Colata na Nodra iColacola ena Loloma
Na icolacola e tu vei keda yadua ena noda bula ena vukei keda meda na vakararavi kina loloma veivueti kei na loloma soliwale ni Mesaia Yalosavasava.
Dua tiko na noqu itokani vinaka sara, ka a vinakata ena itekivu ni nona bula vakawati me volia ka taukena e dua na lori lailai ni usa iyaya. Sa vakadeitaka o watina ni sega ni gadrevi na lori, ia a vinakata ga me dua na nona lori vou. Dua na veitalanoa ena veiwali e muria na nodrau sa veisoli vakasama na veiwatini me laurai na kena vinaka kei na kena ca ni na voli e dua na lori vaka o ya.
“Daulomani, ena gadrevi me dua na nodatou lori lailai ni usa iyaya.”
E a taroga yani, “Na cava o nanuma kina ni na gadrevi me dua na nodatou lori lailai ni usa iyaya?”
E a sauma yani na nona taro ena ka e nanuma ni sa na kena isau vinaka duadua. “Vakacava kevaka me na gadrevi na medratou sucu na gone ena dua na gauna ni cava kaukauwa, ka qai gaunisala duadua ga e rawa niu lako kina ki na sitoa meu vodo ena dua na lori vaka o ya?”
E a sauma mai o watina ena matadredredre, “Kevaka me daru volia e dua na lori vou, sa na sega na ilavo me voli kina na sucu—na cava mo leqataka kina na lako kina sitoa ena gauna ni leqa tubokoso!”
Ni sa toso tiko na gauna rau tomana tikoga nodrau veivakasalataki ka yacova na gauna erau sa qai duavata kina me sa voli e dua na lori. Ni se qai voli ga na lori sa gadreva sara ga o noqu itokani me vakaraitaka na yaga ni lori, ka vakadeitaka na vuna levu e gadreva kina me a voli e dua. Sa qai nanuma me sa laki musu buka mada mai veikau me baleta na nona matavuvale. E a gauna tiko ni vula ikelikeli ena loma ni yabaki ka sa tekivu lulutu na ucacevata mai na veiulunivanua ka a nakita tiko me laki musu buka mai kina. Ni sa draiva cake yani ki delana, sa tekivu me vavaku cake tiko ga na ucacevata. Sa kila o noqu itokani na sisisi ni gaunisala ka rawa ni vakavu leqa, ia e sa tiko na nona yalodei ni lori vou oqo ena rawa ni toso ga yani ki liu.
Ka ni rarawa ni a sa sivia tale beka na vanua e lakova o noqu itokani. Ni sa ulia yani na lori kina vanua e a nakita me kele kina ka musu buka, sa sega ni toso rawa na lori, ni sa tao. Eratou sa wirilala taucoko sara ga na va na kena taya ena ucacevata. Sa raica rawa sara ga ni sa sega ni kila na ka me cakava me rawa ni takali tani mai kina ena vanua rerevaki sa tao tu kina oqo. Sa tekivu me madua ka lomaleqa.
Sa qai vakadeitaka o noqu itokani, “Sa vinaka, au na sega ni mai dabe wale toka ga vakaoqo eke.” Sa qai sobu mai ki ra ka tekivu musu buka. Sa vakasinaita sara ga ena mua imuri ni lori ena dua na iusana bibi. Sa qai vakadeitaka o noqu itokani me sa tovolea me sa daraivataka laivi tale mai vakadua mai na vanua o ya na lori. Ni sa veisautaka na qia ka sereka na pawa, sa tekivu me toso yani ki liu. Vakamalua sara ni sa tekivu toso yani na lori ka lako laivi mai na vanua ucacevata kina loma ni gaunisala. Sa qai sereki ka tekivu me sa naulu yani ki vale ena yalomarau kei na vakacegu.
Na Noda iUsana Yadua
Au sa masuta na veituberi ni Yalotabu ena noqu vakabibitaka na lesoni bibi eso e rawa ni vulici mai na italanoa oqo baleti noqu itokani, na lori, kei na buka. Sa ikoya na iusana. Na iusausa buka sa ikoya na ka e a vakavuna na nona dro laivi rawa mai na ucacevata o koya me yaco i gaunisala, ka toso rawa yani ki liu. Nai usana sa ikoya na ka e vakavuna na nona rawa ni lesu rawa tale yani kina ki vale vei iratou na nona matavuvale.
