Aua Ne’i o Tatou Ui i le Auala Sese

Saunia e Elder Claudio D. Zivic

O Le Fitugafulu

Ou te tatalo ina ia le punitia la tatou vaai i luga o le ala ina ia mafai ai ona tatou fesootai atu pea i taimi uma i le lagi.

Sa aoao le tata a se tamaitiiti i le piano, ma o se faatauoloa sa tilotilo atu ia te ia mai le faamalama, sa fesili atu, “O i ai lou tina i le fale?”

O lea na tali atu ai le tamaitiiti, “Oi … a o le a lou manatu?”

O le ma fanau pele e toalima e ta piano uma, faafetai ai i le uunaiga a lo’u toalua! A taunuu atu le faiaoga i lo matou fale, e tamoe lo ma atalii o Adrián ma lafi ina ia faamisi ana lesona. Ae o se tasi aso, sa tupu ai se mea ofoofogia! Sa amata ona fiafia tele o ia i musika lea na ia faaauau ai ona aoao pea na o ia.

A mafai ona tatou ausia lena vaega i le faagasologa o lo tatou liuaina, o le a ofoofogia. O le a matagofie le i ai o se manao loloto i o tatou loto e tausi ia poloaiga e aunoa ma se tasi na te faamanatu mai pea ia i tatou ma ia i ai se talitonuga maumaututu e faapea, a tatou mulimuli i le ala sa’o, o le a tatou maua faamanuiaga folafolaina o loo i totonu o tusitusiga paia.

I nai tausaga ua mavae sa matou o ai i le Arches National Park ma lo’u toalua; ma lo ma afafine, o Evelin; ma se uo. O se tasi o fausaga faaofuofu sili ona lauiloa iina sa ta’ua o le Delicate Arch. Sa tonu ia i matou e savavali pe tusa ma le 1.5 maila (2 km), ma fe’a’ei i le mauga ina ia taunuu ai i le fausaga faaofuofu.

Sa matou amata i luga o le auala i se naunautaiga tele, ae ina ua maea ona savalia sina mamao, sa manaomia e isi se malologa. Ona o lo’u naunau ia oo iina, sa ou filifili ai ou te faaauau pea na o au. Sa aunoa ma lo’u nofouta i le auala sa tatau ona ou alu ai, sa ou mulimuli ai i se alii sa muamua atu i o’u luma, sa foliga mai sa savali atu ma le mautinoa tele. Sa faasolo ina faigata tele le auala, ma sa ao ia te au ona puna mai le tasi papa i le isi. Ona o le faigata, sa ou mautinoa ai o le a le taunuu lava tamaitai o la’u vaega. Sa faafuasei ona ou vaaia le Delicate Arch, ae o le mea na matua faateia tele ai au, sa ou vaaia o loo tu mai i se vaega e le mafai ona ou oo atu i ai.

Faatasi ai ma le le fiafia tele, na tonu ai ia te au e toe foi. Sa ou faatalitali ma le onosai seia matou toe feiloai. O la’u fesili vave na fai, “Sa outou oo i le Delicate Arch?” Sa latou ta’u mai ma le fiafia ia te au na latou oo i ai. Sa latou faamalamalama mai na latou mulimuli i faailoilo na faasinoina le auala, ma na faatasi ai ma le faaeteete ma taumafaiga, na latou oo ai i lo latou taunuuga.

Ae paga lea, sa sese le auala na ou ui ai. Oka se lesona ina a maoae sa ou aoaoina i lena aso!

E faafia ona tatou faia se mea sese e uiga i le auala sa’o, i le faatagaina o i tatou lava e taitaiina e faiga a le lalolagi? E manaomia ona tatou fesiligia pea i tatou lava, pe o tatou o ni tagata e anaana i le afioga a Iesu Keriso.

O loo maua se aoaoga ofoofogia i le tusi a Ioane:

“Ina tumau ia o outou ia te a’u, o a’u foi ia te outou. Faapei o le la e le mafai ona fua pe a na o ia, pe afai e le mau i le vine; e faapea foi outou, pe afai tou te le tumau ia te a’u.

O a’u nei o le vine, o la outou. O lē tumau ia te a’u, ma a’u ia te ia, o ia lava e fua tele mai; aua e le mafaia e outou ona fai o se mea e tasi pe a a’u le i ai” (Ioane 15:4–5).

I le faaaogaina ai o lenei faatusatusaga, ua mafai ai ona tatou vaaia le sootaga vavalalata tele lē mafaatusalia ua tatou maua ma Iesu Keriso ma le taua ua Ia tuu mai ia i tatou taitoatasi. O Ia o le puna o le vai ola ma le ala o loo tafe mai ai le vai ola ia i tatou, o le malosi lea e faatagaina ai i tatou ia faafaileleina ina ia mafai ai ona fua tele mai. Na aoaoina i tatou e Iesu Keriso i se ala o ni lala—po o tagata e faalagolago ia te Ia—e le tatau lava ona tatou manatu faatauvaa i le taua o Ana aoaoga.

