2014
Meda Kakua ni Muri Cala
Me 2014

Meda Kakua ni Muri Cala

Mai vei Elder Claudio D. Zivic

Ena Vitusagavulu

Sa noqu masu ni da na sega ni gole vakamataboko ka meda sa sema tikoga ki lomalagi.

A vakatovotovo taba piano tiko e dua na cauravou lailai, ka raici koya sara e dua na dauveivoli, ena katubaleka, ka taroga, “Tiko beka ivale o tinamu?”

A kaya kina o cauravou lailai, “Ia … cava beka nomu nanuma?”

E ratou dautaba piano na luvei keirau e lima, au vakavinavinaka kina vei watiqu dauveivakauqeti! Ni yaco yani i vale o qasenivuli, e dau cici ka laki vuni o luvei keirau o Adrián me kua ni tauri lesoni. Ia dua na siga, a yaco e dua na ka totoka! Sa tekivu me taleitaka sara vakalevu na ivakatagi ka sa vakatovotovo ga vakataki koya.

Kevaka meda na yacova na tikina vakaoya ena noda saumaki mai, sa qai totoka dina. Sa na dua na ka talei meda gadreva vakatitobu na maroroi ni vunau ka me kakua ni dua me tukuna tikoga vei keda ka meda sa vakadeitaka vakaidina ni noda muria na salatu dodonu, eda na taukena na veivakalougatataki sa yalataki tu ena ivolanikalou.

Ena vica na yabaki sa oti au a gole ki na Arches National Park vata kei watiqu; luvei keirau yalewa, o Evelin; kei na dua na neitou itokani. E dua vei ira na icurucuru totoka duadua e vakatokai na Delicate Arch. Keitou nanuma me keitou sa taubaletaka yani e 1.5 na maile (2 km), kabata na ulunivanua me keitou yacova yani na icurucuru.

Keitou sa tekivu ena kena sala ena marau levu, ia vakalailai ga ki liu, ratou sa via cegu na kena vo. Ena noqu gadreva meu yaco i kea, au sa mani taubale duadua ga yani. Ena noqu sega ni raica tiko na sala meu goleva, au sa laki muria sara e dua e tiko e liu, e vaka me kila tu o koya na ilakolako o ya. Sa vaka me dredre tikoga mai na gaunisala o ya, kau sa rika mai na dua na vatu ki na dua tale. Ena vuku ni dredre oqo, au sa vakadeitaka ni ratou na sega ni rawata na marama ni noqu lawalawa. Vakasauri ga au sa raica sara na Delicate Arch, ia au kurabui vakalevu, niu sa tu ena vanua ka sega ni dodonu meu yacova rawa.

Au a nuiqawaqawa sara, kau sa mani suka lesu. Au tokatoka ca keitou veitomani tale. Au a taroga sara yani “Dou a yaco rawa i Delicate Arch?” E ratou kaya ena marau ni ratou a yacova. Ratou a vakamacalataka ni ratou a muria na ivakatakilakila ni gaunisala, ena qaqarauni kei na sasaga, e ratou a yacova rawa na vanua o ya.

E ka ni rarawa, niu a gole cala. Sa qai dua na ivakavuvuli levu au a vulica ena siga o ya!

Sa dau vakavica na noda calata na sala dodonu, eda vakatara meda kuitaki ena ivakarau kei vuravura? Meda sa qai tarogi keda tiko keda sa cakava tiko na vosa i Jisu Karisito.

E tiko e dua na ivakavuvuli totoka ena ivola i Joni:

“Dou tu vei au, kau na tu vei kemudou. Me vaka sa sega ni vua rawa na tabana vakai koya, kevaka sa sega ni tu vata kei na vaini; ena vaka talega kina koi kemudou, kevaka dou sa sega ni tu vei au.

“Oi au na vaini, koi kemudou na tabaqu: ko koya sa tu vei au, koi au talega vei koya, sa vua vakalevu: ke dou sa tawase tani vei au, dou sa sega ni rawata e dua na ka” (Joni 15:4–5).

Ni da vakayagataka na ivakaraitaki oqo, eda na raica na voleka sara, ni veiwekani cecere e tiko vei keda vata kei Jisu Karisito kei na keda bibi koi keda yadua ki Vua. Sai Koya na waka kei na dulumi sa vadrodrova vei keda na wai ni bula, na ivurevure meda na bula kina ka meda vua sara vakalevu. E vakavulica vei keda o Jisu Karisito ni oi keda eda sa tabana—se tamata sa vakararavi Vua—eda na sega ni vakawalena na bibi ni Nona veivakavulici.

