Ua Tau Atu e le Uepisaite le Auaunaga, Faatuatua

Ua tuuina atu e le Au Paia o Aso e Gata Ai le auaunaga ma faasoa atu lo latou faatuatua i le lalolagi atoa. O lipoti e uiga i ia ituaiga gaoioiga ua faaalia i luga o uepisaite o potu o talafou i le atunuu, lea e aoteleina e le aunoa i newsroom.lds.org, o le punaoa aloaia a le Ekalesia mo le au faasalalau o talafou, taitai faitofa, ma tagata lautele.

I le eria o le Pasefika, o le Au Paia o Aso e Gata Ai ua sapalaiina ia vai, meaai, iliafi, faamama o vai, afi faaleoleo, ma isi sapalai mo faalavelave faafuasei e fesoasoani i tagata Toga ina ua mavae le faatamaiga e le Afa Teropika o Ian. I Samoa, na auai le autalavou a le AAG i se gaoioiga e lua-aso o le tuufaatasiga o tapuaiga eseese i faamalosiauga faaleagaga, musika, siva, ma taaloga.

I Pasila, o tagata o le Ekalesia o ofuina ni ofutino o Mamona Lima Fesoasoani na fesoasoani i taumafaiga faamama ma le tufatufaina o sapalai ina ua mavae le lologa na faaleagaina ai nuu tuaoi ma pisinisi, ma tuua ai le toatele ua leai ni fale. O isi nofoaga, na fesoasoani tagata o le ekalesia i le tufatufaina atu o nofoa faataavalevale e 211 i tagata o i ai manaoga faapitoa lea na foai mai e le Auaunaga Agaalofa a le Ekalesia. O le faifai pea o foai i Pasila ua oo atu ai nei le aofai i le toeitiiti 700 nofoa.

I Aferika, ua aufaatasi ia faalapotopotoga o le atunuu ma le lalolagi atoa ma Galuega Agaalofa a le AAG, o le aao foai a le Ekalesia, i se uluai polokalama a le malo i Kana e aveesea ai le misela ma le rupela e ala i le faia o tui puipui a le fanau mai le pepe e oo atu i le 14 tausaga. I Nigeria ma Kana, o se aso o Lima Fesoasoani na faamanuiaina ai le faitau afe o tagata i nuu e 100 ao pulupululima faatasi tagata o le Au Paia o Aso e Gata Ai i soo se vaitausaga i le fausiaina o auala laupapa, toto laau, vali ia fale, ma faamama ma faamatagofie ia le alalafaga. I Zimbabwe, e silia ma le 60 talavou AAG na volenitia e ofo atu toto. Ma i Aferika i Saute, o le tagata o le Au Paia o Aso e Gata Ai o Nozibele Makanda, o le tina o le fanau e toaono, na filifilia e avea o se pulenuu o Queenstown, o se aai e 200,000 tagata.

I Amerika Tutotonu, sa galulue le silia ma le 500 talavou AAG i Kuatemala faatasi ai ma le malo i le lotoifale e totoina ni laau e 1,944. I Costa Rica, na avea falelotu a le AAG ma tulaga o le aoina mai o susu, ma e 370 volenitia a le Ekalesia na fesoasoani e tilivaina atu i supamaketi o loo auai i le gaoioiga o le tuuina atu mo i latou e le tagolima.

Ma i Kanata, na galulue le Au Paia o Aso e Gata Ai ma Talanoaga FaaKerisiano-Iutaia o Montreal (Quebec) ina ia saunia faatalanoaga o le vitio a o lei faia suesuega a le malo i tulaga faatauaina. O na faatalanoaga na talanoaina ai le lagolagoina o le tautinoga o le nuu i le faaaloalo, malamalama, faapalepale, ma saolotoga i tapuaiga, faamamafaina o le tumau pea o le taua o tapuaiga i olaga o le toatele o tagatanuu o Quebec.

Mo se lisi o uepisaite o le potu o talafou o atunuu faavaomalo i gagana eseese, tagai i le mormonnewsroom.org/newsroom-country-sites.