Ua Fesoasoani le Polokalama o le Faamamaina o le Suavai i le Faitau Miliona o Tagata i Aferika

Mo le silia ma le luasefulu tausaga, ua auai le Ekalesia i ni galuega faatino o le faamamaina o le suavai i le silia ma le 100 atunuu. I Aferika lava ia, o nei galuega faatino ua faamanuiaina ai olaga o le silia ma le fa miliona tagata e ala i le sauniaina o vaieli, polokalama o le sefeina ma le tilivaina o le suavai, faapea ma le faamamaina o le suavai.

O se tasi o ia galuega faatino na faia i le Motu o Idugo, mai le talafatai i Mozambique. O le toatele o le 15,000 o tagata o loo nonofo i le motu e galulue i faatoaga a aiga, fagota i sami tuaoi o le Vasa Initia, pe galulue i le mimitiina o vaituloto ina ia ao mai ai le masima mai le suasami. E leai se vai, eletise, auala, po o ni taavale i le motu. O vaa e gaosilima po o tamai paopao o le auala lea e te oo ai i le motu.

Mo le tele o seneturi, na o le pau le puna o vaiinu i Idugo o vaieli papau ia e eliina i lima. E faaauau pea ona faatumulia vaieli i palapala ma lapisi. Latou te aumaia ni vai palapala, e faigata ona maua. I le taimi o le vaitau o timuga, e amata ona palapala, ma mafua ai le kolela, manavatatā, ma isi ma’i.

Ina ua faalogo faifeautalai mo fesoasoaniga agaalofa a le Ekalesia e uiga i le tulaga o Idugo, sa latou feiloai ma taitai o le alalafaga iina. Sa latou galueaina faatasi se fuafuaga mo Auaunaga Agaalofa a le Ekalesia ina ia saunia ni mea e faaaoga, meafaigaluega, ma faatonuga i le fausiaina o vaieli sima e 10 e uamea tapuni, e mafai ona tausia ai ni tagata se toa 1,000. O le a saunia e faifeautalai ni aoaoga o le tumama ma le maloloina, ao tagata o le nuu o le a saunia ia galuega leipa uma mo le fausiaina ma le faatumauina o le tausiga o vaieli.

Mai se tulaga o sauniuniga i le motu autu, e fa uta o loli pusasasaa o iliili, 300 taga sima, lua uta oneone, uamea, ma sima e fausia i le uamea o loo aveina atu i le motu. Na tilivaina sapalai i totonu o le motu i vae po o taavale tosolima. Sa tolauapi nisi o tagata o le Ekalesia mai Quelimane, Mozambique, i le motu mo le tolu masina e fesoasoani ai i le aoao atu ma le fausiaina.

Sa mamanuina vaieli e faataga ai ia alavai o vaitimu, e faaitiitia ai le faatamaiaga. I nisi o nuu, sa fausia e tagata o le motu ia pa laau laupapa ma auala piliki e siomia ai vaieli, e faaaoga ai piliki na latou aoaoina e fai i mea na foai mai e le Ekalesia.

I sauniga aloaia, sa tuuina atu ai ia vaieli i tagata o nuu taitasi. O le tele o tagata o e sa galulue i vaieli na faailoa mai le agaga faafetai i o latou tomai fou na faatoa aoaoina—faia o piliki, galulue ma sima ma faamalosia ai i le sila, ma le faaaogaina o meafaigaluega—o le a mafai ai ona latou maua ni galuega faaopoopo. O isi sa faaalia le agaga faafetai mo le avanoa e aoao ai tomai faaletaitai.

I le sosoo ai ma le isi vaitau timuga, e lei i ai se faamai e mafua mai vai na lipotia mai i nuu o i ai vaieli.

E tusa ai ma le Faalapotopotoga o le Soifua Maloloina o le Lalolagi, e sili atu nai lo le tasi piliona tagata i le lalolagi atoa e le maua ni vai mama. Faafetai i le polokalama o vai mama a le Ekalesia, ua faaitiitia lena fuainumera e ala i le polokalama lea o loo aofia ai tagata o nuu i le fuafuaina ma le faagaoioia o galuega faatino, saunia o galuega leipa e fausia ai mea o loo manaomia, mauaina o aoaoga, ma le faatumauina o punaoa ua uma ona faamaeaina.

E le gata i galuega faatino o vai mama i Aferika, o loo lagolagoina e le Ekalesia ni taumafaiga o suavai mama i Asia, Amerika Tutotonu, Europa Sasae, Initia, Initonesia, Atumotu o le Pasefika, Amerika i Saute, Asia Sautesasae, ma isi nofoaga i le lalolagi atoa.