E tiko eso na cala e rawa ni bibi, kevaka meda sega ni vakadodonutaka ena kena gauna, era na rawa ni vagolei keda cala. Keda sa veivutuni ka ciqoma meda vakadodonutaki, ena yaco oqo me vakayalomaluataki keda, veisautaka noda ivakarau, ka vakavolekataki keda lesu vei Tamada Vakalomalagi.

Meu vakaraitaka e dua na ivakaraitaki ni vakasama oqo mai na dua na gauna rarawa a sotava o Parofita Jopsefa Simici. Ena ka oqo, sa solia mai kina na iVakabula na ivakavuvuli cecere meda dau nanuma tiko ena noda bula taucoko. A yaco ena gauna a vakayalia kina o Martin Harris e 116 na draunipepa vakadewataki oti ni imatai ni wase ni iVola i Momani.

Ni sa veivutuni ni sega ni muria na ivakasala ni Kalou, a ciqoma na Parofita na ivakatakila e tukuni tiko ena wase 3 ni Vunau kei na Veiyalayalati (raica na Nodra iVakavuvuli na Peresitedi ni Lotu: Josefa Simici [2007], 75–78). Mai na ka e volai ena tikina e 1 ki na 10, au gadreva meu vakacilava e tolu na ivakavuvuli meda daunanuma tiko:

  1. Na cakacaka kei na inaki ni Kalou ena sega ni tarovi rawa.

  2. Meda kakua ni rerevaka vakalevu cake na tamata mai vua na Kalou.

  3. Sa gadrevi na veivutuni tikoga.

Ena tikina 13, e vakavulica kina na Turaga e va na itovo meda kakua vakadua ni cakava:

  1. Beca na ivakaro ni Kalou.

  2. Voroka na yalayala cecere duadua e vakayacori vua na Kalou.

  3. Vakararavi ga ki na noda vakatulewa.

  4. Boletaka na noda vuku.

Sa noqu masu ni da na sega ni gole vakamataboko ka meda sa sema tikoga ki lomalagi, ka me kakua ni da kuitaki ena kui kei vuravura.

Kevaka e dua vei kemuni sa voleka tiko ni biuta na sala ni Turaga—ni vakacagau na ilakolako oqori—ena yalo rarawa ko na vakila na gaga ni beca na ivakaro ni Kalou, ni ko voroka na yalayala cecere o vakayacora e mata ni Kalou, ka nuitaka ga nomu lewa, se nomu boletaka ga nomu vuku.

Ke sa yaco oqo, au sa vakamasuti iko mo veivutuni ka lesu mai ki na salatu dodonu.

E dua na gauna a kacivi tukana e dua na makubuna me vakanuinui vinakataki koya ena nona siganisucu. A taroga se sa yabaki vica. A kaya ni yacova na vitusagavulu. A vakasama vakalailai o makubuna tagane ka taroga, “Tukaqu, o a tekivu sara mai na 1?”

Ena gauna ni gone kei na itabagone, era nanuma ni ra na sega ni qase mai; na vakasama ni mate e sega ni laurai—oya vei ira era sa qase sara—ni yacovi mai ni gauna o ya e se yawa kalia sara. Ni toso na gauna, vula kei na yabaki, me yacova ni sa laurai na salulu ni yago, sa yaco na malumalumu, sa levu na gauna ni laurai mai vei vuniwai, kei na veika tale eso.

Ena yaco mai na siga eda na laki sota tale kei noda Dauveivueti ka iVakabula, o Jisu Karisito. Sa noqu vakamamasu ni yaco mai na gauna tabu ka talei oqo eda na kilai Koya ena vuku ni noda kilai Koya kei na noda vakamuria na Nona ivakavuvuli. Ena qai vakaraitaka mai na ligana kei na yavana, ka da na duavata ena veimokomoko tawayalani, tagi ena reki ni da a muria na Nona sala.

Au vakadinadinataka ki na tutu e va kei vuravura ni bula tiko o Jisu Karisito. A vakamasuti keda kina “Oi kemudou na veimatanitu e vuravura, dou vakatudaliga ka rogoca na vosa ni Kalou ka a buli kemudou” (V&V 43:23). Meda sa qai gugumatua ena ququmi tiko, dauvakarogoca, kila vakavinaka, ka vakadewataka vakadodonu na itukutuku “ni Kalou a buli [keda]” meda kakua kina ni gole tani mai na Nona sala, sa noqu vakamamasu ena yaca i Jisu Karisito, emeni.