Ola Tutumau i Faatuatuaga
O le a matua faamanuiaina i tatou taitoatasi pe afai tatou te iloa tala o le faatuatua ma le ositaulaga sa taitaia ai o tatou tuaa ia auai i le Ekalesia a le Alii.
Ou te fiafia i talafaasolopito o le Ekalesia. Atonu e pei o le toatele o outou o lo’u faatuatua lava ia e faamalosia pe a ou aoao e uiga i le tuuto maoae o o tatou tuaa o ē na taliaina le talalelei ma sa ola tutumau i faatuatuaga.
I le masina ua mavae, sa faamanatu ai e talavou matagofie e 12,000 mai le Itu o le Malumalu o Gilbert Arisona le faamaeaina o le latou malumalu fou i faafiafiaga mataina, ma le faatinoina o lo latou tautinoga ia ola amiotonu. O le autu o le latou faafiafiaga o le “Ola Tutumau—i Faatuatuaga.”
E pei ona faia e na talavou faamaoni i Arisona, e tatau foi ona tautino atu tagata taitoatasi o le Au Paia o Aso e Gata Ai ia “ola tutumau i faatuatuaga.”
Fai mai upu o le pese, “Ia tutumau i faatuatuaga na pele i matua” (“Vaivai ‘Ea Fanau a Siona,” Viiga, nu. 159).
E mafai ona tatou faaopoopo i ai le, “Ia tutumau i faatuatuaga na pele i tatou matua matutua.”
Sa ou mafaufau pe na silafia e na talavou naunautai taitoatasi o Arisona a latou lava talafaasolopito o le Ekalesia—pe na latou silafia le talafaasolopito o le auala na avea ai o latou aiga ma tagata o le Ekalesia. O le a avea ma se mea matagofie pe afai e silafia e Au Paia uma o Aso e Gata Ai tala o le liuaina o o latou tuaa.
E tusa lava pe o oe o se tupuaga o paionia pe leai, o le talatuu o paionia Mamona o le faatuatua ma le ositaulaga, o lou talatuu lena. O le talatuu tautupu o Le Ekalesia a Iesu Keriso o le Au Paia o Aso e Gata Ai.
O se tasi o mataupu e sili ona matagofie i le talafaasolopito o le Ekalesia na tupu ina ua aoao atu e Uilifoti Uitilafi, o se Aposetolo a le Alii, le talalelei a Iesu Keriso i Peretania Tele i le 1840—na o le 10 tausaga talu ona faavaeina le Ekalesia.
Sa taulai atu e Uilifoti Uitilafi ma isi Aposetolo a latou galuega i eria o Liverpool ma Preston i Egelani, ma sa matua faamanuiaina tele. O Elder Uitilafi, o lē sa mulimuli ane avea ma Peresitene o le Ekalesia, sa tatalo e le aunoa i le Atua e taialaina o ia i lenei galuega taua tele. O ana tatalo na taitai atu ai i ni musumusuga e malaga i se isi nofoaga ese e aoao atu ai le talalelei.
Sa aoao i tatou e Peresitene Monson pe a tatou maua lenei musumusuga mai le lagi e faia se mea—ia tatou faia nei loa—tatou te lē tolopoina. O le mea tonu lena sa faia e Uilifoti Uitilafi. Faatasi ai ma le taitaiga manino mai le Agaga e “malaga i saute,” na toetoe lava a tuua ai e Elder Uitilafi i le taimi lava lena ma malaga atu ai i se vaega o Egelani ua faaigoaina o Herefordshire—o se atunuu faifaatoaga i sautesasae o Egelani. O iina sa ia feiloai ai i se faifaatoaga faamanuiaina e suafa ia John Benbow, lea sa talia ai o ia “ma le loto fiafia ma le agaga faafetai” (Uilifoti Uitilafi, i le Matthias F. Cowley, Uilifoti Uitilafi: History of His Life and Labors as Recorded in His Daily Journals [1909], 117).
O se vaega e silia ma le 600 tagata, o e na faaigoaina i latou lava o Usoga Tuufaatasi, sa “tatalo mo le malamalama ma le upumoni” (Uilifoti Uitilafi, i le Aoaoga a Peresitene o le Ekalesia: Uilifoti Uitilafi [2004], 91). Sa auina atu e le Alii ia Uilifoti Uitilafi o se tali i a latou tatalo.
O aoaoga a Elder Uitilafi sa vave ona fua mai ai ni taunuuga, ma sa papatisoina le toatele. Sa faatasi atu i ai Polika Iaga ma Willard Richards i Herefordshire, ma na ofoofogia le faamanuiaina ai o Aposetolo e toatolu.
I ni nai masina, sa latou faatulagaina ai paranesi e 33 mo tagata e 541 na auai i le Ekalesia. Sa faaauau pea la latou galuega maoae, ma na iu ai na toetoe o tagata uma o le Usoga Tuufaatasi na papatisoina i totonu o Le Ekalesia a Iesu Keriso o le Au Paia o Aso e Gata Ai.
