelu i le afa.
O le aapa atu o le tasi e laveai mai le isi, i soo se tulaga, o se fuataga faavavau lea o le alofa. O le auaunaga lea sa ou molimauina i Okalahoma i lena vaiaso.
E tele lava, ina tatou maua le avanoa e fesoasoani ai i isi i o latou taimi o mafatiaga. I le avea ai ma tagata o le Ekalesia, ua tofu maua uma e i tatou le tiutetauave paia “e tauave avega a le tasi, ina ia mama,”8 “e faanoanoa faatasi ma e e faanoanoa,”9 ma ia “sii i luga lima ua tautau i lalo, ma faamalosi tulivae ua vaivai.”10
Uso e ma tuafafine, ua matuai faafetai le Alii mo outou taitoatasi, mo itula lemafaitaulia ma auaunaga faatino, pe tele pe itiiti, ua tou tuuina atu ma le lotofoai ma le agalelei i aso taitasi.
Na aoao mai le Tupu o Peniamina i le Tusi a Mamona, “Pe a outou auauna atu i o outou uso-a-tagata, ua nao lo outou auauna atu lava lea i lo outou Atua.”11
O le taulai atu i le auauna atu i o tatou uso ma tuafafine e mafai ona taitai atu ai i tatou i le faia o ni faaiuga paia i o tatou olaga i aso uma ma saunia ai i tatou e faataua ma fiafia i mea e fiafia i ai le Alii. O le faia o lea mea, tatou te molimauina ai i o tatou lava olaga o i tatou o Ona so’o. A tatou punouai i Lana galuega, tatou te lagonaina le faatasi mai o Lona Agaga ma i tatou. Tatou te tuputupu ae i le molimau, faatuatua, talitonu, ma le alofa.
Ou te iloa o loo soifua lou Togiola, o Iesu Keriso; ma o loo Ia fetalai mai ma ala mai i Lana perofeta pele, o Peresitene Thomas S. Monson, i o tatou nei aso.
Tau ina ia tatou maua uma le olioli lea e sau mai auaunaga paia o le tauaveina o avega a le tasi ma le isi, e oo lava i na avega faatauvaa ma itiiti, o lau tatalo lea i le suafa o Iesu Keriso, amene.