Ua Faaaogaina e le Ekalesia ia Mataupu Faavae o le Uelefea i le Toe Faaleleia o Filipaina

I masina talu ona taia e le Afa o Haiyan ia Filipaina ia Novema 2013, ma faaleagaina ai le toeitiiti 1.2 miliona o fale ma fasiotia ai le silia ma le 6,200 tagata, o loo faaauau pea ona tuuina atu e le Ekalesia le toomaga laveai, fesiitaiga o taumafaiga mai tali o mala i le toomaga laveai e umi atu. O se tasi o taumafaiga faapitoa na faamanuiaina e aofia ai ni tagata volenitia o e na aoaoina le fausiaina o fale mo i latou e le o i ai lava ni malutaga.

O tagata nei o le nuu na aafia i le afa o loo faitaulia faatasi ma le toatele o e na faaalia le agaga faafetai mo le fesoasoani sa latou mauaina mai le Ekalesia, e ui lava e le o i latou o ni Au Paia o Aso e Gata Ai:

• O se tamaitai sa lalafi i le falesa Mamona i le taimi o le afa ua iloaina mulimuli ane, ua faaleagaina lona fale ina ua pauu i ai i luga ni niu. Latou te lei mauaina ma lona aiga ni mea e toe fau ai, ae na fesoasoani ia tagata volenitia e fausia se fale fou, ma o loo ia fesoasoani nei i se isi aiga e fausia se fale. “Na ou aoao e galulue faatasi ma i latou o e foi e manaomia le fesoasoani iinei, ina ia mafai ona tatou toe faaleleia faatasi mai [le afa],” o lana tala lea.

• O se alii ua leai se galuega ina ua faatamaia le pisinisi lea sa ia galue ai ma o loo ia aoaoina i le taimi nei e fausia ni fale mo lona aiga ma isi. “Tatou te iloa e tatau ona tatou fesoasoani i le tasi ma le isi ina ia vave ona faamaeaina le galuega,” o lana tala lea, ma faaopoopo mai ua ia faafetai mo taumafaiga laveai a le Ekalesia.

Fai mai le Epikopo Pulefaamalumalu o Gary E. Stevenson, faatasi ai ma le tausiga o e matitiva ma lē tagolima, “o loo tatou vaaia foi le galueaina o le mataupu faavae o le ola faalagolago o le tagata ia te ia lava i le taimi nei, ma e ese le matautia nai lo lena.” Sa ia fai mai, “O se tasi o mea lea matou te taumafai e faia o le saunia lea o anomea ao saunia e [tagata e faaaogaina] galuega. Soo se tasi o loo mauaina se fale o loo galulue foi e fausia e malutia ai i latou lava.”

O loo fono ia taitai o le Ekalesia i le lotoifale ma sui o fesoasoaniga agaalofa ma taitai o nuu i le lotoifale e tuuina atu ni aoaoga faamatata ma le faamaoniga i tagata o e ua aoaoina ni tomai faakamuta.Ua faaaogaina ia punaoa o Tupe Faaagaga mo Aoga e aumai ai ni kamuta atamamai e toa 20 e fesoasoani i le aoaoina, ma le 2,000 o le 3,000 o fale na faamoemoeina ua uma ona faamaeaina.

Ua faaalia e le auaooga i le lotoifale lo latou aoaoina e ala i le fausiaina o fale e 10 ina ia maua ai le faamaoniga a le malo ma se pusa faigaluega mai le Ekalesia, e mafai ai e i latou ona saili ni galuega lelei. O loo i ai se manaomia tele mo tagata faufale lea ua ioeina ai e le Matagaluega o Toomaga a le Katoliko e faafaigaluega le faitau selau o kamuta na aoaoina e le Ekalesia AAG.

Fai mai Epikopo Stevenson e toa 500 tagata o le Ekalesia sa auai i se fonotaga lea na faamatalaina ai e taitai faale-ekalesia ia aoaoga o le galuega ma le faamaoniga, “ma ao faamatalaina lenei mea ia i latou, sa latou patipati faamālō ma loimata, ma le iloaina o le a mafai ona latou iloa le ala… e saunia ai mo o latou aiga.”

Na galulue foi le Ekalesia ma nisi o faalapotopotoga agaalofa faapea foi ma le malo Filipaina i se taumafaiga faifaipea ina ia tilivaina atu meaai, vai, sapalai faafomai, pusa o vailaau faafomai, afi faaleoleo, pusa mo malutaga, pusa mo le kukaina o meaai, meafagota, ma ni fatu mo le totoina.

Ua iloa e le Ekalesia o le auala sili ona lelei e tali atu ai i faalavelave faalenatura o le galulue lea i le lotoifale, faatauina o sapalai manaomia i le atunuu na aafia, i le latalata i le faalavelave e mafai ai. E le gata o le a faamautinoa e lenei mea o loo talafeagai ia oloa mo le eria, ae o le a fesoasoani foi i le fausiaina o faaletonu o le tamaoaiga i le lotoifale.

Ua fautuaina tagata i le lalolagi atoa ina ia tatalo mo i latou o i eria o loo pagatia e mamao ese mai mea o latou nonofo ai, ma mafaufau ina ia faateleina a latou foai o le taulaga anapogi po o le foai atu i le tupe o le fesoasoani alofa a le Ekalesia.