Me Tiki ni Noda Bula na Koniferedi

Tovolea mo vakayagataka eso na itaviqaravi oqo kei na taro me tekivu kina na veitalanoa vakamatavuvale se noda vuli yadudua.

Me Baleti Ira na Gone

E vakavulica o Peresitedi Dieter F. Uchtdorf, na iKarua ni Daunivakasala ena Mataveiliutaki Taumada, ni sa rawa meda vakavinavinaka se cava ga na veika kaukauwa eda sotava ena noda bula (tabana e 70). Ni da vakavinavinaka ena vukei keda meda marau ka yalololoma cake vakalevu ka vakabauta ka nuitaka tikoga na Kalou. Na cava o vakila ni ko vakavinavinaka? Na cava o rawa ni cakava mo yalo vakavinavinaka kina ena veisiga?
E talanoataka o Bonnie L. Oscarson, na peresitedi raraba ni Goneyalewa, na itukutuku kei Sarah, e dua na goneyalewa lailai a gole vata kei tinana me laki vukei Brenda, e dua na marama e tauvi mate ni ua. E seruta tiko o Sarah na ului Brenda, livia e ligana na waiwai, ka lumuta na qaqalo ni ligana kei na tabana, ka vukea me vakadodo (tabana e 119). Vakasamataka na sala eso mo veiqaravi kina. Ena gauna mada ga ni ko se gone, e levu na veika o rawa ni cakava.
E vakavulica o Elder L. Tom Perry ena Kuoramu ni iApositolo Le Tinikarua na nona dau vakayagataka e dua na daucakacaka na ivaubeleti kei na ivesu ni gusu me muataka vakamalua kina e dua na timi ni ose (tabana e 100). E kila vakavinaka o daucakacaka oqo, ka na muria na ose na nona veimuataki, me vaka ga na nona kila na Turaga na ka vinaka duadua me baleti keda, ka rawa meda marau nida muri Koya. Na ivaubeleti kei na ivesu ni gusu sa vaka na veivakauqeti ni Yalo Tabu. Na gauna cava beka o a vakila ni dusimaki iko na Yalo Tabu? O a vakila beka vakacava?
E tukuna o Jean A. Stevens, na imatai ni daunivakasala ena mataveiliutaki raraba ni Lalai, na italanoa ni dua na cauravou ni a calata na iotioti ni basi ni siga o ya ka taubale yani ki nodratou (tabana e 81). Ni se vuqa tu na maile me lakova, sa tekivu me rere ka tekiduru me masu. Ni oti e vica na miniti, a vakauqeti Sisita Stevens na Yalotabu me kele me vukei cauravou. E rawa ni o nanuma beka na gauna eso a sauma kina na nomu masu na Tamada Vakalomalagi? O a veivuke beka vakacava mo isau kina ni nona masu e dua?

Me Baleti Ira Na iTabagone

E vakavulica o Peresitedi Thomas S. Monson ni sa dodonu me da na “yaloqaqa me da kaya kina sega ena gauna e dodonu, na yaloqaqa meda kaya io ni ganita, na yaloqaqa meda cakava na ka e dodonu baleta ni dodonu.” Ni ko vulica na nona vosa (tabana e 66), vakasamataka mada na veika o bolei kina. Na ituvatuva cava o rawa ni cakava mo vakatorocaketaka kina na mataqali yaloqaqa vakaoqo?
E vakavotuya kina vei keda o Elder Jeffrey R. Holland ena Kuoramu ni iApositolo Le Tinikarua ni kevaka eda lomana na iVakabula, eda na maroroya na Nona ivakaro ka lomani ira na tamata me vakataki Koya (tabana e 6). Ni da sa vakayacora, meda sa na tu vakarau meda taqomaka na noda vakabauta “ena vakarokoroko kei na yalololoma.” O kila beka e dua e sega ni duavata kei na nomu vakabauta? Ena rawa vakacava mo veidokai tiko ni ko vakamacalataka ka taqomaka na vakabauta oqori?
E vica era vosa sara vakadodonu vei ira na itabagone. Me vaka na nona a vakaraitaka, o Elder Neil L. Andersen ena Kuoramu ni iApositolo Le Tinikarua e vica na sala kivei ira na itabagone mera vorata rawa kina na “covulaca vakayalo” me vakataka na kune vakacegu ena valetabu (tabana e 18). Ni ko wilika na nona vosa kei na veivosa tale eso ni koniferedi raraba, sa rawa mo vola eso na vakasama ni sala eso mo kaukauwa tikoga kina.
E dua vei ira na butobuto rerevaki nikua o ya na iyaloyalo vakasisila. E kaya kina o Linda S. Reeves, na ikarua ni daunivakasala ena mataveiliutaki raraba ni iSoqosoqo ni Veivukei, ni itatarovi vinaka duadua ni butobuto vakaoqo o ya na ivakadinadina tudei ni kosipeli i Jisu Karisito (tabana e 15). E kaukauwa vakacava sara na nomu itatarovi oqo? Na cava o rawa ni cakava mo vaqaqacotaka tiko kina?

