Tukuni na Toso ena Veivaletabu, Tokoni na Vakaitutu Vovou ena Koniferedi Raraba

Ena ono na vula sa oti, “… sa toso ki liu na cakacaka ni Lotu ka sega na ka me tarova,” E tukuna o Peresitedi Monson ena nona vosa idola ni ika 184 ni Koniferedi Raraba Vakayabaki.

Ni vakananuma na vakatabui ni Valetabu na Gilbert Arizona ena 2 ni Maji, 2014, ka vakanamata ki na kena vakatabui na Valetabu e Fort Lauderdale Florida, ka nanamaki ki na kedra vakacavari ka vakatabui na veivaletabu ena vuqa na veiyasai vuravura ena 2014 kei na 2015, e raica kina o Peresitedi Monson ni sa vakacavari na veivaletabu kece sara sa kacivaki oti, sa na 170 kina na valetabu ni Lotu e vakayagataki tiko e vuravura taucoko.

“E dina ni sa vakanamata tiko na noda sasaga ena gauna oqo ki na kena vakacavari na veivaletabu sa kacivaki oti ka na sega ni kacivaki tale e dua na valetabu vou ena dua na gauna lekaleka mai oqo,” e kaya o koya, “eda na tomana tiko na iwalewale ni kena dikevi na gagadre kei na kena kunei na vanua me tara kina na valetabu era se bera tiko mai. Ena qai kacivaki ena veikoniferedi raraba mai muri. O keda na tamata dau tara valetabu ka dau lakova na valetabu.”

Ena koniferedi era a tokoni kina e dua na lewe ni Mataveiliutaki ni Vitusagavulu vou, e va na Vakaitutu Raraba vovou, e dua na mataveiliutaki raraba vou ni Matawilivola ni Sigatabu, kei na 42 na Vitusagavulu ni iWasewase.

Sa kacivi o Elder Lynn G. Robbins ki na Mataveiliutaki ni Vitusagavulu.

Erau sa tokoni o Elder Jörg Klebingat mai Kyiv e Ukraine, kei Elder Chi Hong (Sam) Wong mai Hong Kong e Jaina, me rau veiqaravi ena iMatai ni Kuoramu ni Vitusagavulu. O Elder Larry S. Kacher mai Midway, Utah, kei Elder Hugo E. Martinez mai Arecibo, Puerto Rico, erau a tokoni me lewe ni iKarua ni Kuoramu ni Vitusagavulu.

O Elder Tad R. Callister, ka a veiqaravi voli ena Mataveiliutaki ni Vitusagaulu ka lewena na iKarua ni Kuoramu ni Vitusagavulu, sa tokoni me peresitedi raraba ni Matawilivola ni Sigatabu, kei John S. Tanner kei Devin G. Durrant me rau imatai kei na ikarua ni daunivakasala.

Raica e dua na lisi taucoko ni veitokoni kei na veivagalalataki ena tabana e 26–27, ka raica na itukutuku kei Elder Robbins, na Vitusagavulu kacivi vou, kei na mataveiliutaki raraba ni Wilivola ni Sigatabu tekivu ena tabana 141.

Ni vo e dua na macawa me yaco na koniferedi raraba, a vakayacori ena vale ni koniferedi, na imatai ni soqoni raraba ni marama—me baleti ira kece sara na marama, goneyalewa, kei ira na goneyalewa lalai mai na yabaki walu lako cake. Na soqoni oqo sa sosomitaka na soqoni raraba ni iSoqosoqo ni Veivukei kei na Goneyalewa ka dau yaco tu e liu. Na itukutuku kece mai na soqoni ni marama e rawa ni kunei ena tabana 116–28.

Ni bera talega na koniferedi, a vakavoutaki tale na matabose raraba ni Goneyalewa, ka ra kacivi kina na marama mai na veivanua ena taudaku kei Salt Lake City, okati kina o Peru; Sauca Aferika; Japani; Brazil; kei Brooklyn mai New York, Amerika. Wilika na kedra itukutuku ka raica na itaba ena lds.org/callings/young-women.

“Na iVakabula e kauta mai ki vuravura oqo e dua na itukutuku ni loloma kei na vakanuinui vinaka vei ira na turaga kei na marama kecega,” E kaya o Peresitedi Monson ni mai cava na koniferedi raraba. Meda dau muria tikoga na Nona ivakaraitaki.” E vakadeitaka kina vei ira na lewe ni Lotu kei ira tale eso era vakarorogo ni “Kauwaitaki keda tiko na Tamada Vakalomalagi. Ena tuberi keda ka vakalougatataki keda ni da vakabauti Koya ka vakanuinui Vua.”