Na Rekitaki ni iColacola ni Bula Vakatisaipeli
Sa ka ni veivakalougatataki na noda tokoni ira na noda iliuliu; e salavata mai kei na noda vakaitavi yadua sara, ena noda vukei ira ena nodra icolacola ni bula vakatisaipeli ni Turaga.
Ena ika 20 ni Me ni yabaki sa oti e a ravuta ka vakacacana kina e dua na cava na yasa ni Siti o Oklahoma, ena loma donu kei Amerika ka rauta ni dua na maile na kena raba ka 17 na maile na kena balavu. Na cagilaba oqo, e vakacacana ka veisautaka sara ga na ituvaki ni vanua kei na nodra bula o ira e donumaki ira na vanua e ravuravu yani kina.
Ni oti ga e dua na macawa mai na gauna e ravuravu kina na cagilaba, au a lesi meu laki sikova na vanua kei ira e vakacacani na nodra itikotiko ni sa kabuwacara e veiyasana na nodra iyaya ni vale kei na veika kece era taukena.
Ni bera niu a gole au a laki veitalanoa vakalailai kei Peresitedi Thomas S. Monson, na noda parofita lomani, ka taleitaka sara ni itavi oqo ni lesi mai vua na Turaga. Ena noqu dokai koya ena vuku ni nona ilesilesi kei na nona sa rui dau yalololoma, au tarogi koya yani, “Na cava ko na vinakata meu na cakava? Na cava ko na vinakata meu na kaya?”
E a qumia vakamalua na ligaqu, me vaka ena cakava vei ira yadua ka sa vakacacani tu mai kea na nona iyau, se dua ka laki veivuke ke a tiko e kea, ka qai kaya mai:
“Na imatai, tukuna vei ira, niu lomani ira.
“Na ikarua, tukuna vei ira niu na masulaki ira tiko.
“Na ikatolu, kerei iko mo vakavinavinakataki ira era sa veivuke tiko.”
Niu lewe ni mataveiliutaki ni Le Vitusagavulu, au vakila na bibi ni ka sa taqa e tabaqu ena vosa e a kaya na Turaga vei Mosese:
“Mo soqona vata vei au e lewe vitusagavulu mai vei ira na qase ni Isireli o ira ko sa kila era sa qase vei ira na tamata, ka turaga vei ira; …
“Kau na lako sobu ka vosa vei iko mai kea, ia na yalo sa tiko vei iko kau na solia vakakina vei ira; io era na colata vata kei iko na kedrai colacola bibi na tamata, mo kakua kina ni colata vakataki iko ga.”1
Oqo na vosa mai na gauna makawa sara, ia na sala ni Turaga ena sega ni veisau rawa.
Ena gauna oqo, ena Lotu sa kaciva kina na Turaga e 317 na Le Vitusagavulu, ka ra sa veiqaravi tu ena 8 na kuoramu, mera vukei iratou na iApositolo Le Tinikarua mera colata na icolacola ka sa taqa tu vei iratou na Mataveiliutaki Taumada. Au rekitaka na itavi oqo mai na boto ni yaloqu ka vakakina vei iratou na turaga Taciqu. Ia, e sega ni o keitou duadua ga keitou veivuke tiko ena qaravi ni itavi cecere oqo. Ni da sa lewena na Lotu ena veiyasai vuravura sa tu vei keda na madigi ni noda na vakalougatataka na nodra bula e so tani tale.
Au a vulica mai vua na noda parofita lomani na veika era gadreva o ira sa vakacacani tu na veika era taukena—loloma, masumasu, kei na nodra vakavinavinakataki o ira era sa veivuke.
Ena yakavi nikua, o keda yadua eda na laveta na ligada meda tokoni ira na Mataveiliutaki Taumada kei na Kuoramu ni iApositolo Le Tinikarua ni ra sa parofita, daurairai ka dauvakatakila ni Lotu i Jisu Karisito ni Yalododonu Edaidai. Oqo e sega ni caka me ka vakarairai, se caka me baleti ira era sa kacivi kina veivuke raraba. Sa ka ni veivakalougatataki na noda tokoni ira na noda iliuliu; e salavata mai kei na noda vakaitavi yadua sara, ena noda vukei ira ena nodra icolacola ni bula vakatisaipeli ni Turaga.
