O Le Molimau
Ou te fia faasoaina atu ia te outou na upumoni lea e matua taua lava le iloaina.
O taimi o taua po o le le mautonu o loo i ai se auala e faaleleia ai lo tatou taulai atu i mea e matua taua lava.
O le Taua Lona II a le Lalolagi o se taimi lea o le atuatuvale sili faaleagaga mo au. Sa ou tuua lo’u aiga i Brigham City, Iuta, ma sina vaega o se molimau, ma sa ou lagona le manaoga mo se mea e sili atu. Toeitiiti lava o lo matou vasega faauu uma o le a agai atu i le taua i ni nai vaiaso. A o ou i ai i le motu o Ie Shima, i le itu i matu o Okinawa, Iapani, sa ou tauivi ai ma le masalosalo ma le le mautonu. Sa ou manao i se molimau patino o le talalelei. Sa ou fia iloa!
I se tasi o po lēmamoe, sa ou tuua ai lo’u faleie ma maulu atu i totonu o se malutaga lea na fatuina i le faatutu o paelo tai 50 kalone sa i ai penisini ua tutumu i oneone ma sa tuu le tasi i luga o le isi e fatu ai sina apitaga. Sa leai se taualuga, ma o lea sa ou tolotolo i ai i totonu, tilotilo i luga i le lagi na faatumulia i fetu, ma tootuli e tatalo.
Na tupu ina ua lata i le ogatotonu o le fuaiupu. E le mafai ona ou faamatala atu ia te outou le mea na tupu pe afai ou te manao e tau atu. E le mafai ona ou faamatalaina, ae e manino lava i le asō e pei lava o lena po i le silia ma le 65 tausaga ua mavae. Na ou iloaina o se faaaliga sili ona patino, ma sili ona uigaese. O le mea sili, ua ou iloaina mo au lava ia. Ua ou iloaina mo se faamautinoaga, aua ua tuuina mai ia te au. Ina ua mavae sina taimi, sa ou tolotolo ese mai lena nofoaga ma savali lemu i lo’u moega ma le fiafia tele. Sa ou faaaluina le po atoa i se lagona o le olioli ma le maofa.
Nai lo le manatu o au o se tagata faapitoa, sa ou mafaufau faapea afai e mafai ona oo mai sea ituaiga mea ia te au e mafai foi ona oo atu i soo se tasi. Ou te talitonu pea i ai. I tausaga na mulimuli mai, ua ou iloa ai o lea ituaiga aafiaga o se malamalama e mulimuli i ai ma se avega e amoina i lena lava taimi.
Ou te fia faasoaina atu ia te outou na upumoni lea e matua taua lava le iloaina, o mea sa ou aoaoina ma aafia ai i le toeitiiti 90 tausaga o le olaga, ma silia ma le 50 tausaga o avea o se Pulega Aoao. O le tele o mea sa ou aoaoina e pa’ū i le vaega o mea e le mafai ona aoao atu ae e mafai ona aoao mai.
E pei lava o le tele o mea e sili ona taua, o le malamalama lea e avea o se mea taua e faavavau e na o le tatalo patino ma le mafaufau loloto e oo mai ai. O nei mea, faatasi ai ma le anapogi ma le suesue i tusitusiga paia, o le a valaauina ai ia uunaiga ma faaaliga ma musumusuga a le Agaga Paia. O le a saunia e nei mea i tatou mo faatonuga mai le lagi a o tatou aoao lea mataupu i luga o lea mataupu.
Ua folafola mai e faaaliga “soo se mataupu autu o le atamai tatou te maua i le olaga lenei, o le a tu mai faatasi ma i tatou i le toetutu” ma o le “poto ma le tomai sili atu [o le a mauaina] i le … filiga ma le usiusitai” (MF&F 130:18–19).
O se tasi o upumoni e faavavau ua ou iloa e faapea o loo soifua le Atua. O Ia o lo tatou Tama. O i tatou o Ana fanau. “Matou te talitonu i le Atua, le Tama Faavavau, ma Lona Alo, o Iesu Keriso, ma le Agaga Paia” (Mataupu Faavae o le Faatuatua 1:1).
Mai isi faalagiga uma e mafai ona Ia faaaogaina, na Ia filifili lava ina ia valaauina o Ia o le “Tama.” Na fetalai mai le Faaola, “O lenei, ia faapea ona outou tatalo, Lo matou Tama e, o i le lagi” (3 Nifae 13:9; tagai foi Mataio 6:9). O Lona faaaogaina o le suafa “Tama” o se lesona lea mo tagata uma ina ia malamalama ai i le mea e sili ona taua i lenei olaga.
O le tulaga faamatua o se avanoa paia, ma e tusa ai ma le faamaoni, e mafai ona avea o se faamanuiaga e faavavau. O le taunuuga sili o gaoioiga uma i le Ekalesia o le mafai lea e se alii ma lana ava ma le la fanau ona maua le fiafia i le aiga.
