Ngaahi Tali ʻo e Konifelenisí
ʻI he mālōlō ʻeku Kui Fefine Ua ko ʻEtiuōtí, naʻá ku lotomamahi mo hoku tehiná, mo Mia. Neongo naʻe talamai ʻe heʻeku ongomātuʻá te mau toe sio pē ki heʻemau kui-uá ʻi ha ʻaho pea mau hoko ko ha fāmili ʻo taʻengata, ka naʻa mau hohaʻa.
Naʻe talamai mai ʻe heʻeku tamaí te mau lava ʻo lotu ke tali mai ʻemau ngaahi fehuʻi fekauʻaki mo Kulenimā ʻEtiuōtí ʻi he konifelenisi lahí. Naʻá ku lotu ke ʻiloʻi pe naʻe fiefia ʻa Kulenimā ʻEtiuootí. Naʻe lotu ʻa Mia ke ʻiloʻi pe ʻoku fakataha ʻa Kulenimā ʻEtiuooti mo hono husepānití mo e ʻofefiné, ʻa ia kuo ʻosi mālōloó.
Lolotonga e fakataha konifelenisi ʻo e pongipongi Sāpaté, naʻa mau fakafanongo, pea mau fanongo ki hono tali ʻe he palōfitá ʻemau ngaahi fehuʻí! Naʻe pehē ʻe Palesiteni Monisoni ko e taimi ʻoku mate ai ʻa e kakaí, ʻoku hangē pē ia ʻoku nau ʻalu ki ha loki ʻoku fonu kotoa ai e kau mēmipa ʻo e fāmilí ʻoku nau ʻofa aí ʻa ia ne pekia kimuʻa ʻiate kinautolú. Ko ia naʻe ʻiloʻi ai ʻe Mia ʻoku fakataha ʻa Kulenimā ʻEtiuooti mo hono husepānití mo e ʻofefiné. Hili iá pea lau leva ʻe Palesiteni Monisoni ha konga mei he Tohi ʻa Molomoná ʻoku pehē ʻe tali e ngaahi laumālie ʻo e kau māʻoniʻoní ki ha potu ʻo e fiefiá (vakai, ʻAlamā 40:11–12).1 Ne feinga maʻu pē ʻa Kulenimā ʻEtiuooti ke fili ki he totonú, ko ia naʻá ku ʻiloʻi leva naʻá ne fiefia.
Naʻá ku fiefia mo Mia ke ʻiloʻi ʻoku lea ʻa e palōfitá ki he ʻOtuá pea ʻoku tali ʻe he ʻOtuá ʻema ngaahi lotú. ʻOku ʻikai ke ma toe hohaʻa fekauʻaki mo Kulenimā ʻEtiuootí. ʻOkú ma ʻilo kapau te ma muimui heʻene sīpingá ʻo fili ki he totonú, te ma toe sio ki ai ʻi ha ʻaho.
Tā fakatātaaʻi ʻe Karen Lee
Mia (toʻohemá) mo Abby