Tauave ma le Faigofie a Latou Avega
O avega tulagaese i o tatou olaga taitoatasi ua fesoasoani lea ia i tatou e faalagolago atu ai i le amiotonu, alofa mutimutivale, ma le alofa tunoa o le Mesia Paia.
E i ai sau uo mamae, i le popofou o lana faaipoipoga, sa faatalitonuina o ia ma lona aiga e manaomia sana taavale pikiapu fa uili. Na mautinoa lava e lona toalua na te le manaomiaina ae sa na o le fia manao i se taavale fou. O se talanoaga fiamalie i le va o lenei tane ma le ava na uunaia ai i laua e toe iloilo tulaga lelei ma tulaga le lelei o le faatauina o le taavale.
“Lau pele, ta te manaomia se pikiapu fa uili.”
Sa fesili atu lona toalua, “Aisea ta te manaomia ai se pikiapu fou?”
Sa ia taliina lana fesili i se tali na ia talitonu o se tali atoatoa lea. “Ae faafefea pe a ta manaomia se susu mo le ta fanau i se afa matautia, ma e pau lava le auala ou te oo ai i le faleoloa o se pikiapu?”
Na tali mai ma le ataata lona toalua, “Afai ta te faatauina se pikiapu fou, o le a leai se ta tupe mo se susu—aisea la ta te popole ai e o i le faleoloa i le taimi o se faalavelave faafuasei!”
Sa umi se taimi sa faaauau ai pea ona la fefautuaai faatasi ma na iu lava ina filifili e faatau le pikiapu. E lei leva ona faatauina le taavale fou, ae manao lau uo e faaali mai le aoga o le pikiapu ma faamaonia mai ana mafuaaga mo le manao e faatau. O lea sa tonu ai ia te ia e tata ma uta se sapalai o fafie mo le latou aiga. O le taimi lea o le tautoulu o le tausaga, ma ua amata ona toulu le kiona i luga o mauga lea sa ia naunau ai e saili ni fafie. A o ia tietie atu i luga o le mauga, na faasolo mafiafia le kiona. Na iloaina e lau uo ua tulaga lamatia le auala ona o le maseesee, ae ona o le talitonuina tele o le pikiapu fou, sa ia alu ai pea.
O le mea e faanoanoa ai, sa mamao tele le mea na alu i ai auala aisā. Ina ua ia seu i tua lana taavale mai le auala e alu ai i le nofoaga na ia fuafua e tata ai fafie, sa mau ai loa o ia iina. Na vivili uma pau fou e fa o le pikiapu i le aisa. Sa vave ona ia iloa ua ia leiloaina se mea e fai aluese mai ai i lenei tulaga matautia. Sa maasiasi ma popole o ia.
Na tonu i lau uo, “Ia, e le na o lou saofai ai iinei.” Sa ia oso i fafo mai le taavale ma amata ona tata ia fafie. Sa ia faatumuina atoa tua o le pikiapu i se uta mamafa. Ona filifili loa lea o lau uo o le a ia toe taumafai tasi lava e aveina mai le taavale mai fafo o le kiona. Ina ua ia faaolaina le taavale ma amata ona aveina, na amata ona minoi lemu atu i luma. Na agaigai lemu ese atu le pikiapu mai le kiona ma toe foi ai i le auala. Mulimuli ane sa saoloto ai o ia e alu i le fale, o se tagata fiafia ma faamaualaloina.
O A Tatou Lava Avega
Ou te tatalo mo le fesoasoaniga a le Agaga Paia a o ou faamamafaina atu ni lesona taua lea e mafai ona aoao mai i lenei tala e uiga i lau uo, le pikiapu, ma fafie. O le uta. O le uta fafie lea sa maua ai le malosi na manaomia e aluese mai ai mai le kiona, e toe foi ai i le auala, ma agai atu ai i luma. O le uta lea na mafai ai e ia ona toe foi i lona aiga ma lona fale.
Ua tofu i tatou ma se avega o tauave. E aofia ia tatou lava avega ia manaoga ma avanoa, matafaioi ma āiā, mafatiaga ma faamanuiaga, ma filifiliga ma tapulaa. O fesili taiala nei e lua e mafai ona fesoasoani a o tatou iloiloina i nisi o taimi ma le agaga tatalo a tatou avega: “Mata o le avega o ou tauaveina o maua mai ai le malosi faaleagaga o le a mafai ai ona ou fetaomi atu i luma ma le faatuatua ia Keriso i luga o le auala lauitiiti ma le vaapiapi ma aloese mai ai i le le alualu i luma? Mata o le avega o ou tauaveina o fatuina ai ia lava le malosi faaleagaga ina ia mafai ai ona ou toe foi i le aiga i le Tama Faalelagi?”
