Taqomaki mai na iYaloyalo Vakasisila—Matavuvale Vakaliuci Karisito

Mai vei Linda S. Reeves

Karua ni Daunivakasala ena Mataveiliutaki Raraba ni iSoqosoqo ni Veivukei

Na itatarovi vinaka duadua e vuravura … sa ikoya na itatarovi ka tiko e lomada sa ikoya na ivakadinadina titobu ka kaukauwa.

Kemuni na taciqu kei na ganequ, nikua au kalougata ni ra tiko oqo na 13 ni makubuqu qase cake ena koniferedi. Oqo e vakavuna meu taroga “Na cava au na vinakata me ratou kila na makubuqu?” Ena mataka nikua au na gadreva meu vosa sara ga vakadodonu vei ira na noqu matavuvale kei ira na nomuni.

Eda sa kauwai sara tiko vakalevu na iliuliu ena vuku ni veivakacacani sa vakayacora tiko na iyaloyalo vakasisila ena nodra bula na lewe ni Lotu kei na nodra matavuvale. O Setani sa valu sara tiko mai ena kena e rerevaki duadua.

Dua na vu ni noda mai bula e vuravura meda vulica ka vakatulewataka na veika e dau gagadre kina na yagoda. Na veigagadre va- Kalou oqo ena vukei keda meda na gadreva na vakawati ka vakaluveni. Na nodrau na veikilai vakatitobu sara na tagane kei na yalewa ena bula vakawati e na vakavureya mai na nodra na mai sucu na gone e dodonu me dua na ka e totoka, ka veilomanitaki ka na semati rau vata e rua na yalo sa veilomani sara vakayago ka vakayalo, ka na kauta mai na vakataucokotaki ni bula rekitaki ka marautaki, ena noda sa vulica me da sa na veivakaliuci. E a vakavulica o Peresitedit Spencer W. Kimball ni ena bula vakawati, “na itokani vakawati … sa qai yaco me cecere duadua kina bula nei tagane se yalewa vakawati, … [ena sega] tale ni dua na gagadre [se] tamata[se]dua na ka me na ulabaleta na itokani vakawati. …

“Ni bera na vakamau sa gadrevi taumada na duavata me taucoko kei na lomavata e taucoko.”¹

Ena vica na yabaki sa oti au a raica ni vaka e lomabibi voli e dua vei iratou na luvei keirau. Au a curu yani e nona rumu, ka talaucaka mai vei au o koya ni a tiko ena nodratou vale e dua na nona itokani ka a raica vakacalaka ena sikirini ni retio yaloyalo e so na ka veivakurabuitaki ni dua na tagane kei na dua na yalewa erau sega tu ni vakaisulu ka rau cakava tu e so na ivukivuki e matalia sara vua. E a tekivu me tagi ka vakaraitaka na levu ni ca ni yalona ena vuku ni ka e a raica vakacala-ka ka vinakata me kauta laivi mai na nona vakasama. Au vakavinavinaka ni a talaucaka kece mai vei au, ka solia vei au na madigi meu vakayalovinakataki koya ka vakaceguya na yalona ka vukei koya me kila ni na ka e rawa ni cakava me vakacegui mai kina ena Veisorovaki ni iVakabula. Au nanuma noqu vakauqeti vakayalo ni keirau sa tekiduru vata, tina kei luvena, ka kerea na veivuke nei Tamada Vakalomalagi.

E lewe levu na gonelalai, na itabagone, kei ira era qasecake, era sa vesuki tu oqo ena iyaloyalo vakasisila, ia e levu ga na tagane kei na yalewa era sa digitaka tu mera na dau sarava ka baci laki sarava tale me yacova sara ni ra sa vesuki kina. O ira oqo era na rawa ni gadreva me ra na sereki mai ena ivesu oqo ia era sega ni rawata mera vakamalumalumutaka ga vakataki ira. Eda vakavinavinaka ni ra sa digitaka mera mai wasea vei keda ni sa itubutubu se vua e dua na iliuliu ni Lotu na veika oqo. Me da na kakua ni kidrowa kina, meda cudruvi ira kina, se meda sega ni vinakati ira, ena rawa ni vakavuna vei ira me ra sa na sega tale ni qai wasea e dua na ka.

