Gadrevi: Na Liga kei na Yalo me Vakusakusataka na Cakacaka

Mai vei Linda K. Burton

Peresitedi Raraba ni iSoqosoqo ni Veivukei

Eda rawa ni dodoliga ka veivuke kei na yalo me vakusakusataka na cakacaka totoka nei Tamada Vakalomalagi.

Kemuni na taciqu, keitou lomani kemuni! Ni da sarava na vidio totoka o ya, o ni raica beka na ligamuni ni dodo yani me vukea e dua ena salatu ni veiyalayalati? Au nanuma kina e dua na goneyalewa lailai o Brynn e ligadua, ka dau vakayagataka na liga oqori me dodoka yani me vakalougatataka nona matavuvale kei ira nona itokani—ira na Yalododonu Edaidai kei na matalotu tale eso. E sega li ni totoka o koya? Oi kemuni talega! Kemuni na taciqu, eda rawa ni dodoka na liga ni veivuke kei na yalo me vakusakusataka na cakacaka totoka nei Tamada Vakalomalagi.

Me vakataki ira na tacida yalodina ena ivolanikalou, me vakataki Ivi, Sera, Meri kei na vuqa tale, era kilai ira tiko kei na nodra inaki, a kila tiko o Brynn ni dua o koya na luve ni Kalou.¹ Keda talega eda kila noda ivotavota vakalou ni da sa luveni Kalou kei na cakacaka bibi e gadreva o Koya meda vakayacora.

E vakavulica vakaoqo na iVakabula, “Kevaka e dua na tamata sa via cakava na loma i koya, ena kila se sa ka mai vua na Kalou.”² Na cava meda kila ka cakava “ki na bula vou ko ya”?³ Eda na vulica mai na italanoa oqo na cauravou vutuniyau a tarogi Jisu na cava me cakava me rawata kina na bula tawamudu.

A sauma vua o Jisu “Ia kevaka ko sa via curu ki na bula, mo muria na vunau.”

A taroga na cauravou Vua na vunau cava me na muria. A qai kaya vua o Jisu e vica mai na Vunau e Tini eda kila kece tu.

A sauma o cauravou, “A ka kecega oqori kau a vakabauta ga ni kau sa gone ka yacova na siga oqo: a cava tale sa vo vei au?”

A kaya o Jisu, “Kevaka ko sa vinakata mo vinaka sara, mo lako, mo volitaka na nomu iyau. Ka solia vei ira na dravudravua, ko na qai vakaiyau mai lomalagi: ia mo lako mai mo muri au.”⁴

A kacivi koya o Jisu me lewe ni Nona cakacaka—na cakacaka ni tisaipeli. Sa tautauvata na noda cakacaka. Meda sa “kakua ni domona na iyau [sa] vakavuravura, … nanuma tiko na veiyalayalati [eda] sa cakava,”⁵ ka lako vua na Karisito ka muri Koya. Oqo era dau cakava na tisaipeli!

Ia, kemuni na taciqu, meda kakua ni yalolailai baleta ni a vosa o Jisu vua na cauravou vutuniyau me uasivi sara. Na vosa uasivi sara ena itukutuku oqo a vakadewataki mai na vosa va-Kiriki e kena ibalebale na “taucoko.” Ni da sasaga matua meda toso ki liu ena salatu ni veiyalayalati, eda sa na taucoko ka uasivi sara ena bula oqo.

Me vakataki cauravou vutuniyau ena gauna i Jisu, eda dau temaki meda soro se lesu baleta eda dau nanuma ni da sega ni cakava rawa. E dina sara! Eda sega ni cakava rawa na veika dredre meda cakava ke sega na veivuke. Na veivuke e lako mai na Veisorovaki i Jisu Karisito, na veidusimaki ni Yalo Tabu, kei na nodra veivuke mai eso.