O keda yadua e tiko na noda iusana. Na noda i usana e wili kina na vinakata na ka kei na veimadigi, icolacola kei na ivotavota, leqa kei na kalougata, kei na digidigi kei na vakatatabu. Rua na taro e rawa ni veimutaki ka veivuke ni da dau masulaka na noda iusana. Ena rawa beka kina i usana au cola tiko oqo me solia na idre vakayalo ka na rawa ni dreti au yani ena vakabauti Karisito ena sala rabai lailai ka qiqo ka drotaka na ta o? Ena rawa beka kina i usana au cola tiko oqo me solia na idre vakayalo me na rawa ni dreti au lesu yani ki vale Vua na Tamada Vakalomalagi?”
Ena so na gauna eda na vakacalai ka vakabauta ni bulamarau e yali mai kina na i usana. Ia, na colati ni dua na i usana ena gadrevi ka na dodonu me sotavi ni dua tiko na tiki ni yavu ni bula marau. Me vaka ni na gadrevi kina noda dui i usana me na tiko kina na idre vakayalo, me da na qaqarauni meda kakua ni cola wavoki e levu na ka vinaka ka sega ni bibi ena noda bula ka na dreti keda laivi mai na veika e bibi vakaidina sara vei keda.
Na Veivaqaqacotaki ni Kaukauwa ni Veisorovaki.
Kaya vakaoqo na iVakabula:
“Dou lako mai vei au, oi kemudou sa oca ka colata na icolacola bibi, kau na vacegui kemudou.”
“Vakataqara vei kemudou na noqu ivua, ka vuli vei au; niu sa yalomalua ka yalomalumalumu: dou na qai kunea na vakacegu ni yalomudou.”
“Ni sa rawarawa na noqu ivua ka sa mamada na noqu icolacola” (Maciu 11:28–30).
Na ivua e dua na tolo ni kau ka dau vakayagataki vua e rua na bulumakau se dua tale na manumanu ka na rawa ni rau dre vakatautauvata e dua na i usana. Dua na ivua e dau cokoti rau vata e rua na manumanu me rawa ni rau cakacaka vata me rau na cakava rawa kina e dua na cakacaka.
Vakasamataka mada na veisureti yadudua duatani oqo ni Turaga, meda “vakataqara vei kemudou na noqu ivua.” Na kena caka ka maroroi na veiyalayalati eda sa cola ivua vata tiko kei na Turaga Jisu Karisito. Sa kena irairai ni sa kacivi keda tiko mai na iVakabula meda vakararavi vua ka cola vata kei Koya, dina ga na noda maqosa duadua ena sega ni veiraurau vata kei na ka ena rawata o Koya. Ni da sa vakararavi ka cola vata kei Koya ena ilakolako ni bula oqo, sa dina sara, ni sa rawarawa na Nona ivua ka mamada na Nona icolacola.
Eda sega ka sega ni dodonu meda tu taudua voli ga. Eda na rawa ni qarava tikoga na noda bula ni veisiga ena veivuke vakalomalagi. Eda na rawa ni ciqoma na veivakaukauwataki ena Veisorovaki ni iVakabula, ena “nomuni kaukauwa ga” (“Turaga, Meu Na Muri Kemuni,” Serenilotu, naba. 129). Me vaka ga e a kaya na Turaga, “Raica mo drau ia ga ena nomudrau ilakolako, ka me reki tikoga na lomamudrau, ia au na tiko vata kei kemudrau me yacova na ivakataotioti” (D&C 100:12).
Vakasamataka na ivakaraitaki e tiko ena iVola iMomani ni sa vakararawataki Alama tiko kei ira na nona tamata o Amuloni. E a voqa mai na domo ni Turaga vei ira na tisaipeli oqo ena gauna ni nodra vakararawataki: “Dou laveta cake na ulumudou ka vakacegu niu sa kila tu na veiyalayalati dou a cakava vei au, au sa dau veiyalayalati kei ira na noqu tamata ka vakabulai ira mai na nodra vakabobulataki” (Mosiah 24:13).
Namaka toka na dabe donu ni veiyalayalati ena yalayala ni veivakabulai. Na veiyalayalati e ciqomi ka maroroi kei na cakacaka vakalotu e cakava na dodonu ni matabete sa na ganita me na ciqomi kina na veivakalougatataki ena soli ena Veisorovaki i Jisu Karisito. Baleta ni cakacaka vakalotu ni matabete, ena laurai kina na kaukauwa vakalou ka sa soli vua na tamata ena bula oqo ka wili kina na veivakalougataki ni Veisorovaki (raica na V&V 84:20–21).
Nanuma lesu na vosa e a kaya na iVakabula “Ni sa rawarawa na noqu ivua, ka sa mamada na noqu icolacola” (Maciu 11:30) ena noda vakasamataka na tikina e tarava ena veika a sotava o Alama kei ira na nona tamata.