Me vaka ni da itubutubu se iliuliu, sa dodonu me da veivakasalataki vei ira na luveda ena veigauna kece sara ka meda qarauna sara meda na vakarorogo vei ira ena yalololoma kei na yalomatua. E dodonu mera kila na kena vakarerevaki ni iyaloyalo vakasisila kei na kena rawa ni lewa na bula, ka na vakavuna na yali ni Yalotabu, vakatanitaka na veika e dau vakilai, veilawakitaki, vakacacana na veiwekani, vakayalia na nomu rawa ni vakatulewataka na nomu bula, kei na kena sa vakayagataki sara vakalevu kina na gauna, vakasama kei na kaukauwa.

Na iyaloyalo vakasisila sa qai vakasisila, ca, ka sa matata cake sara ga mai ni vakatauvatani kei na gauna sa oti. Ena noda vakasalataki ira na luveda, eda sa rawa ni bulia vata e dua na ituvatuva ni matavuvale ena ivakarau kei na kena iyalayala, me vakaliuci na taqomaki ni noda itikotiko ena itatarovi ni iyaya vakalivaliva. Kemuni na itubutubu, eda sa kila beka ni talevoni veikauyaki e tiko kina na Initaneti e rerevaki sara vakalevu mai na kompiuta?²

Kemuni na itabagone kei na qasecake, kevaka mo ni sa vesuki tu vei Setani ena iyaloyalo vakasisila, ni nanuma na nona dau yalololoma na iVakabula. Ko ni kila tiko li na Nona sa rui dau lomani kemuni, ka vakamareqeti kemuni na Turaga ena gauna talega oqo? Na noda iVakabula e tiko vua na kaukauwa me vakasavasavataki ka vakabulai kemuni. O Koya ena rawa ni kauta laivi na mosi na rarawa ko ni vakila tiko ka vakasavasavataki kemuni tale ena kaukauwa ni Nona Veisorovaki.

Oi keda na iliuliu eda sa kauwaitaki ira talega vakalevu na veiwatini kei na matavuvale era vakaleqai tiko ena vakatotogani ni iyaloyalo vakasisila. Sa veivakamasuti tiko o Elder Richard G. Scott: “Ke ko galala mai na ivalavala ca bibi, kua ni ko vakararawataki wale tu ga ena ka ena yaco baleta na ivalavala ca ni dua tale. … E rawa ni ko lomana e dua … Ia, mo kakua ni taura vakataki iko na icolacola ni cakacaka oqori.”³ Mo ni kila ni ko sega ni tiko duadua. E tiko na veivuke. E tiko na soqoni ni veivueti mai na veivakatotogani vei ira na veiwatini, mera qiri mai ki na soqoni ka vakaitavi tiko ga mai vale.

Kemuni na taciqu kei na ganequ, meda na taqomaki ira vakacava na luveda lalai kei ira na itabagone? Na itatarovi era iyaya yaga sara vakalevu, ia na itatarovi vinaka duadua e vuravura, ka sa ikoya duadua ena vakavotukana, sa ikoya na itatarovi ka tiko e lomada sa ikoya na ivakadinadina titobu kaukauwa ni Tamada Vakalomalagi ni lomani keda kei na Veisorovaki ni iVakabula, me baleti keda kece sara.

Eda na liutaki ira vakacava na luveda me ra veisau vakatitobu sara ka rawata na Veisorovaki ni noda iVakabula? Au taleitaka na parofita o Nifai ena nona kaya, me vakadeitaki ira na itabagone ena nona gauna: “Eda sa tukuni Karisito, ka rekitaki Karisito, ka vunautaki Karisito ka parofisaitaki Karisito … mera kila kina na luveda na sala me bokoci kina na nodra ivalavala ca.”⁴

Meda cakava rawa vakacava oqo ena noda itikotiko? E so vei kemuni sa rogoca vei au ni keirau sa uabaleti kei watiqu, o Mel, ena vuku ni va tiko na luvei keirau lalai. Ni keirau sotava tiko na bolebole ni bula vaka-itubutubu ka toso vata kei na veibolebole ni bula, keirau sa gadreva saraga vakalevu na veivuke. Keirau a masu ka kerea me keirau kila na ka me keirau cakava. Na isau ni masu qai lako mai sa matata vinaka sara ga: “Sa ikoya tiko, kevaka me sega ni tuvaki vinaka na vale, ka ra se vakaisulu tu ga ni moce na gone, kei na so na itavi e se bera tu ni caka. Na ka walega me laurai ni caka tiko ena veisiga o ya na wiliki na ivolanikalou, na masu, kei na lotu vakamatavuvale ena veimacawa.”

