O Tekinolosi ma Ala Faasalalau Faaagafesootai ua Faalauteleina Atu ai i le Lalolagi Atoa le Oo Atu o le Konafesi Aoao

E faaopoopo i le sili atu nai lo le 100,000 sa auai i sauniga e lima o le Konafesi Aoao lona 184 Faaletausaga i le Maota Autu mo Konafesi i le Aai o Sate Leki, Iuta, ISA, e sili atu ma le faitau miliona o tagata na maimoaina pe na faalogo i sauniga i gagana e 95 e ala atu i faasalalauga i le televise, leitio, satelite, ma le Initoneti.

E ui na nofoia e tagata e 21,000 ia le Maota Autu mo Konafesi i le Aai o Sate Leki, ae na faatoateleina le au maimoa o le konafesi aoao i le maimoa mai o le faitau miliona o tagata o le Ekalesia ma isi mai le salafa o le lalolagi. Mo le silia ma le 50 tausaga, ua faaliliuina e le Ekalesia ia taualumaga i le tele o gagana. I le taimi nei, o tekinolosi ua mafai ai ona maimoa tuusao mai i le silia ma le 200 o atunuu i le lalolagi atoa.

E faaopoopo atu i faasalalauga i falelotu i le lotoifale, ua faasalalauina atu e le Ekalesia ia konafesi e tuusao atu i le LDS.org, BYUtv, BYUtv International, le Mormon Channel, Roku, Facebook, ma le YouTube. Ua faateleina pe tusa ma le 30 pasene ia tagata na maimoaina i luga o le initoneti ia le konafesi aoao ia Oketopa 2013 e faatusatusa lea i le konafesi talu ai.

O le toatele foi na auai i le konafesi aoao e auala atu i ala o faasalalauga faaagafesootai. O se anoanoai o tweets faatasi ai ma le hashtag #ldsconf o loo i ai i le Twitter i le taimi o sauniga taitasi e lima o le konafesi, ua avea ai le konafesi aoao ma se tasi o autu sili ona talanoaina i luga o le Twitter i na vaitaimi. Mo se faataitaiga, i le vaitaimi o Oketopa 2013, e 155,000 tweets e faatatau i le konafesi aoao na faasalalau ai. (O tweet taitasi o se faamatalaga patino o mataitusi e 140 po o lalo ifo.)

E ala atu i ona alaata o faasalalauga faaagafesootai aloaia, na tuuina i ai e le Ekalesia ni savali tuusao mai le konafesi i le tele o gagana, ma e uunaia ai isi e faasoa atu na savali. I le taimi o le konafesi aoao ia Oketopa 2013, o le toatele o tagata faaopoopo na maimoa pe faalogologo i savali o le konafesi aoao ina ua ia vaaia ni faamatalaga i luga o faasalalauga faaagafesootai. Na faasoa mai faamatalaga i le gagana Peretania, Sipaniolo, ma le Potukale.