E dua na tacida goneyalewa yalodina a kaya ni Veisorovaki, a vakaukauwataki koya ka gadreva me susuga e va na luvei tacina a biuta tu mai ni a mate ena kenisa. Au nanuma kina e dua na ka a vosa kina o Elder Neal A. Maxwell: “Sa cakava na Lotu na veika rawarawa kece e gadrevi me caka. Vakatekivu oqo, na noda cakacaka, kei na noda talairawarawa ena vakatovolei ena sala eso e taleitaki toka.”⁶ O ni sa talai mai ki vuravura ena itabagauna oqo baleti kemuni ga ka vakarautaki ki na nomuni cakacaka! Se cava sara na sasaga nei Setani me vagolei keda mai na veika baleti keda, oi keda dina sa tisaipeli i Jisu Karisito!

A tisaipeli dina o Momani ka bula voli ena gauna “era sa vakaukauwataka na yalodra ko ira kecega, … a sa sega sara na ka ca levu vakaoqo sa yaco e na nodra gauna taucoko na kawa i Liai.”⁷ Ena vakacava beka nomu bula ena gauna o ya? Ia a vakaraitaka vakadoudou o Momani: “Raica, koi au na tisaipeli i Jisu Karisito, na Luve ni Kalou.”⁸

O taleitaki Momani beka? E kilai koya tiko kei na cava nona ilesilesi ka sega ni vakataotaki mai na veika butobuto a wavokiti koya tu. Na ka dina, e raica ni sa isolisoli na nona veikacivi.⁹

Meda vakasamataka na veivakalougatataki ni noda kacivi meda solia na noda isolisoli vakatisaipeli ni veisiga vua na Turaga, ena vosa kei na cakacaka, “Raica, au sa tisaipeli i Jisu Karisito!”

Au taleitaka nona italanoa o Peresitedi Boyd K. Packer baleta e dua na tacida a vakasewasewani ni a muria na ivakasala nei parofita me dau maroroi kakana. O koya a vakalelewa e kaya ni lomolomora na gauna, ena kau na kena kakana maroroi ka soli vei ira eso. A kaya vakamalua o tacida tisaipeli dina, “Ena rawa mada ga meu kauta yani eso na ka.”¹⁰

Au lomani ira na marama ena Lotu, gone kei na qase. Au sa raica nomuni qaqa. Au sa raica nomuni vakabauta. E tiko na veika mo ni solia, ka sa lomamuni mo ni solia. Ko ni sega ni cakava me vakarairai se kilai, me kilai ga na Kalou eda qarava sega ni o kemuni, ka guilecava na ka mo ni saumi kina.¹¹ Sa vakaoqo na cakacaka ni tisaipeli!

Au a sotava walega oqo e dua na goneyalewa mai Filipaini sa mai luluqa tu vakalotu na nona matavuvale ni se qai yabaki 7 walega, ka taubale duadua ena dua na gaunisala rerevaki ki lotu ena veimacawa kece. A kaya ni sa yabaki 14 sa lomana me dina ki na nona veiyalayalati me kilikili kaya me susuga nona matavuvale ni mataka ena itikotiko sa “vakalougatataki ena kaukauwa ni matabete.”¹² Na sala vinaka duadua ni vaqaqacotaki na matavuvale, nikua se ni mataka, o ya me maroroi na veiyalayalati, na yalayala eda vakayacora vei ira eso kei na Kalou.

Sa vakaoqo na cakacaka ni tisaipeli

E dua na tacida yalodina mai Japani kei watina rau a sikova yani na neimami tabana mai Korea. E sega ni vosa vaka-Korea ka lailai nona kila na vosa Vakavalagi, ia a gadreva dina me vakayagataka nona isolisoli talei ka vukea na cakacaka ni Turaga. Sa vakaoqo na cakacaka ni tisaipeli. A vakavulici rau neimami daukaulotu ena buli matakau pepa—na gusu me dola ka sogo. A qai vakayagataka e vica na vosa Vakavalagi me vakavulici rau na daukaulotu me rau “dolava na gusudrau” me wasei na kosipeli—e dua na lesoni rau na guilecava dredre, vakakina o au.