Baleti Ira Na Qase

E vakavulica o Peresitedi Thomas S. Monson ni gauna eda sa na kila vakavinaka kina na “isolisoli sega ni vakatauvatani rawa” ni Veisorovaki, eda sa na vakasinaiti meda lomana na Tamada Vakalomalagi, na iVakabula, kei ira taucoko na luvena na Kalou (tabana e 91). Ena rawa vakacava mai na kila oqo me vakatorocaketaka na nomu vulica na bula kei na Veisorovaki ni iVakabula ena gauna ni vulica vakai iko vakakina vakamatavuvale na ivolanikalou kei na gauna ni kalasi ena lotu?
E kaya kina o Peresitedi Henry B. Eyring, iMatai ni Daunivakasala ena Mataveiliutaki Taumada, ni vu levu talega ni nona marau o ya o tubuna vakarua ka a lewena na Lotu, ka veiqaravi vagumatua, ka tudei tiko me yacova na kena icavacava, ka biuta tu mai ki na nona matavuvale na iyau ni inuinui (tabana e 22). Sa rawa mo vola yadua na nodra veiyalayalati kei na cakacaka vakalotu ni nomu lewe ni matavuvale mera tomana tiko ena salatu ni veiyalayalati. Tuvanaka na veika mo vukei iratou kina nomu matavuvale mera ciqoma na nodra veiyalayalati e tarava. Sa rawa mo dikeva na sala eso mera vakayaco-ka kina na nomu veiyalayalati ki na nomu bula mo na solia ki na nomu matavuvale e dua na iyau ni inuinui.
E vakaraitaka kina o David A. Bednar ena Kuoramu ni iApositolo Le Tinikarua ni veika dredre ena rawa ni muataki keda meda vakararavi ga ki na “[dodonu], loloma veivueti, kei na loloma soliwale ni Mesaia Yalosavasava,” me na “vukei keda me da na colata cake na noda icolacola vakamamadataki” (tabana e 87). Ni ko wilika na nona vosa kei na veivosa era tekivu tiko ena tabana e 9, 18, 70, 81, kei na 106, vakaraica na sala eso ena rawa ni vukei iko kina na iVakabula kei na Nona kosipeli mo curuma kina na bolebole ni bula oqo.
Na lewenivuli ni itabagone ni vula o Me sa baleta tiko na parofita kei na ivakatakila. Me tiki tiko ni veivosakitaki ni kosipeli kei ira na itabagone e vale vakakina ena lotu, sa rawa mo vulica na nodrau vosa o Elders Lawrence E. Corbridge (tabana e 103) kei Marcos A. Aidukaitis (tabana e 108) ena Vitusagavulu, mo raica kina na isau ni rua na taro oqo: A cava na vuna era sega ni laivi Josefa Simici kina vakadua o ira na dauveivakatanitaki? Meda na raica vakacava na dina ena vuravura vakaoqo sa dau valuta tikoga vakalevu na ivakavuvuli ni kosipeli?