Keitou sasagataka tiko me caka na veika oqo, ia, era sega ni ka me vaka e vakaliuci, kei na gauna e dau veicalati kina, sa sega sara ga ni vakayacori. Keitou veisautaka na neitou rai ka sega soti ni dau leqataka na veika e sega soti ni bibi. Na rai oqo, me keitou sa dau veivosaki, veimarautaki, veivunauci, ka vakadinadinataki Karisito ena qaravi ni masu ena veisiga ka wili ivolanikalou kei na qaravi ni lotu vakamatavuvale ena veimacawa.

Dua na noqu itokani e qai tukuna walega oqo, “Ni ko kerei ira na marama mera wili ivolanikalou ka masu wasoma, e vakaogai ira sara vakasivia. Era dau vakila ni vaka me levu na ka era na dau cakava.”

Kemuni na taciqu kei na ganequ, baleta niu kila mai na veika au sotava, vaka kina o watiqu, au vakadinadinataka eke na veivakalougatataki ni wiliki na ivolanikalou ena veisiga kei na masu, kei na lotu vakamatavuvale ena veimacawa. Sai koya oqo na ivakarau sara ga ena kauta laivi na lomaocaoca, dusimaki na noda bula, ka taqomaki vakakina na noda matavuvale. Kevaka me qai curuma mai na loma ni matavuvale na iyaloyalo vakasisila se dua tale na bolebole cava ga, sa rawa meda kerea na veivuke ni Turaga, ka vakanamata ki na veivuke ni Yalotabu, ka kila ni da sa cakava oti na ka e vinakata o Tamada meda cakava.

Kemuni na taciqu kei na ganequ, kevaka me se bera ni vakayacori tiko na veika oqo mai vale, sa na rawa ni da sa tekivutaka sara ga oqo. Kevaka mera sa qasecake na luveda ka ra bese na vakamuria sa rawa ni da tekivu ga o keda. Ni da sa cakava oqo na Yalotabu sa na mai vakasinaita na loma ni noda matavuvale kei na noda bula yadua, ka yaco ga na gauna era na malele mai na luveda.

Ni nanuma tiko o ira na iApositolo bula, era sa yalataka talega ni gauna eda vakasaqara kina na noda kawa ka vakarautaka na yaca ni noda matavuvale me baleta na valetabu, eda na taqomaki ena gauna oqo kei na vo ni noda bula ni da sa bulakilikili tiko ena noda ivolatara ni curu ki na valetabu.⁵ Eso na yalayala!

Kemuni na itabagone, ni qarauna na nomuni bula vakayalo. Bokoca na nomu talevoni kevaka e gadrevi, lagata e dua na sere ni Lalai, masuta na veivuke, vakasamataka e dua na tiki ni ivolanikalou, biuta mai nomu sara iyaloyalo, raica vakataiyaloyalotaka na iVakabula, vakayagataka na sakaramede ena bula kilikili, vulica na Me iSakisaki ni Tabagone, ivakaraitaki vei ira na nomu itokani, vosa vua edua na itubutubu, laki raici nomu bisopi, kerea na veivuke, ka kere ivakasala mai vua e dua na kenadau.

Na cava au vinakata me ratou kila na makubuqu? Au vinakati ira kei kemuni mo ni kila niu kila ni bula tiko na iVakabula ka lomani keda. E sa sauma o koya na noda ivalavala ca, ia e gadrevi meda tekiduru vua na Tamada mai Lomalagi, ena yalomalua e titobu, vakatusa noda ivalavala ca, ka kerei Koya meda vosoti. Sa dodonu meda vinakata me veisau na yaloda kei na noda gagadre ka yalomalua dina meda kerea na veivuke kei na veivosoti mai vei ira eda a rairai vakamavoataka se cakitaka.

Au kila ni o Josefa Simici e a raica na Kalou, na Tamada Vakalomalagi, kei na iVakabula o Jisu Karisito. Au vakadinadinataka ni bula tiko e dua na parofita e vuravura, Peresitedi Thomas S. Monson. Au vakadinadinataka ni da na sega ni lakosese kevaka me da na bulataka nai vakasala ni parofita ni Kalou. Au vakadinadinataka na kaukauwa ni noda veiyalayalati kei na veivakalougatataki ni valetabu.

Au kila ni dina na iVola i Momani! Au na sega ni vakamacalataka rawa na kaukauwa ni ivola cecere oqo. Au kila ga, ena masumasu, ni umani tu ena iVola i Momani na kaukauwa me taqomaki kina na matavuvale, vaqaqacotaki na veimaliwai, ka solia noda yalonuidei vua na Turaga. Au sa vakadinadinataka na veika oqo ena yaca tabu i Jisu Karisito, emeni.