O le tina o le tama o le tina o lo’u tama o Hana Maria Eagles, o sē tasi o uluai tagata na faafofoga ia Uilifoti Uitilafi. Sa ia logoina lona toalua, o Ropati Harisi le Itiiti, e faapea sa ia faalogo i le afioga a le Atua ma sa ia naunau ia papatiso. Sa le’i fiafia Ropati e faalogo atu i le lipoti a lona toalua. Sa ia tau atu ia te ia o le a la o faatasi i le isi lauga e tuuina atu e faifeautalai Mamona, ma o le a ia faasa’oina le faifeautalai.
A o nofo latalata i luma o le faapotopotoga, faatasi ai ma se naunautaiga ia lē tosina atu i le lauga, ma atonu e mafai ona faapalopalo i le faifeau asiasi mai, na vave ona to’ia Ropati e le Agaga, e pei ona oo ai lona toalua. Sa ia iloaina e moni le savali o le Toefuataiga, ma sa papatisoina ai o ia ma lona toalua.
O le la tala o le faatuatua ma le tuuto e talitutusa ma le isi faitau afe o tala: ina ua latou faalogo i le savali o le talalelei, sa latou iloaina e moni!
E pei ona fetalai mai le Alii, “O a’u mamoe e faalogo mai i latou i lo’u leo, ua ou iloa foi i latou, ua latou mulimuli mai foi ia te au” (Ioane 10:27).
I le faalogo ai i le leo o le Leoleo Mamoe, sa latou tuuto atu ma le atoatoa o latou olaga i le ola ai i le talalelei ma mulimuli i le taitaiga a le perofeta a le Alii. I le tali atu i le valaau e faapotopoto i Siona, sa latou tuua o latou aiga i Egelani, ma sopoia le Vasa o Atalani, ma faapotopoto atu faatasi ma le Au Paia i Navu, Ilinoi.
Sa latou taliaina le talalelei ma o latou loto atoa. A o taumafai e faamautu o latou aiga fou [i Navu], sa latou fesoasoani atu i le fausiaina o le Malumalu o Navu e ala i le faasefuluaiina o a latou galuega—i le faaaluina lea o aso lona 10 uma e galulue ai i le fausiaina o le malumalu.
Sa matua nutimomoia o latou loto ina ua latou maua le tala e uiga i le maliu a lo latou perofeta pele, o Iosefa Samita, ma lona uso o Ailama. Ae sa latou faaauau pea! Sa latou tutumau i faatuatuaga.
Ina ua sauaina le Au Paia ma tuliesea mai Navu, sa lagona e Ropati ma Maria le faamanuiaina tele i le mauaina o o laua faaeega paia i le malumalu, i sina taimi puupuu ae latou te le i sopoia le Vaitafe o Misisipi ma agai atu i sisifo. E ui sa latou lē mautonu i mea o le a i ai o latou lumanai, ae sa latou mautinoa lava e uiga i o latou faatuatua ma o latou molimau.
Faatasi ai ma le fanau e toaono, sa faigata ona latou savavali i le palapala a o latou sopoia Aioua i la latou malaga i sisifo. Sa latou fausia mo i latou lava se fale le tumau i autafa o le Vaitafe o Misuri lea sa ta’ua mulimuli ane o Uinita Kuota.
O nei paionia lototoa sa faatalitali mo se taitaiga faaaposetolo i le auala ma po o afea o le a latou agai atili ai i sisifo. Na suia fuafuaga a tagata uma ina ua tuuina atu e Polika Iaga, o le Peresitene o le Korama a le Toasefululua, se valaau mo alii e volenitia e auauna atu i le Vaegaau a le Iunaite Setete lea sa taua o le Autau Mamona.
Sa avea Ropati Harisi le Itiiti ma se tasi o alii paionia Mamona e silia ma le 500 o ē sa tali atu i lena valaau mai ia Polika Iaga. Sa ia auai i le [Autau Mamona], e tusa lava pe o le a tuua ai lona toalua maitaga ma le fanau iti e toaono.
Aisea na ia faia ai ma isi alii lea mea?
E mafai ona tuuina atu le tali i upu lava a le tamamatua o lo’u tamamatua. I se tusi sa ia tusia mo lona toalua ina ua faia se malologa puupuu a le autau e agai atu i Santa Fe, sa ia tusia, “Ua atili ona malosi lou faatuatua [ma pe a ou mafaufau i mea sa tau mai e Polika Iaga ia i matou], ou te talitonu e tutusa lava e peiseai na tau mai e le Atua Sili ia te au.”
I se aotelega, sa ia iloa sa ia faalogo i se perofeta a le Atua, e pei ona sa faia e isi alii. O le mea lena sa latou faia ai lena mea! Sa latou iloa sa taitaiina i latou e se perofeta a le Atua.
I lena lava tusi, sa ia faamatalaina ai ona lagona alofa mo lona toalua ma le fanau ma sa ia faamatalaina ana tatalo e le aunoa ina ia faamanuiaina o ia ma lana fanau.
