Tukuni ena Mataveilawa na Veiqaravi, Vakabauta

Era solia na Yalododonu Edaidai na veiqaravi ka wasea na nodra vakabauta e vuravura taucoko. Na ripote ni veiitaviqaravi vakaoqori e dau laurai ena mataveilawa ni itukutuku ni veimatanitu, ka dau vakalekataki ena newsroom.lds.org, ivurevure vakadonui ni Lotu me baleta na tabana ni itukutuku, iliuliu dau soli vakasama, kei na tabana raraba.

Ena iwasewase ni Pasifika, era solia na Yalododonu Edaidai na wai, kakana, ivaro vakamisini, ivakadewa ni wai, idini ni livaliva, kei na iyaya tale eso ni leqa tubukoso me vukei ira mai Toga ni oti na vakacaca ni Cagilaba o Ian. Mai Samoa, era vakaitavi na itabagone ni YDE ena dua na soqo sigarua ni veimatalotu ena veivakayaloqaqataki vakayalo, na ivakatagi, meke, kei na qito.

Mai Brazil, era veivuke na lewe ni Lotu era vakaisiqeleti tu ni Mormon Helping Hands ena sasaga ni sasamaki kei na votai ni iyaya ni oti na kena vakacacani na veitikotiko kei na bisinisi ena ualuvu ka sa sega kina nodra vale e lewelevu. Ena veivanua tale eso, era veivuke na lewenilotu ena kena veivotayaki, ni oti nona solia na Tabana ni Veiqaravi Raraba ni Lotu e 211 na idabedabe vaqiqi vei ira era vakaleqai tu. Ena gauna oqo mai Brazil sa yacova na kena iwiliwili taucoko e 700 na idabedabe mai na isolisoli se yaco tikoga oqo.

Mai Aferika, era duavata na veitabana ni matanitu kei na veimatanitu tani vata kei na Tabana ni Loloma ni YDE, na liga ni veiqaravi raraba ena Lotu, ena imatai ni sasaga vakamatanitu mai Ghana me valuti na misila ena nodra cula na gonelalai me yacova na yabaki 14. Mai Nigeria kei Ghana, era vukei e udolu na tamata ena 100 na veitikotiko ena nodra cokovata na Yalododonu Edaidai ena veitabayabaki me ra tara na ikawakawa, tei vunikau, werewere, boroboro, samaka ka vakarairaivinakataka na itikotiko. Mai Zimbabwe, era bolea e sivia ni 60 na itabagone me ra soli dra. Mai Sauca Aferika, a digitaki o Nozibele Makanda e dua na Yalododonu Edaidai, ka tinadratou e ono na gone, me turaganikoro kei Queenstown, e dua na siti 200,000 na lewena.

Mai Amerika e Loma, era cakacaka vata kei na matanitu vakaitikotiko e 500 na itabagone ni YDE mai Guatemala me ra tea e 1,944 na vunikau. Mai Costa Rica, sa yaco na veivalenilotu ni YDE me vanua ni vakasoqoni sucu, ka ra veivuke e 370 na voladia ni Lotu ena kena kau ki na veisitoa era vakaitavi tiko ena itaviqaravi ni nodra vukei o ira era vakaleqai tu.

Mai Canada, era cakacaka na Yalododonu Edaidai kei ira ena Christian-Jewish Dialogue ni Montreal (Quebec) me vakarautaki na veivakatarogi ena vidio ni se bera na kena rogoci na matanitu me baleta na veika yaga. O ira era vakatarogi era vosa tokona na nona soli koya na itikotiko ena rokovi, ciqomi, vosoti, kei na galala vakalotu, ka vakabibitaki kina na kena bibi na lotu ena nodra bula e vuqa na lewei Quebec.

Me baleta na lisi ni mataveilawa ni tabana ni itukutuku ni veimatanitu ena veivosa e vuqa, raica na mormonnewsroom.org/newsroom-country-sites.