O nisi taimi atonu tatou te talitonu sese ai e faapea, o le fiafia o le leai lea o se avega. Ae o le tauaveina o se avega o se vaega manaomia ma le taua lea o le fuafuaga o le fiafia. Talu ai o a tatou avega taitoatasi e manaomia ona faatupuina ai le malosi faaleagaga, o lea e tatau ai ona tatou faaeteete ia aua nei avea ma se vaega o o tatou olaga le tele o mea mananaia ae le manaomia lea o loo faalavefau ia i tatou ma aveesea ai i tatou mai i mea e sili ona taua moni.
O Le Mana Faamalosi o le Togiola
Na fetalai le Faaola:
“Ia outou o mai ia te au, o outou uma o e tigaina ma mafatia i avega, o a’u foi e malolo ai outou.”
“Ia outou amoina la’u amo, ma ia outou faaaoao ia te au, aua o a’u le agamalu ma le loto maualalo: ona maua lea e outou o le malologa mo outou agaga.”
“Aua e avegofie la’u amo, o la’u avega foi e mama ia” (Mataio 11:28–30).
O le amo o se pou laupapa, e masani lava ona faaaogaina i le va o ni povi se lua po o nisi manu lea e mafai ai ona la tosoina faatasi se avega. O le amo e tuufaatasia ai ni manu ina ia mafai ona la galulue faatasi ma faataunuuina ai se galuega.
Mafaufau i le valaaulia uigaese a le Alii mo tagata taitoatasi ina ia “outou amoina la’u amo.” O le osia ma le tausia o feagaiga paia e tuufaatasia ai i tatou ma le Alii o Iesu Keriso. O le mea moni lava, o loo augani mai le Faaola ia i tatou ina ia faalagolago atu ma tatou galulue faatasi ma Ia, e ui lava o a tatou taumafaiga silisili e le tutusa ma e le mafai ona faatusalia ia te Ia. A o tatou faalagolago atu [ia te Ia] ma tosoina faatasi a tatou avega ma Ia i le malaga o le olaga nei, e moni lava e avegofie Lana amo, o Lana avega foi e mama ia.
E le o tuua na o i tatou ma e le tatau ona tuua na o i tatou. E mafai ona tatou fetaomi atu i luma i o tatou olaga i aso taitasi faatasi ai ma le fesoasoani faalelagi. E auala mai i le Togiola a le Faaola tatou te mafai ai ona maua le gafatia ma le “malosi i [lo tatou lava] mana” (“Faaola e ia Ou Alofa,” Viiga, nu. 150). E pei ona folafola mai e le Alii, “O lea, ia faaauau pea la oulua malaga ma ia olioli o oulua loto; aua faauta, ma tagai, Ou te faatasi ma oulua e oo lava i le iuga” (MF&F 100:12).
Mafaufau i le faataitaiga i le Tusi a Mamona lea na sauaina ai e Amulona ia Alema ma lona nuu. Na oo mai le siufofoga o le Alii i nei soo i o latou puapuaga: “Ina ea ia o outou ulu ma ia faamafanafanaina outou, ona ua Ou iloa le feagaiga na outou faia mai ia te au; ma o le a Ou osifeagaiga ma o’u tagata ma laveai i latou mai le pologa” (Mosaea 24:13).
Ia matauina le taua o feagaiga i le folafolaga o le laveaiina. O feagaiga e mauaina ma faamamaluina i le amiosa’o faapea ma sauniga e faatinoina i le pule tatau ai o le perisitua, e taua lea ina ia maua ai faamanuiaga uma ua avanoa e ala mai i le Togiola a Iesu Keriso. Ma o ona sauniga o le perisitua, ua faaalia mai ai le mana faaleatua i alii ma tamaitai i la le tino, e aofia ai faamanuiaga o le Togiola (tagai MF&F 84:20–21).
Toe mafaufau i le fetalaiga a le Faaola “Aua e avegofie la’u amo, o la’u avega foi e mama ia” (Mataio 11:30) a o tatou mafaufau i le fuaiupu e sosoo ai i le tala ia Alema ma lona nuu.
