Vakayagataka na Lotu na iVakavuvuli ni Welefea ena Vakacoko mai Filipaini

Ni oti e vica vata na vula na kena liwa na Cagilaba o Haiyan mai Filipaini ena Noveba ni 2013, ka vakarusa kina e voleka ni 1.2 na milioni na vale ka vakamatea e sivia ni 6,200 na tamata, sa tomana tiko na Lotu na nona veivuke, sa vagolei na sasaga mai na iwali totolo ni leqa ki na veivuke me baleta na gauna balavu. E dua na sasaga ka toso sara tiko vakavinaka na nodra vakaitavi na voladia era sa vulica me ra tara na vale me baleti ira se bera tikoga ni dua nodra vale.

O ira na lewenivanua oqo ka ra a vakaleqai mai na cava sai ira eso era a vakaraitaka na nodra vakavinavinaka ena vuku ni veivuke era a ciqoma mai na Lotu, dina ga ni ra sega ni Yalododonu Edaidai:

E dua na marama a dro ki na dua na valenilotu ni Momani ena gauna ni cagilaba a qai kila e muri ni sa vakarusai na nona vale ni ra baleka na vuniniu. E sega vei iratou vakamatavuvale na iyaragi me vakavinakataki kina, ia era a vukei koya na voladia me tara e dua na vale vou, ka sa vukea tale tiko ena gauna oqo e dua na matavuvale me tara e dua nodratou vale vou. “Au sa vulica meu cakacaka vata kei ira era vakaleqai tale tu ga e ke, me rawa ni keimami vueti vata [mai na cagilaba],” e kaya o koya.
E dua na turaga sa sega nona cakacaka ni sa vakarusai na bisinisi a cakacaka voli kina sa vulica tiko ena gauna oqo me tara vale me baleta nona matavuvale kei ira tale eso. “Keimami kila ni gadrevi me keimami veivukei me rawa ni vakaoti vakatotolo na cakacaka,” e kaya o koya, ka vakuria na nona vakavinavinaka ena sasaga ni Lotu me veivuke.

E kaya na Bisopi Vakatulewa o Gary E. Stevenson ni, salavata kei na nodra vukei na dravudravua kei na vakaleqai, “eda sa raica sara tu ga oqo na ivakavuvuli ni bula rawati koya, ka veivakurabuitaki dina.” E kaya o koya, “E dua na ka keimami tovolea tiko me caka me soli na iyaya ka ra qai cakacakataka o ira era [vukei]. O ira e soli vei ira na vale era sa cakacaka tale tikoga me ra tara na vale oqori.”

O ira na veiliutaki ni Lotu ena nodra vanua kei ira na mata ni veiqaravi raraba era sa sotavi ira tiko na iliuliu vakaitikotiko me ra veituberi ka veivakadeitaki ena veicakacaka vakamatai vei ira sa tu vei ira na kena kila. Sa vakayagataki na ivurevure eso mai na iLavovure ni Vuli me ra kau mai e 20 na kena dau ni cakacaka vakamatai me ra veivuke ena veivakavulici, ka sa tara oti kina e 2,000 mai na 3,000 na vale a navuci.

Era vakaraitaka na veika era sa vulica na lewenivanua era a tuberi ena nodra tara e 10 na vale me ra rawata kina na veivakadeitaki ni matanitu kei na dua na kisi ni iyaya vakamatai mai na Lotu, sa rawa kina vei ira me ra kunea na cakacaka. Sa dua na ka na gadrevi vakalevu ni tamata cakacaka ena tabana ni taravale ka ratou sa vakadonuya kina na Catholic Relief Services me ratou vakacakacakataki ira e drau vakadrau na matai era tuberi mai na Lotu YDE.

E kaya o Bisopi Stevenson ni 500 na lewe ni Lotu era a tiko ena dua na soqoni era a vakamacalataka kina na iliuliu vakalotu na veituberi kei na veivakadeitaki ni cakacaka, “ia ni sa vakamacalataki vei ira oqo, era vakasausau ka turu na wainimatadra, era kila ni sa rawa me ra raica e dua na sala … me ra ivurevure ni bula ki na nodra matavuvale.”

Sa cakacaka talega na Lotu kei ira e vica vata tale na isoqosoqo ni yalololoma vakakina na matanitu o Filipaini ena dua na sasaga toso tikoga me vakau yani na kakana, wai, yaya ni veiqaravi vakavuniwai, kato ni tiko savasava, idini ni livaliva, iyaya ni vakaruru, iyaya ni vakasaqa, iyaya ni siwa, ke na sorenikau me teivaki.

Sa vulica na Lotu ni sala vinaka duadua me sotavi kina na leqa tubukoso sai koya me cakacakataki ga ena noda veivanua, voli na iyaya e gadrevi ena veivanua e yaco kina na leqa, na kena voleka duadua ki na vanua e yaco kina na leqa. E sega walega ni vakadeitaka ni na veiganiti na iyaya e voli ki na vanua oya, ia ena veivuke talega ki na bula vakailavo ni vanua oya.

Eda sa vakayaloqaqataki na lewenilotu e vuravura raraba me da masulaki ira era sotava tu na leqa tubukoso ka yawa sara mai na vanua era tu kina, ka vakasamataka me ra vakalevutaka na nodra isolisoli ni lolo se ra cau ki na ilavo ni veiqaravi raraba ena Lotu.