E a kaya vakaoqo o Peresitedi Monson:
“Eda sa vakavolivoliti mai vei ira era na gadreva na noda veivuke, veivakatatataki cake, veitokoni, veivakalomavinakataki, loloma—se era noda matavuvale, noda itokani, veikilai, se vulagi. Eda sa liga ni Turaga oqo e vuravura ka sa noda itavi me da veiqaravi ka vueti ira cake na luvena. O Koya sa vakararavi tu vei keda. …
“‘… ni kemuni a cakava vua e dua sa lalai vei ira oqo … , ni a cakava vei au.’ [Maciu 25:40].”2
Eda na cakava li ena yalololoma ni sa donumaki keda e dua na madigi meda laki sikova e dua, qiri vua, vola e dua na ivola lekaleka, se vakayagataka e dua na siga mo sotava kina na nona gagadre e dua tani tale? Se eda na vakataka na cauravou ka a kaya ni sa vakamuria kece tiko mai na ivunau ni Kalou:
“Na veika kece oqo au sa cakava tiko mai niu a se gone me yacova mai nikua: na cava tale sa vo vei au?
“Sa kaya vua o Jisu, Kevaka ko vinakata mo vinaka sara, mo lako ka volitaka na nomu iyau, ka solia vei ira na dravudravua, ko na qai vakaiyau mai lomalagi: ia mo lako mai ka muri au.”3
Na cauravou o ya e sa kacivi kina dua na veiqaravi e tiko sara e cake ena yasa ni Turaga, me cakava na cakacaka ni matanitu ni Kalou e vuravura, ia, e qai vuki tani, “ni sa ka levu na nona iyau.”4
Sa na qai vakacava na noda iyau vakavuravura? Eda sa raica na ka e rawa ni cakava e dua na cava ena vica ga na miniti. Sa ka bibi sara vei keda yadua me da sa na vakaiyau ga mai lomalagi—meda vakayagataka na noda gauna, noda taledi, kei na noda galala meda qarava na Kalou.
Tomana tikoga na veikacivi o ya o Jisu Karisito “Dou lako mai ka muri au.”5 E a lako voli ga e nona vanua vata kei ira era vakabauti Koya ena yalona taucoko. E se tomana tikoga na nona salavata kei keda, ka na tu tikivi keda, ka liutaki keda. Me da muria na nona ivakaraitaki, sa dodonu meda vakaraitaka ka vakalagilagia na iVakabula, ni o Koya sa mai colata na noda icolacola ka sa mai ia na Veisorovaki, na itavi levu duadua e a qarava. Na ka ga ena kerea o Koya me da na cakava, me da na rawata ka yalodina ena kena rekitaki na icolacola ni bula vakatisapeli.
Ena noqu tiko mai Oklahoma, au a veitalanoa kina kei na vica na matavuvale ka ra vakaleqai ena covulaca rerevaki o ya. Niu sikovi iratou na matavuvale na Sorrel, e a tarai au na ka e a sotava na luvedrau goneyalewa, o Tori, ni a se kalasi lima tiko ena koronivuli na Plaza Towers Elementary School. O koya vata kei tinana, erau tiko vata kei keda nikua.
O Tori kei na so na nona itokani era a veiosoosoti toka ena dua na rumu ni valelailai ni koronivuli me ra vakaruru toka kina ena gauna e a ravulaka tiko kina na koronivuli na covulaca. Ni rogoca meu wilika mada vei keda na ka sara ga e a vola o Tori ka a yaco ena siga o ya:
“Au rogoca e dua na ka ni samulaka na doka ni vale. Au nanuma sara ni a taubi tiko na uca. Sa vaka me rogo levu cake tikoga na rorogo. Au a masulaka me taqomaki keimami kece na Tamada Vakalolamalagi. Vakasauri sa cabolo mai e dua na rorogo sa bi ka sa cavu ivuvu taki na dela ni vale. Sa qai kaukauwa cake na cagi kei na benu era veivukayaki ka so a lauta na yagoqu. E sa buto tu na tuba ka sa vaka sa loaloa tu na lomalagi, ia e sega ni vaka o ya— o ya na loma sara ga ni covulaca. Au sa bobo ga, ka masu me oti totolo mada ga.
