Tad R. Callister

Peresitedi Raraba ni Wilivola ni Sigatabu

Ni vo e tini na yabaki me kacivi ena nona veikacivi oqo vakaperesitedi raraba ni Wilivola ni Sigatabu, a dua na itavi bibi ena bula nei Tad R. Callister na wilivola ni sigatabu.

Ni veiqaravi voli vakaperesitedi ni Wilivola ni Sigatabu ena dua na tabanalevu mai Brigham Young University, erau a veikilai kina kei koya ena qai watina e muri, o Kathryn L. Saporiti, o koya a qai vakamautaka ena ika 20 ni Tiseba, 1968, ena Valetabu mai Los Angeles.

Erau nodra itubutubu e rua na goneyalewa kei na va na gonetagane; sa 24 talega na makubudrau. “E levu na ka vinaka e dau yaco ni o peresitedi ni Wilivola ni Sigatabu,” e kaya o Baraca Callister.

A sucu ena ika 17 ni Tiseba, 1945, mai Glendale, California, vei rau o Reed Eddington kei Norinne Callister, e kaya o koya me vakataki—Nifai—a sucu o koya mai vei rau na “itubutubu vinaka.”

“E noqu bisopi ena gauna au tubu cake tiko kina na tamaqu,” e kaya o Baraca Callister. “E dau kauta voli na imau lalai, me dau cavuqaqataka na vosa vakavalagi eso kei na ivolanikalou kei na italanoa nei Shakespeare.”

Me vakataki tamana, a saga o Baraca Callister me cakacaka vakaloya. Ni oti nona tauriivola ena veika vakafika mai na Brigham Young University, a curu ki na koronivuli ni loya ena Univesiti kei California mai Los Angeles, ka qai laki rawata na diqiri ni master ena lawa ni ivakacavacava mai na Univesiti kei New York. A cakacaka vakaloya ena kabani na Callister & Callister.

Ena gauna e kacivi kina, se qai vagalalataki wale o Baraca Callister mai na nona veikacivi ena Mataveiliutaki ni Vitusagavulu kei na iKarua ni Kuoramu ni Vitusagaulu, a veiqaravi voli kina mai na 2008.

Ni se bera oqori, a veiqaravi o koya vakaperesitedi ni Tabana ni Kaulotu na Canada Toronto East, Vitusagavulu ni iWasewase, mata ni yasana, peresitedi ni iteki, bisopi, peresitedi ni kaulotu ena iteki, peresitedi ni kuoramu ni italatala qase, ni se cauravou a kaulotu ena Tabana ni Kaulotu mai Eastern Atlantic States.

Ni vosa me baleta na veisau sa vakarau yaco ena lewenivuli ni Wilivola ni Sigatabu ni itabaqase, e kaya kina o Baraca Callister, “Io, sa bibi dina sara na lewenivuli, ia e sega ni vaka na bibi ni nodra veivakavulici na tamata. Na ka bibi duadua me da veivakavulici ena nona ivakarau na iVakabula, ka da veivakavulici ena Yalotabu ka vakavulica na saumaki.”