“Ma o le a Ou faamamaina foi avega ua tuu i o outou tauau, e oo ia te outou tou te le lagonaina i latou i luga o o outou tua” (Mosaea 24:14).
O le toatele o i tatou e ono mafaufau o lenei mau o loo fautua mai ai le aveesea faafuasei ma tumau o se avega. Peitai, o le fuaiupu o loo sosoo ai o loo faamatalaina ai le auala na faamama ai le avega.
“Ma o lenei sa oo ina faamamaina avega sa tuu i luga o Alema ma ona uso; ioe, sa faamalosia i latou e le Alii ina ia mafai ona latou tauave ma le faigofie a latou avega, ma sa latou gauai atu ma le fiafia ma le onosai i le finagalo atoa o le Alii” (Mosaea 24:15; faaopoopo le faamamafa).
E lei vave ona aveesea ia avega ma faigata mai le nuu. Peitai na faamalosia Alema ma ona soo, ma o le faateleina o lo latou malosi na faamamaina ai avega. Na faamalosia nei tagata lelei e ala i le Togiola ina ia galulue o ni auauna (tagai MF&F 58:26–29) ma aa fia ai o latou tulaga. Ma o “le malosi o le Alii” (Upu a Mamona 1:14; Mosaea 9:17; 10:10; Alema 20:4), na taitaia ai ma le saogalemu ai Alema ma lona nuu i le laueleele o Sara’emila.
E le gata o le Togiola a Iesu Keriso e faatoilaloina ai aafiaga o le Pa’ū o Atamu ma mafai ai ona faamagaloina a tatou lava agasala ma solitulafono, ae o Lana Togiola foi ua mafai ai ona tatou faia mea lelei ma avea ai ma tagata sili ona lelei i ni auala e le oo i ai lo tatou gafatia faaletino. Ua silafia e le toatele o i tatou afai tatou te faia se mea sese ma manaomia le fesoasoani e faatoilalo ai aafiaga o le agasala i o tatou olaga, o le Faaola e mafai ai e i tatou ona mama e ala i Lona mana togiola. Ae, pe ua tatou malamalama foi o le Togiola e mo alii ma tamaitai faamaoni o e usiusitai, agavaa, ma filiga ma ē o loo taumafai ina ia lelei atu ma auauna atu ma le faamaoni sili atu? Ou te mafaufau lava pe ua tatou toilalo e iloa atoatoa lenei vaega faamalosia o le Togiola i o tatou olaga ma le talitonuga sese e tatau ona tatou amoina na o i tatou a tatou avega—e ala i lo tatou lava naunautai, finafinau, ma le lotopulea, faapea ai ma le iloagofie o o tatou gafatia faatapulaaina.
O le tasi o mea e ao ona iloa, sa afio mai Iesu Keriso i le lalolagi e maliu mo i tatou. Ae e tatau foi ona tatou talisapaia le finagalo o le Alii, e ala i Lana Togiola ma e ala mai i le mana o le Agaga Paia, ia ola i totonu ia i tatou—e le gata ia taitaia i tatou ae ia faamalosia foi ma faamaloloina ai i tatou.
E Fesoasoani le Faaola i Lona Nuu
Ua faamatala mai e Alema le mafuaaga ma le auala e mafai ai ona fesoasoani le Faaola ia i tatou:
“Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu ua fai mai, o le a ia ave i ona luga tiga ma ma’i o ona tagata.
“Ma o le a ia ave i ona luga le oti, ina ia mafai ona ia tatalaina fusi o le oti ia ua noatia ai ona tagata; ma o le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale, e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ma o latou vaivaiga” (Alema 7:11–12).
O lea, e le na o o tatou agasala ma puapuaga na mafatia ai le Faaola—ae mo o tatou tiga ma mafatiaga faaletino foi, o tatou vaivaiga ma faaletonu, lo tatou fefe ma le toilalo, lo tatou le fiafia ma lotovaivai, lo tatou salamo ma le ta’usalaina, o tatou faanoanoaga ma popolega, o faamasinoga le tonu ma le faaituau o loo tatou aafia ai, ma tiga faalelagona o loo lofituina ai i tatou.