O loo i ai nisi mea sese atonu e ogaoga, ma afai tatou te le faasa’oina na mea sese i le taimi sa’o, e mafai ona latou taitaieseina tumau i tatou mai le ala sa’o. Afai tatou te salamo ma taliaina ia faasa’oga, o le a faatagaina e nei aafiaga i tatou e faalotomaualaloina i tatou lava, sui a tatou amioga, ma tatou toe latalata atili atu ai i lo tatou Tama Faalelagi.

Ou te fia tuuina atu se faataitaiga i lenei manatu faavae e ala i le faasino atu i se tasi o taimi sili ona matuia na oo i ai le Perofeta o Iosefa Samita. Na auala mai i lenei aafiaga, na tuu mai ai e le Faaola ia i tatou ni aoaoga e faatatau i mataupu faavae e tatau ona tatou manatuaina pea i o tatou olaga atoa. Sa tupu ina ua leiloloa ia Matini Harisi itulau e 116 na faaliliuina o le vaega muamua o le Tusi a Mamona.

Ina ua salamo mo le le mulimulitaia o le fautuaga a le Atua, sa maua ai e le Perofeta le faaaliga o loo maua i le vaega e 3 o le Mataupu Faavae ma Feagaiga (tagai Aoaoga a Peresitene o le Ekalesia: Iosefa Samita [2007], 69–71). Mai mea o loo tusia i le fuaiupu 1 e oo i le 10, ou te fia faamamafaina ai ni mataupu faavae se tolu ia e tatau ona tatou manatuaina i taimi uma:

O galuega ma faamoemoega o le Atua e le mafai ona faalavelaveina.
E le tatau ona tatou matatau i tagata i lo le Atua.
O loo i ai se manaoga mo le salamo faifai pea.

I le fuaiupu 13, o loo aoao ai i tatou e le Alii i ni amioga se fa e le tatau lava ona tatou faia:

Lafoai i fautuaga a le Atua.
Solia o folafolaga sili ona paia na osia i luma o le Atua.
Faalagolago i a tatou lava faaiuga.
Faamaualuga i lo tatou lava atamai.

Ou te tatalo ina ia le punitia la tatou vaai i luga o le ala ina ia mafai ai ona tatou fesootai atu pea i taimi uma i le lagi, ina ia le taitaieseina i tatou e tu ma aga o le lalolagi.

Afai e i ai se tasi o outou e oo i se tulaga o le lafoaia o ala o le Alii—i soo se vaega lava o le ala—faatasi ai ma le salamo tele o le a e lagonaina ai le oona o le lafoaia o fautuaga a le Atua, solia o folafolaga sili ona paia na osia i luma o le Atua, ma le faalagolago i au lava faaiuga, po o le faamaualuga i lou lava atamai.

Afai o le tulaga lea, ou te apoapoai atu ia te outou ia salamo ma foi mai i le ala sa’o.

Sa i ai se tasi taimi na valaau atu ai se atalii o le fanau i lona tama matua e faamanuia i lona aso fanau. Sa ia fesili atu ia te ia po o le a lona matua. Sa ia tali mai ua atoa lona 70 tausaga. Sa mafaufau lona atalii o le fanau mo sina taimi ona faapea atu lea, “Tamamatua, sa e toe amata i le toe foi atoa i tua i le 1?”

I le taimi o le tamaitiiti ma le talavou, sa manatu ai tagata o le a latou le matutua lava; o le manatu o le a le oo mai lava le oti—o le mea lena mo tagata matutua tele—ma o le taunuu atu i lena tulaga o se taimi umi tele. A o gasolo le taimi, ma tea atu masina ma vaitau, seia oo ina maanuminumi foliga, e faaitiitia le malosi, ma faateleina le manaoga mo asiasiga i fomai, ma faapena ai lava.

O le a oo mai le taimi tatou te toe feiloai ai ma lo tatou Togiola ma le Faaola, o Iesu Keriso. Ou te augani atu a oo i lena taimi paia ma mamalu o le a mafai ona tatou iloaina o Ia ona o le malamalama ua tatou maua e uiga ia te Ia ma ona o le mulimuli i Ana aoaoga. O le a Ia faaali mai ia i tatou faailoga i Ona aao, ma o le a tatou auai faatasi i se feopoā’iga umi, ma loimata o le olioli i le mulimuli ai i Ona ala.

Ou te molimau atu i tuluiga e fa o le lalolagi o loo soifua Iesu Keriso. Ua Ia apoapoai mai ia i tatou, “Faalogo mai ia, outou e atunuu o le lalolagi, ma faalogo mai i fetalaiga a le [lena] Atua … o le na faia outou” (MF&F 43:23). Tau ina ia tatou maua le gafatia e iloa ai, faalogo, malamalama, ma faauiga sa’o le sāvali a “[lena] Atua … o le na faia [tatou]” ina ia tatou le se ese mai i Ona ala, ou te ole atu ai i le suafa o Iesu Keriso, amene.