Devin G. Durrant

Karua ni Daunivakasala ni Mataveiliutaki ni Wilivola ni Sigatabu

Na gauna a kacivi kina vakaikarua ni daunivakasala ena mataveiliutaki raraba ni Wilivola ni Sigatabu o Devin G. Durrant, era a nanuma lesu tale e levu na lewe ni Lotu na nona veisiga lagilagi ena siqeleti ni basiketbol ni Brigham Young University.

Io, na qito sa dua na ka bibi ena bula nei Peresitedi Durrant. A veisisivi ena NBA ena dua na gauna ni qito taucoko vata kei ira na dauqito kilai levu e Amerika. Ia e levu sara o koya mai na dua na dauqito rogo: e daukaulotu mai Madrid e Spain, tagane vakawati, tama, tukanigone, dauvolaivola, daucakabisinisi, lewenilotu yalodina, ka peresitedi ni Tabana ni Kaulotu mai Texas Dallas ena rua veimama na yabaki sa oti.

O Peresitedi Durrant, a sucu ena 20 ni Okotova, 1960, mai Brigham City e Utah, e kaya ni a vakaitavi vakabibi nona vuvale ena gauna ni gone ena nona vakarautaki ki na veiitavi ni bula oqori. O irau na nona itubutubu, o George kei Marilyn Durrant, erau kenadau ena veivakavulici.

“Sa dina sara, erau veivakavulici ena nodrau vosa—ia na ka dina, na veivakavulici cecere au sotava mai vale sai koya na noqu saravi rau toka ena ivakarau e rau bulataka kina nodrau bula.”

Erau kila vinaka o Peresitedi Durrant kei na watina, o Julie Mink Durrant, na bibi ni qasenivuli qaqa ena nodra vakarautaki na daukaulotu ni mataka.

“[O ira na daukaulotu ni mataka] era sa vakavulici vakavinaka mai vei ira nodra itubutubu e vale kei ira nodra qasenivuli mai na lotu kei na veiparokaramu vakasakiti ni semineri kei na inisitute.”

E kuria, ni parokaramu ni Wilivola ni Sigatabu, e rawa kina vei ira na qasenivuli kei na gonevuli ena veitabayabaki kece “me ra veivakavulici ena ivakarau ni iVakabula.”

Erau a vakamau o Peresitedi kei Sisita Durrant ena Valetabu mai Salt Lake ena ika 23 ni Epereli, 1983, ka rau nodra itubutubu e ono na gone ka ono na makubudrau.

Ni bera nona kacivi me peresitedi ni tabana ni kaulotu, a veiqaravi vakabisopi, daunivakasala ena mataveiliutaki ni iteki, lewe ni mataveiliutaki ni Matawilivola ni Sigatabu, ka qasenivuli ni inisitute.

A rawata e dua na diqiri e ra ni American Studies mai Brigham Young University kei na dua na MBA ena University of Utah. O koya na itaukei ni dua na kabani ni volitaki iyauqaqa.