E leai se tiga faaletino, leai se manua faaleagaga, leai se tiga o le agaga po o le loto nutimomoia, leai se ma’i po o se vaivaiga na faafetaiaia oe po o au foi i le olaga faaletino e lei oo muamua i ai le Faaola. I se taimi o le vaivai tatou te ono tagi atu ai, “E leai se tasi na te iloaina pe faape’i. E leai se tasi e malamalama i ai.” Ae ua silafia ma malamalama atoa i ai le Alo o le Atua, aua sa Ia lagonaina ma tauave a tatou avega taitoatasi. Ma ona o Lana taulaga le iu ma faavavau (tagai Alema 34:14), ua ia te Ia le tiga-alofa atoatoa ma e mafai ona ia faaloaloa mai Lona aao o le alofa mutimutivale ia i tatou. E mafai ona ia aapa mai, pa’i mai, fesoasoani, faamalolo, ma faamalosia i tatou ina ia sili atu nai lo le mea e mafai ona tatou faia ma fesoasoani ai ia i tatou e faia le mea e le mafai ona tatou faia i le na o lo tatou faalagolago atu i lo tatou lava malosi. Ioe, e avegofie Lana amo ma e mama foi Lana avega.
O Se Valaaulia, o se Folafolaga, ma se Molimau
Ou te valaaulia outou ina ia suesue, tatalo, mafaufau loloto, ma taumafai ia aoao atili i le Togiola a le Faaola a o e iloiloina au oe lava ia avega. O le tele o mea e uiga i le Togiola e le faigofie ona tatou malamalama i ai i o tatou mafaufau faaletino. Ae o le tele o vaega o le Togiola e mafai ma e ao lava ona tatou malamalama i ai.
Mo lau uo, o le uta fafie na sauniaina ai le malosi e faasaoina ai lona ola. Na le mafai ona minoi le pikiapu gaogao i le kiona, e tusa lava pe o se fa uili. Na manaomia se uta mamafa ina ia maua ai le malosi.
E taua le uta. O le uta na maua ai le malosi lea na mafai ona aveesea mai lau uo, ia toe foi atu ai i luga o le auala, ia fetaomi atu i luma, ma toe foi atu ai i lona aiga.
O avega tulagaese i o tatou olaga taitoatasi ua fesoasoani lea ia i tatou e faalagolago atu ai i le amiotonu, alofa mutimutivale, ma le alofa tunoa o le Mesia Paia (tagai 2 Nifae 2:8). Ou te molimau atu ma folafola atu o le a fesoasoani mai le Faaola ia i tatou e tauave a tatou avega ma le faigofie (tagai Mosaea 24:15). A o tatou amoina faatasi ma Ia e ala i feagaiga paia ma maua le malosi faatagaina o Lana Togiola i o tatou olaga, o le a faateleina ona tatou saili atu ia malamalama ma ola e tusa ma Lona finagalo. O le a tatou tatalo foi mo le malosi e aoao ai mai [faafitauli], ia suiga, pe talia o tatou tulaga nai lo le tatalo faifaipea ina ia suia e le Atua o tatou tulaga e tusa ma o tatou loto. O le a avea i tatou ma auauna o e gaoioi nai lo le mafaufau o le a faagaoioia (tagai 2 Nifae 2:14). O le a faamanuiaina i tatou i le malosi faaleagaga.
Tau ina ia faia ma avea i tatou taitoatasi ma tagata sili atu le lelei e ala i le Togiola a le Faaola. O le asō o le aso 6 o Aperila. Ua tatou iloa e ala i faaaliga o le asō o le aso moni ma le aso sa’o o le soifua mai o le Faaola. O le aso 6 foi o Aperila lea sa faatulagaina ai Le Ekalesia a Iesu Keriso o le Au Paia o Aso e Gata Ai. (Tagai MF&F 20:1; Harold B. Lee, “O Le Faamalosia o Siteki o Siona,” Liahona, Oketopa 1973, 2; Spencer W. Kimball, “Why Call Me Lord, Lord, and Do Not the Things Which I Say?” Ensign, Me 1975, 4; Spencer W. Kimball, “Remarks and Dedication of the Fayette, New York, Buildings,” Ensign, Me 1980, 54; Discourses of President Gordon B. Hinckley, Voluma 1: 1995–1999 [2005], 409.) I lenei aso Sapati faapitoa ma paia, ou te tautino atu lau molimau o Iesu o le Keriso o lo tatou Togiola. O loo soifua o Ia ma o le a faamamaina, faamalolo, taitai, puipui, ma faamalosia i tatou. Ou te olioli e molimau atu ai i nei mea i le suafa paia o Iesu Keriso, amene.