Mulimuli ane i le tusi, sa ia faia ai se faamatalaga mamana: “E le tatau ona ta faagaloina mea sa ta faalogo i ai ma [lagonaina] i totonu o le Malumalu o le Alii.”
I le tuufaatasia ai ma lana uluai molimau e faapea “o loo taitaia i matou e se Perofeta a le Atua,” o nei apoapoaiga paia e lua ua avea e pei o ni mau ia te au.
I le mavae ai o le sefuluvalu masina talu ona malaga ese atu ma le autau, sa toefaatasia ai ma le saogalemu Ropati Harisi ma lana pele o Maria. Sa laua tumau ma le faamaoni i le talalelei toefuataiina i o laua olaga atoa. Sa laua maua se fanau e 15, e 13 na soifua o ni tagata matutua. O lo’u tinamatua o Fannye Walker, o Raymond, Alberta, Kanata, sa avea o se tasi o a laua fanau a fanau e 136.
Sa mitamita Tinamatua Walker i le mea moni e faapea o lona tamamatua sa auauna atu i le Autau Mamona, ma sa ia manao ia iloa uma e fanau a lana fanau. O lea la ua avea au ma tamamatua, ua ou malamalama i le mafuaaga na taua tele ai ia te ia. Sa ia manao e liliu atu loto o fanau i o latou tama. Sa ia manao ia iloa e fanau a lana fanau o latou tupuaga amiotonu—aua sa ia iloa o le a manuia ai o latou olaga.
O le tele o lo tatou lagonaina o le fesootai ma o tatou tuaa amiotonu, o le a atili foi lena o lo tatou faia o filifiliga poto ma le amiotonu.
Ma e moni lenei mea. O le a matua faamanuiaina i tatou taitoatasi pe afai tatou te iloa tala o le faatuatua ma le ositaulaga sa taitaia ai o tatou tuaa ia auai i le Ekalesia a le Alii.
Mai le taimi muamua sa faalogo ai Ropati ma Maria ia Uilifoti Uitilafi o loo aoao atu ma molimau atu i le Toefuataiga o le talalelei, sa laua iloa e moni le talalelei.
Sa laua iloa foi e tusa lava pe o a tofotofoga po o faigata o le a la o’o i ai, o le a faamanuiaina lava i laua mo le faamaoni ai i le faatuatua. Na toetoe lava foliga mai sa laua lagonaina upu a lo tatou perofeta i aso nei, o lē na saunoa mai, “E leai se taulaga e telē naua … ia maua ai [le] faamanuiaga [o le malumalu]” (Thomas S. Monson, “O Le Malumalu—O Se Sulu Ta’iala i le Lalolagi,” Liahona, Me 2011, 92).
O loo lolomiina i pito o le tupe siliva e lua pauna a le Malo o Peretania, “Manuia i Galuega a Tagata Faatuatua.” A ou mafaufau i o tatou tuaa paionia, ou te lagona ua tatou manuia uma ona o le faatuatua o i latou na muamua atu.
E ui lava na oo mai le apoapoaiga mai se tusi a Ropati Harisi, ae ou te talitonu e toatele naua ni tuaa o le a auina atua le savali lava lea e tasi i a latou fanau ma fanau a fanau: Muamua, e le tatau ona tatou faagaloina aafiaga ua tatou mauaina i le malumalu, ma e le tatau ona tatou faagaloina folafolaga ma faamanuiaga e oo mai ia i tatou taitoatasi ona o le malumalu. Lona Lua, e le tatau ona tatou faagaloina o loo taitaiina i tatou e se perofeta a le Atua.
Ou te molimau atu o loo taitaiina i tatou e se perofeta a le Atua. Ua toefuatai mai e le Alii Lana Ekalesia i aso e gata ai e ala i le Perofeta o Iosefa Samita, ma e le tatau ona tatou faagaloina o loo taitaiina i tatou e ala i se faagasologa lemamotusiaina o perofeta a le Atua mai ia Iosefa ia Polika ma faaauau mai ai lava i Peresitene taitasi o le Ekalesia na sosoo ai seia oo mai i lo tatou perofeta i aso nei—o Thomas S. Monson. Ou te iloa o ia, ou te faamamalu o ia, ma alofa ia te ia. Ou te molimau atu o ia lava o le perofeta a le Alii i le lalolagi i le asō.
O le manao o lou loto, faatasi ai ma lau fanau ma le fanau a fanau, o le a tatou faamamaluina le talatuu a o tatou tuaa amiotonu—o na paionia Mamona faamaoni o ē na naunau e tuu mea uma i luga o le fata faitaulaga ia osi ai taulaga ma puipuia ai lo latou Atua ma lo latou faatuatuaga. Ou te tatalo o le a taitasi i tatou ma tutumau moni i faatuatuaga na pele i matua. I le suafa paia ma mamalu o Iesu Keriso, amene.