Elder Larry S. Kacher

Karua ni Kuoramu ni Vitusagavulu

Ni oti e vuqa na veivakauqeti ena nona veiyabaki vakaitabagone qase cake, sa tekivu me kila o Elder Larry S. Kacher e dua na kaukauwa cecere ni tuberi koya voli ena nona bula. Ni yabaki 19, a tuberi koya ki na kosipeli i Jisu Karisito na nona dau kidakida ki na Yalotabu —e dua na veisau sa vakavuna na duidui kecega.

A sucu ena ika 12 ni Feperueri, 1952, na ikarua ni qase duadua vei ira e lima na gone ka a sucu vei rau o Albert kei Elaine Kacher; a tubucake mai Bloomington, Minnesota e Amerika.

Ni oti na vulitorocake a lako ki Iurope me laki vakasisisi, ni oti e ono na vula mai kea sa vakila ni gadreva me lesu tale mai ki vale. Ni yaco mai ki vale, a vakila ni gadreva me lako tale ki na dua na vanua ia e sega ga ni kila se ki vei. A nakita e dua nona itokani ena gauna ni gone me toki ki Utah, sa mani nanuma o Elder Kacher me toki vata kei koya. Ni tiko voli mai Utah, a curu o Elder Kacher ena Brigham Young University, vulica me baleta na Lotu, ka papitaiso.

“Ni rau vakavulici keitou na daukaulotu, au vakila ni dina,” e kaya o koya. “Niu masu, au vakila ni dina na Lotu.”

A nanuma me laki kaulotu ka kacivi ki na Tabana ni Kaulotu na Tahiti Papeete ena 1973. Ni lesu mai ki vale, a lesu tale ki vuli ena BYU, ka sotavi Pauline Miller kina. Erau a vakamau ena valetabu mai Manti Utah ena 29 ni Okotova, 1976, ka rau nodra itubutubu e ono na gone ka tubudra e 11 na makubudrau.

A rawata o Elder Kacher e dua na diqiri ni bejila ni psychology kei na dua na diqiri ni master ena organizational behavior—rawa ruarua mai BYU. Nona cakacaka e oka kina na dauveivakasalataki ki na veikabani lelevu e loma ni matanitu kei na veimatanitu tani.

Ni bera ni tokoni ena ika 5 ni Epereli, 2014, me lewe ni iKarua ni Kuoramu ni Vitusagavulu, a veiqaravi o Elder Kacher vakaperesitedi ni itabana, peresitedi ni kuoramu ni italatala qase, bisopi, ka daunivakasala vua na peresitedi ni iteki. A vakatulewataka na Tabana ni Kaulotu na Switzerland Geneva mai na 2000 ki na 2003. Ni oti e vica na yabaki nona lesu mai Switzerland, a kauti koya nona cakacaka ki Abu Dhabi, ena United Arab Emirates, ka laki kacivi kina me imatai ni Vitusagavulu ni iWasewase ena Tokalau e Loma.