“Ia au na vakamamadataka na icolacola dou sa vakacolati kina mo dou kakua ni vakila ni dou sa colata” (Mosaia 24:14).
E lewe levu vei keda e nanuma tikotiko ni ivolanikalou oqo e tukuna tiko ni icolacola oqo ena vakasauri na kena na kau laivi sara ga vakadua mai vei keda. Na tikina e tarava e vakaraitaka tiko na kena kau laivi na tikina o ya.
“A sa vakamamadataki na icolacola kece sa vakataqari vei Alama kei ira na wekana. A sa vakaukauwataki; a sa vakaukauwataki ira na Turagame ra colata rawa na nodra icolacola ka soli ira ena yalomarau kei na yalo vosota kina nona lewa na Turaga” (Mosaia 24:15; kuri na kena vakabibitaki).
Na bolebole kei na dredre a sega ni sa kau laivi mai vei ira na tamata ena gauna vata ga o ya. Ia, e a vakaukauwataka o Alama kei ira na tamata kei na nodra sasaga e a vakamamadataka na nodra icolacola. O ira na tamata vinaka oqo era a vakaukauwataki ena Veisorovaki mera cakava na ka ena nodra galala (raica na V&V 58:26–29)ka va qaqacotaki ira. Ia, “ena kaukauwa ni Turaga” (na Vosa i Momani 1:14; Mosaia 9:17; 10:10; Alama 20:4), Alama kei ira na nona tamata era a drotaki bula yani ki na vanua o Saraemala.
Na Veisorovaki i Jisu Karisito e sega walega ni vakamalumalumutaka na revurevu ni Lutu nei Atama ka vakadeitaka na noda rawa ni vosoti ena noda ivalavala ca, ia na Nona Veisorovaki sa vakavuna meda caka vinaka kina ka na vinaka cake sara kina me na tosocake sara kina dua na itagede eda na qai vakananuma tale tu se a rawa vakacava na kena o ya. E levu vei keda e kila ni da sa caka cala ka gadreva na veivuke me da vakamalumalumutaka na revurevu ni ivalavala ca ena noda bula, sa vakarautaka tu na iVakabula vei keda ni da na vakasavasavataki ena nona kaukauwa ni veivueti. Ia eda kila tiko li ni Veisorovaki e baleti ira na tamata vakabauta ka ra sa talairawarawa ka buladodonu ka sa tovolea tiko mera veiqaravi ena yalodina? Au vakananuma tiko ke da na sega ni vakila tiko na kaukauwa e tiko ena Veisorovaki ena noda bula ka qai vakabauta tu vakatikina me da sa na cola duadua tu ga na noda iusana ena noda kaukauwa vakaikeda kei na yalo ni sasaga mai na noda kaukauwa vakaiyalayala.
Dua na ka na noda kila ni o Jisu Karisito e a lako mai ki na vuravura me mai mate ena vukuda. Ia e dodonu talega me da na vakavinavinakataka ni gadreva na Turaga ena nona Veisorovaki kei na kaukauwa ni Yalotabu me vakabulabulataki keda—sega walega me veituberi tiko yani, ia me veivakaukauwataki ka veivakabulai.
E Vukei Ira na Nona Tamata Na iVakabula
E a vakamacalataka o Alama na vuna kei na ka me caka ena nona vukei keda na Turaga:
“Ia, ena mai vunau voli ko Koya; ena vosota na ka rarawa, na veivakararawataki, kei na veivakatovolei kecega a sa yaco na ka oqo me vakayacori kina na vosa sa tukuni ni na colata ko Koya na nodra rarawa kei na nodra ivalavala ca na nona tamata.
“Ena soli koya me mate me sereka kina na ivesu ni mate sa vesuki ira tu na nona tamata, ia sa mai bula vakatamata ko koya me kila kina na nodra malumalumu na nona tamata, ka vakabulai ira ena nona yalololoma.” (Alama 7:11–12).
Sa mai vakararawataki nai Vakabula ka sega walega ena noda ivalavala ca kei na caka ca ia ena mosi talega vakayago kei na rarawa, na noda malumalumu kei na ivalavala ca, na noda rere kei na taqaya, na noda yalaolailai kei na noda yaloveilecayaki, na noda madua kei na na mosi ni yalo, na kena sega ni veiriti na itotogi kei na sega ni veiraurau na veika e sa sotavi oti mai.
