Me Yacova Ni Da Qai Sota Tale
Me sa tiko vata kei keda na Yalotabu eda a vakila ena rua na siga sa oti oqo ni da qarava voli na veika e vakaogai keda ena siga yadua.
Kemuni na taciqu kei na ganequ, sa dua dina na koniferedi lagilagi oqo. Eda sa mai vakani vakayalo ni da vakarorogo ki na veivosa veivakauqeti ni turaga kei na marama ka ra vosa vei keda. Sa totoka dina na sere kei na ivakatagi, na vosa era a vakarautaki ka votai ena veivakauqeti ni Yalo Tabu, ka ra sa kauti keda vakavoleka sara ki lomalagi na masu. Eda sa vaqaqacotaki ena sala taucoko ni da vakaitavi vata.
Au nuitaka ni da na taura na gauna meda wilika na veivosa ni koniferedi ena gauna era sa tiko kina ena LDS.org ena loma ga ni vica na siga mai oqo vakakina ena kedra sa na tabaki ena mekasini na Ensign kei na Liaona ena ilavelave ka tarava, ni sa veiganiti meda dau taleva ka vulica sara vakavinaka.
Au kila ni ko ni na dua vata kei au ena ivakaraitaki ni noda vakavinavinaka cecekia kivei ira na turaga kei na marama ka ra a vakacegui ena koniferedi oqo. Era sa veiqaravi vinaka ka sa vakavotukana na nodra itavi ki na cakacaka ni Turaga. E ka taucoko na nodra yalodina.
Eda sa veitokoni talega, ena laveti cake ni liga, kivei ira na turaga ka ra sa kacivi ki na veitutu vou ni veiqaravi. Eda kidavaki ira ka vinakata mera kila ni da na raica meda veiqaravi vata kei ira ena sasaga ni iVakavuvuli.
Ni da vakasamataka vagumatua na veivosa eda sa rogoca, meda saga me vinaka cake tale vakalailai mai na ka eda sa cakava eliu. Meda sa ivalavala vinaka ka dauloloma vei ira ka sega ni tautauvata na noda vakabauta kei na ivakavuvuli. A kauta mai ki na vuravura oqo na iVakabula e dua na ituktuku ni loloma kei na vakanuinui vinaka ki na turaga kei na marama taucoko sara. Meda sa qai dau muria na Nona ivakaraitaki.
Eda donumaka e vuqa na bolebole bibi ena vuravura edaidai, ia au vakadeitaka vei kemuni ni sa nanumi keda tiko na Tamada Vakalomalagi. Ena tuberi ka vakalougatataki keda o Koya ni da vakatautaka na noda vakabauta kei na veivakabauti Vua ka na vukei keda mai na dredre cavaga eda sotakaya.
Me sa tiko vata kei keda yadua sara na veivakalougatataki ni lomalagi. Me sa vakatawani na noda itikotiko ena loloma kei na veidokai vakakina na Yalo ni Turaga. Meda sa dau vaqaqacotaka vakavuqa na noda ivakadinadina ni kosipeli, me rawa ni ra taqomaki keda mai na veivakararawataki ni vunica. Me sa tiko vata kei keda na Yalotabu eda a vakila ena rua na siga sa oti oqo ni da qarava voli na veika e vakaogai keda ena siga yadua, ka meda sa dau kune ni cakava tiko na cakacaka ni Turaga.
Au vakadinadinataka ni dina na cakacaka oqo, ni bula tiko na noda iVakabula, ka sa tubera ka dusimaka o Koya na Nona Lotu ena vuravura oqo. Au vakadinadinataka ni bula tiko ka lomani keda na Kalou na Tamada Tawamudu. Sa Tamada vakaidina o Koya, ka sa tamata vakaikoya talega o Koya ka dina sara. Meda sa kila mada na nona tu vakarau tu me volekati keda mai, kei na levu ni ka ena rawa ni na cakava me vukei keda kina, vakakina na levu ni Nona Lomani keda.
Kemuni na taciqu kei na ganequ, me sa vakalougatataki kemuni na Kalou. Me sa tiko vata kei kemuni na Nona yalayala ni vakacegu ena gauna oqo kei na veigauna taucoko.
Au sa vakamoce kivei kemuni me yacova na gauna eda qai veisotari tale kina ena loma ni vula ono, ka’u sa cakava vakakina ena yaca i Jisu Karisito, na noda Turaga ka iVakabula, emeni.