E le o taofia mai ia i latou o e le faaipoipo po o i latou e le mafai ona maua ni fanau, ia faamanuiaga e faavavau o loo latou sailia ae, mo le taimi nei, e le o mafai ona latou aapa atu i ai. Tatou te le iloa i taimi uma pe faapefea pe o afea o le a oo mai ai faamanuiaga, ae o le a le taofia folafolaga o le uluola e faavavau mai soo se tagata faamaoni o loo osia ma tausia feagaiga paia.
O ou faanaunauga faalilolilo ma olega loimatā o le a pai atu i finagalo uma o le Tama ma le Alo. O le a e mauaina se faamautinoaga patino mai ia i Laua e faapea o le a faatumuina lou olaga ma e leai se faamanuiaga e taua o le a taofia mai ia te oe.
I le avea ai ma se auauna a le Alii, ma galue ai i le tofi lea ua faauuina ai au, ou te tuuina atu ai ia i latou o i ai i ia tulaga se folafolaga o le a leai se mea e taua i lou faaolataga ma faaeaga o le a le mafai ona tuuina atu ia te oe i le taimi e tatau ai. O le a faatumulia ia lima o gaogao i le taimi nei, ma o loto o loo tiga i le taimi nei mai miti ma moomooga le taulau o le a faamaloloina.
O le isi upumoni ua ou iloaina, e moni le Agaga Paia. O Ia o le sui lona tolu o le Aiga Atua. O Lana galuega o le molimau i le upumoni ma le amiotonu. Na te faaali mai o Ia Lava i le tele o auala, e aofia ai lagona o le filemu ma le faamautinoaga. Na te aumaia le faamafanafanaga, taitaiga, ma aoaiga pe a manaomia. E tumau pea i o tatou olaga atoa le mafutaga a le Agaga Paia e ala i le ola amiotonu.
O le meaalofa o le Agaga Paia ua tuuina atu e ala i se sauniga o le talalelei. E faaee atu e se tasi o i ai le pule ona lima i luga o le ulu o se tagata fou o le Ekalesia ma fai atu upu nei: “Talia le Agaga Paia.”
E le suia i tatou e lenei sauniga i se auala iloagofie, ae afai tatou te faalogo ma mulimuli i musumusuga, o le a tatou maua le faamanuiaga o le Agaga Paia. E mafai e atalii ma afafine taitoatasi a lo tatou Tama Faalelagi ona iloaina le moni o le folafolaga a Moronae: “Ma o le mana o le Agaga Paia e mafai ona outou iloa ai le moni o mea uma lava” (Moronae 10:5; faaopoopo le faamamafa).
O se upumoni faalelagi lea na ou mauaina i lou olaga o lau molimau lea i le Alii o Iesu Keriso.
O le mea tupito ma lagolagoina o mea uma tatou te faia, o loo taula i ai faaaliga uma, o le suafa lea o le Alii, o le pule lea o loo tatou galulue ai i le Ekalesia. O tatalo uma o ofoina atu, e oo lava i tamaiti laiti, e faaiu i le suafa o Iesu Keriso. O faamanuiaga uma, sauniga uma, faauuga uma, o galuega aloaia uma e faia lea i le suafa o Iesu Keriso. O Lana Ekalesia lenei, ma o loo faasuafaina ia te Ia—O Le Ekalesia a Iesu Keriso o le Au Paia o Aso e Gata Ai (tagai MF&F 115:4).
E i ai se mea maoae na tupu i le Tusi a Mamona lea “na tatalo atu ai [sa Nifae] i le Alii i Tama i le suafa [o le Alii].” Sa faaali mai le Alii ma fetalai atu:
“O le a se mea ua outou mananao ou te tuu atu ia te outou?
“Ma sa latou fai mai ia te ia: Le Alii e, matou te mananao sei e fofoga mai ia te i matou le igoa matou te faaigoa ai lenei ekalesia; ona o loo i ai ni finauga i totonu o le nuu e faatatau i lenei mataupu.
“Ma sa fetalai atu le Alii ia te i latou: E moni, e moni, ou te fai atu ia te outou, aisea ea ua tomumumu ma finau ai le nuu ona o lenei mea?
“Latou te lei faitau ea i tusitusiga paia, ia ua fai mai e ao ina outou ave i o outou luga le suafa o Keriso, o lou igoa lea? Ona o le igoa lea o le a valaau ai outou i le aso gataaga;
“Ma o soo se tasi na te ave i ona luga lou igoa, ma tumau seia oo i le iuga, o ia lava lea o le a faaolaina. …
“O lea, soo se mea tou te faia, ia outou faia i lou igoa; o lea ia outou faaigoa ai le ekalesia i lou igoa; ma ia outou valaau atu i le Tama i lou igoa ia faamanuia mai o ia i le ekalesia ona o au” (3 Nifae 27:2–7).