Raitayaloyalotaki kedaru mada vakaminiti ni daru tucake vata tu kei ira na tacida kei na ganeda ena Nona Lotu, ni da sa gu ki liu vakadoudou, vakayacora na cakacaka ni tisaipeli–veiqaravi ka loloma vakataka na iVakabula. E vakaibalebale vakacava vei iko mo tisaipeli i Jisu Karisito?

Na siqeleti kei na sote ni Mormon Helping Hands era sa dara oti e drau na udolu na tisaipeli solibula i Jisu Karisito era taura na madigi mera veiqaravi vakayago. Ia e tiko eso tale na sala ni veiqaravi vaka-tisaipeli yalodina. Me daru raitayaloyalotaka mada eso na ivakatakilakila ni “gadrevi na veivuke” vakayalo sa baleta na cakacaka ni veivakabulai:

Gadrevi na veivuke: itubutubu mera susugi luvedra ena rarama kei na dina
Gadrevi na veivuke: goneyalewa kei na gonetagane, sisita kei ganena, nei kei momo, veitavaleni, tubunigone, kei na itokani dina mera veiqaravi dauveituberi ka soli veivuke ena salatu ni veiyalayalati
Gadrevi na veivuke: ira era vakarorogo ki na veivakauqeti ni Yalo Tabu ka cakacakataka na ivakasala e soli mai
Gadrevi na veivuke: ira era bulataka na kosipeli ena veisiga ena ka lalai ka rawarawa
Gadrevi na veivuke: vakailesilesi ni tuvakawa kei na valetabu mera semati ira tawamudu na matavuvale
Gadrevi na veivuke: daukaulotu kei na lewenilotu mera kaburaka yani na “itukutuku vinaka”—na kosipeli i Jisu Karisito
Gadrevi na veivuke: dauveivueti mera vaqarai ira era sa lakosese
Gadrevi na veivuke: daumamaroya na veiyalayalati mera tutaka na dina kei na dodonu
Gadrevi na veivuke: tisaipeli dina i Jisu Karisito

Ena vica na yabaki sa oti, a cauraka kina vakadoudou vei ira na marama ena Lotu o Elder M. Russell Ballard ka kaya:

“Tekivu nikua ki na siga ena lesu mai kina na Turaga, e gadreva o Koya na marama taucoko ena vuvale yadua, ena tabanalevu yadua, ena itikotiko raraba yadua, ena matanitu yadua era na kalawa yani ki liu ena ivalavala dodonu ka ra vakaraitaka ena nodra vosa kei na cakacaka, ‘Sai au oqo, ni talai au.’

“Na noqu taro oqo, ‘O na dua beka vei ira na marama oqori?’”¹³

Au nuitaka ni da na sauma vakaidina oi keda yadua ena “Io!” Meu tinia ena dua na sere ni Lalai:

Eda sa [luvena yalewa] ni veiyalayalati ka tiko na isolisoli meda solia.
Eda na vakavulica na kosipeli ena noda ivakarau ni bula.
Ena noda vosa kei na ivalavala yadua, eda na kaya:
Keimami vakabauta, ka qaravi Jisu Karisito.14                  

Eda sa tisaipeli dina, ka da sa solia na yaloda dina kei na ligada dauveivuke me vakusakusataki na Nona cakacaka. E sega ni dua na ka kevaka, me vakataki Brynn, ni da ligadua. E sega ni dua na ka ke da se bera ni uasivi sara ka taucoko. Eda sa tisaipeli yalodina sa dau dodoliga yani ka veivukei vakaikeda ena salatu oqo. Sa takosova yani na veitabatamata na matamarama kivei ira na tacida yalodina era sa lakova oti. Eda sa duavata, na veitacini ka lomavata kei ira na parofita bula, daurairai, ka daunivakatakila ena nodra idola ni matabete, eda sa lakovata, vaka-tisaipeli vaka-italai ena gagadre ni yaloda kei na ligada me vakusakusataki na cakacaka ni veivakabulai. Ni da sa cakava tiko, eda sa na vakataka na iVakabula. Sa noqu ivakadinadina oqo ena yaca i Jisu Karisito, emeni.