“Vakasauri sara sa mai vakanomodi tu yani.
“Niu rai cake yani au sa raica e dua na ivakatakilakila ni tiko vakadua sa tu sara ga e mataqu! E voleka ni tara na ucuqu.”6
O Tori, o tinana, tolu na tacina, kei na so tale na nona itokani era a tiko vata talega kei koya e koronivuli, e vaka e dua na caka mana ni ra a bula mai na covulaca o ya, ia, e vitu vei ira na nodra ilawalawa e sega ni mani vakakina.
Ena mua ni macawa o ya era solia kina na turaga leweni matabete e levu sara na veimasulaki ni matabete vei ira na lewenilotu era a vakaleqai ena covulaca. Au a mani laki solia e dua na veimasulaki vei Tori. Niu sa vakotora na ligaqu e uluna sa basika mai noqu vakasama e dua na tiki ni ivolanikalou taleitaki: “Niu sa lako vata tiko kei kemudou. Au na tiko e yasamudou imatau ka tiko talega e yasamudou imawi, ia na noqu Yalo Tabu e na tiko e yalomudou; era na vakavolivoliti kemudou na noqu agilosi ka laveti kemudou cake.”7
Au vakasalataki Tori me nanuma tiko na siga e a vakotora kina e buradelana na ligana e dua na talai ni Kalou me masulaki koya ka tukuna vua ni a taqomaki ena siga o ya ena nodra veitaqomaki na agilosi mai na covulaca.
Ni da dodoliga yani ka vakabula mai e dua, ena ituvaki cava ga e tu kina, sa ikoya nai vakaraitaki ni loloma vakalou. Oqo na mataqali veiqaravi au a raica mai Oklahoma ena macawa o ya.
Levu na gauna eda na sotava na madigi ni nodra vukei eso ena gauna ni nodra leqa. Me vaka ni da lewe ni Lotu, sa noda itavi bibi “mo dou veivuketaka na nomudou i colacola me mamada kina,”8 “dou tagi vata kei ira sa tagi,”9 “dou vakaukauwataka na liga sa wadamele, kei na duru sa malumalumu.”10
Taciqu kei na ganequ, sa vakavinavinaka tu naTuraga vei kemuni yadua ena nomuni dau tu vakarau mo ni veivuke se levu se lalai ena nomuni dau solia na gauna mo ni mai veivuke ena gaunisala cava ga e rawa mo ni veivuke kina.
E a veivakavulici ena iVola i Momani na Tui o Penijamni ka kaya, “ko ni sa qaravi Koya tiko na nomuni Kalou e na nomuni sa qaravi ira tiko na wekamuni.”11
Ena noda vakanamata kina qaravi ira na tacida kei na ganeda ena rawa ni muataki keda yani kina vakatulewa vakalou ena veisiga ni noda bula, ka na vakarautaki keda meda vakaliuca ka lomana na ka e lomana na Turaga. Ni da sa cakava o ya, eda na raica ni o keda sara ga eda sa Nona tisaipeli. Ni da sa cakava tiko na Nona cakacaka, eda sa na vakila na Nona Yalotabu ni sa tiko vata kei keda. Eda sa na tubu ena ivakadinadina, vakabauta, nuidei kei na loloma.
Au kila ni bula tiko na noda Dauniveivueti, sa i Jisu Karisito; ka sa vosa tiko vei keda vakakina vua na Nona parofita, o Peresitedi Thomas S. Monson, ena noda gauna edaidai.
Meda sa na sotava na reki ka na lako mai ena qaravi ni noda colata na nodra icolacola rawarawa ka lalai madaga sa noqu masu, ena yaca i Jisu Karisito, emeni.