O Lona suafa, o Iesu Keriso, “e leai lava se isi igoa i lalo o le lagi ua foaiina mai i tagata e mafaia ona faaolaina ai o i tatou” (Galuega 4:12).
I le Ekalesia ua tatou iloa o Ia: o Iesu Keriso o le Alo o le Atua. O Ia o le Alo e Toatasi na Fanaua e le Tama. O Ia o le na fasiotia ma o Ia o le na toe soifua mai. O Ia o lo tatou Fautua i le Tama. “Manatua o luga lava o le papa o lo tatou Togiola, o lē o Keriso lea, le Alo o le Atua, e ao ina [tatou] atinae ai lo [tatou] faavae” (Helamana 5:12). O Ia o le taula lea e taofia i tatou ma puipuia i tatou ma o tatou aiga i āfā o le olaga.
O Aso Sa taitasi i le salafa o le lalolagi lea o loo potopoto faatasi ai au paia o soo se atunuu po o gagana, e faamanuia le faamanatuga i upu lava e tasi. Tatou te ave i o tatou luga le suafa o Keriso ma manatua pea o Ia. O loo tamauina lena mea i o tatou luga.
Na tautino mai le perofeta o Nifae, “Ua matou tautalatala e uiga ia Keriso, ua matou olioli ia Keriso, ua matou talai atu Keriso, ua matou vavalo e uiga ia Keriso, ma ua matou tusitusi foi e tusa ma a matou valoaga, ina ia mafai ona iloa e a matou fanau po o le a le puna e mafai ona latou tepa taulai i ai mo se faamagaloga o a latou agasala” (2 Nifae 25:26).
E tatau ona tofu maua uma e i tatou sa tatou lava molimau e uiga i le Alii o Iesu Keriso. Ona tatou faasoa atu lea o lena molimau i o tatou aiga ma isi.
I nei mea uma e le tatau ai ona galo ia i tatou o loo i ai se fili o loo saili patino e faalavelave i le galuega a le Alii. E tatau ona tatou filifili po o ai e mulimuli i ai. O lo tatou saogalemu e faigofie lava e pei o le filifili taitoatasi e mulimuli i le Faaola, faamautinoa o le a tatou tumau faamaoni i Lana itu.
I le Feagaiga Fou, ua tusia ai e Ioane na i ai nisi o e na le mafai ona tautino atu i le Faaola ma Ana aoaoga ma “talu ai ua o ese isi o ona soo e toatele i tua, a e lei toe feoai i latou ma ia.
“Ona faapea atu lea o Iesu i le toasefulu ma le toalua, Pe tou te fia o ese foi?
“Ona tali mai lea o Simona Peteru ia te ia, Le Alii e, a matou o ea ia te ai? O ia te oe upu o le ola e faavavau.
“Ua matou talitonu, ma ua matou iloa o oe o le Keriso, o le Alo o le Atua soifua” (Ioane 6:66–69).
Na maua e Peteru lena mea lea na le mafai ona iloaina e soo uma o le Faaola. O le tuuto faamaoni atu ia Iesu Keriso, o le tatou talia lea o Ia o lo tatou Faaola ma faia mea uma i lo tatou malosi e ola ai i Ana aoaoga.
Mai tausaga uma ua ou ola ai ma aoao atu ma auauna atu, ma mai le faitau miliona o maila ua ou faimalaga ai i le salafa o le lalolagi, ma i aafiaga uma ua ou maua, e i ai se upumoni maoae ou te fia faasoa atu. O lau molimau lea i le Faaola o Iesu Keriso.
Na tusia e Iosefa Samita ma Sini Rikitone lenei mea e uiga i se aafiaga paia:
“Ma o lenei, ina ua mavae le tele o molimau ua tuuina mai e uiga ia te ia, o le molimau mulimuli lenei, i molimau uma, ma te tuu atu e uiga ia te ia: O loo soifua o ia!
“Aua sa ma vaai ia te ia” (MF&F 76:22–23).
O a laua upu o au upu ia.
Ou te talitonu ma ou mautinoa o Iesu o le Keriso, o le Alo o le Atua ma o loo soifua o Ia. O Ia o le Alo e Toatasi na Fanaua e le Tama, ma e “ala mai ia te ia, ma o ia, ua i ai lalolagi ma na foafoaina, ma o e ua nonofo ai o atalii ma afafine fanauina mo le Atua” (MF&F 76:24).
Ou te tuuina atu lau molimau o loo soifua le Faaola. Ua ou iloa le Alii. O au o Lana molimau. Ua ou iloa Lana taulaga maoae ma le alofa e faavavau mo fanau uma a le Tama Faalelagi. Ou te tuu atu lau molimau faapitoa i le lotomaualalo atoa ma le mautinoa a’ia’i i le suafa o Iesu Keriso, amene.