E na sega na mosi vakayago, sega na mavoa vakayalo, sega na madua ni yalo se mosi ni yalo, sega na veilecayaki ni yalo, sega ni veivakamalumalumutaki se veivakacacani, me daru na vorata ena bula oqo, me a sega ni sotava taumada na iVakabula. Ena dua ga na gauna lekaleka ni malumalumu eda na kacivaka cake, “E sega ni dua me kila. Ena sega ni dua ena kila” Ia, na Luve ni Kalou ena raica ka kila vinaka tu, ni a sa vakila ka sotava oti na icolacola yadua. Me vaka ni o Koya sa vakacacabo oti, (raica na Alama 34:14), sa tu Vua na dodonu ka na rawa ni solia na nona loloma ka dodoka na ligana dauloloma. Ena rawa ni dodoka na ligana me tara me vueta, ka vakabula ka vakaukauwataki keda me da na rawa ni rawata na veika ena sega ni da rawata kevaka meda vakararavi tu ga ena noda kaukauwa. Sa dina sara ni Nona ivua sa rawarawa ka sa mamada na Nona icolacola.
Dua na Veisureti, Dua na Yalayala, kei na Dua na iVakadinadina
Au sureti kemuni mo ni vulica, masulaka, vakasamataka ka sasagataka mo ni kila e levu na ka baleta na Veisorovaki ni iVakabula ena nomuni vakananuma tiko na nomuni icolacola. E levu na ka baleta na Veisorovaki ena sega ni rawa ni da na kila ena noda vakasama vakayago. Ia, e levu na ka baleta na Veisorovaki e na rawa ka dodonu meda kila.
O noqu itokani, na iusausa buka e a solia vua e dua na idre ni veivakabulai levu. E a sega ni toso rawa na lori ena ucacevata ni a lala tu, dina ga ni a tiko kina na iyaragi ni lori e tu na kena iyaragi me rawata. E a gadrevi e dua na iusana bibi me na dreti ka toso rawa kina.
O ya na i usana, Sa ikoya na i usana ka vakarawarawataka na idre ki liu me lako laivi mai na vanua e tao tu kina ka toso yani ki gaunisala me vakavuna na nona lesu rawa tale o noqu itokani vei iratou na nona matavuvale.
Na icolacola e tu vei keda yadua ena noda bula ena vukei keda meda na vakararavi kina loloma veivueti kei na loloma soliwale ni Mesaia Yalosavasava (raica na 2 Nifai 2:8). Au vakadinadinataka ka yalataka ni iVakabula ena vukei keda meda na colata cake na noda icolacola vakamamadataki (raica na Mosiah 24:15). Ni da sa cola vata kei Koya na icolacola ena veiyalayalati eda sa vakayacora ka ciqoma na veivakaukauwataki ni Nona Veisorovaki ena noda bula, eda sa na qai gumatua meda na kila ka bula ena Nona lewa. Eda sa na qai masulaka talega na veivakaukauwataki meda na vuli, veisau, se ciqoma na veika sa yaco ka sega ni sa masu tikoga me veisautaka na Kalou na veika eda sotava ena nona lewa. Eda a na qai dauveiqaravi ka guta me da cakava na ka, ka sega ni waraka me tukuni na ka me da cakava (raica na 2 Nifai 2:14). Eda sa na qai vakalougatataki vakayalo ena idre ni toso ki liu.
Me da sa cakava ka me da na vinaka cake ena Veisorovaki ni iVakabula. Edai na ika 6 ni Epereli. Eda kila ena vakatakila ni edai na tikinisiga dina vakadeitaki ni nona sucu na iVakabula. Na ika 6 talega ni Epereli na siga a tauyavutaki kina na Lotu i Jisu Karisito ni Yalododonu Edaidai. (Raica na V&V 20:1; Harold B. Lee, “Strengthen the Stakes of Zion,” Ensign, July 1973, 2; Spencer W. Kimball, “Why Call Me Lord, Lord, and Do Not the Things Which I Say?” Ensign, May 1975, 4; Spencer W. Kimball, “Remarks and Dedication of the Fayette, New York, Buildings,” Ensign, May 1980, 54; Discourses of President Gordon B. Hinckley, Volume 1: 1995–1999 [2005], 409.) Ena Siga ni Vakacecegu tabu ka vakasakiti oqo, au sa vakadinadinataka ni o Jisu Karisito e noda Dauniveivueti. O Koya e bula tiko ka na veivakasavasavataki, veivakabulai, veituberi, veimaroroi, ka veivakaukauwataki vei keda. Au vakadinadinataka ena yalo e reki na veika oqo ena yaca tabu i Jisu Karisito, emeni