Ko e Teuteu ki he Ngaahi Faingamālie ʻo e Moʻuí
Fie maʻu ha kahaʻu lelei? Ako!
Puipuituʻá ʻe Hemera/Thinkstock; TĀ ʻO E FUKÁ ʻE KELLY-ANNE LEYMAN/STOCK/THINKSTOCK
ʻI he taimi ʻoku kamata ke lahi ai hoʻo ngāue fakaako mei ʻapí peá ke fifili pe ʻoku mahuʻinga nai e feinga kotoa pē, manatuʻi ʻa e faleʻi ko ʻení mei he Kau Palesitenisī ʻUluakí. ʻE lava ke tokoniʻi koe ʻe heʻenau ngaahi faleʻi potó ke ke lavaʻi hono ako hoʻo ngaahi fakamatala hokó ʻi ha loto vēkeveke lahi ange.
Koeʻuhí ʻoku ʻi ai ha ivi takiekina lelei lahi ʻo e akó ʻi ho kahaʻú pea “ko ha konga mahuʻinga ia ʻo e palani ʻa e Tamai Hēvaní ke tokoniʻi koe ke ke hoko ʻo hangē ai ko Iá” (Ki hono Fakamālohia ʻo e Toʻu Tupú [2011], 9), te ke ʻiloʻi ʻoku ʻaonga e feinga kotoa pē.
Palesiteni Thomas S. Monson
Akoʻi Fakalangi
“Ko e ngaahi lēsoni ʻo e moʻuí ʻe niʻihi ʻoku ako ia mei hoʻo mātuʻá, peá ke ako e niʻihi ʻi he akó pe ʻi he lotú. Neongo ia, ka ʻoku ʻi ai ha ngaahi momeniti pau ʻokú ke ʻiloʻi ai ko e Tamai Hēvaní ʻoku faiakó pea ko ʻEne tokotaha akó koe.”
“Who Honors God, God Honors,” Ensign, Nov. 1995, 48.
Ko e Tahi ʻo e Moʻuí
Ko e moʻuí ko ha tahi ʻoku fakalotomāʻulaloʻi ai ʻa e hīkisiá, ʻiloʻi ai ʻa e unga-ngāué, pea fakahā ai ʻa e takí. ʻE fie maʻu ke tuku ofi atu pē hoʻo ngaahi siaté pea tauhi e ngaahi fakamatala fakamuimuitahá kae hao pea aʻu hoʻo folaú ki he taulanga ʻokú ke fie aʻu ki aí. ʻOku fie maʻu ke ke ako mei he ngaahi meʻa ʻoku hoko ki he niʻihi kehé, ke taukaveʻi mālohi ʻa e ngaahi tefitoʻi moʻoní, ʻai ke lahi ange ʻa e ngaahi meʻa ʻokú ke manako aí, ke mahino kiate koe ʻa e ngaahi totonu ʻa e niʻihi kehé ke folaua ʻa e tahi tatau, pea falalaʻanga koe ʻi hoʻo fakahoko fatongiá.
ʻE ʻilonga ʻaupito e kaunga hoʻo ngaahi feinga ʻi ʻapiakó ki ho ngaahi faingamālie hili hoʻo nofo mei he akó. ʻI hoʻo fāinga ke maʻu ho maaka lavá, ʻoua naʻá ke taʻefakatokangaʻi hono mahuʻinga ʻo e ako moʻoni ke te fakakaukaú.”
“Great Expectations” (fakataha lotu he ʻUnivēsiti Pilikihami ʻIongí, ʻaho 11 ʻo Sānuali, 2009), 4; speeches.byu.edu.
ʻOku Muʻomuʻa ʻa e Teuteú ʻi he Ngāué
“Kuo teʻeki ai ke mahuʻinga ange e teuteu ki he ngaahi faingamālie mo e ngaahi fatongia ʻo e moʻuí. ʻOku tau moʻui ʻi ha sosaieti feliliuaki. Ko e feʻauhi lahi ʻaupitó ko ha konga ia ʻo e moʻuí. Ko e fatongia ʻo e husepānití, tamaí, kui tangatá, tauhí, pea mo e tokotaha maluʻí ʻoku kehe ʻaupito ia mei he meʻa naʻe fakahoko ʻi he toʻu tangata kuo hilí. ʻOku ʻikai ko e teuteú ʻa efakamahamahaló pē fakaʻapeé. Ko ha fekau ia. ʻOku ʻikai toe fai ha muimui ʻi he kupuʻi lea motuʻa ko e ʻʻOku fakafiefia ʻa e taʻe ʻilóʼ. ʻOku muʻomuʻa e teuteú ʻi he ngāué.”
“Duty Calls,” Ensign, Mē 1996, 43.
Palesiteni Henry B. Eyring
Ko ha Fakakaukau ke Ako
“ʻI hoʻo hoko ko e fānau ʻo e ʻOtuá, kapau te ke ngāue mālohi mo faivelenga, ko ho ikuʻangá ke hoko ʻo hangē ko Iá. ʻOku ʻuhinga ia ʻoku ʻikai ʻi ai ha meʻa ia ʻoku moʻoni he ʻikai te ke lava ʻo ako, koeʻuhí he ʻokú Ne ʻafioʻi ʻa e moʻoni kotoa pē.
“Ko e tokolahi ʻo e kakaí ʻoku ʻikai ke nau toe ako koeʻuhí ko e manavasiʻí. ʻOku nau ilifia he ʻikai ke nau lava ʻo akó. Kapau ʻokú ke tui faivelenga he ʻikai te ke maʻu ʻa e manavasiʻi ko iá. ʻE lava ke uesia hoʻo akó ʻi ha faʻahinga ʻuhinga pē, ka ʻoku ou loto ke ke ʻiloʻi taʻe toe veiveiua ʻe lava ke ke ako ha faʻahinga meʻa pē ʻe fie maʻu ʻe he ʻOtuá ke ke akó. ʻOku tui ki ai ʻa e kau ako tuʻukimuʻá. ʻOku nau maʻu ʻa e fakakaukau ʻoku nau lava ʻo ako.”
“Do What They Think You Can’t Do,” New Era, ʻOkatopa. 1989, 6.
ʻOku ʻAfioʻi Koe ʻe he ʻEikí.
“ʻOku tokangaʻi lelei hoʻo moʻuí, ʻo hangē ko aú. ʻOku ʻafioʻi fakatouʻosi ʻe he ʻEikí ʻa e meʻa te Ne finangalo ke ke faí mo e meʻa ʻe fie maʻu ke ke ʻilo ke fakahoko ʻaki iá. Te ke lava ʻo ʻamanaki atu ʻi he loto-falala kuó Ne ʻosi teuteu ha ngaahi faingamālie maʻau ke ke ako. He ʻikai te ke fakatokangaʻi lelei ʻa e ngaahi faingamālie ko iá, ʻo hangē pē ko aú. Ka ʻi he taimi ʻokú ke fakamuʻomuʻa ai e ngaahi meʻa fakalaumālié ʻi hoʻo moʻuí, ʻe tāpuakiʻi koe ke ke ongoʻi ʻa e meʻa pau ke ke akó, pea ʻe ueʻi koe ke ke toe ngāue mālohi ange.”
“Real-Life Education,” New Era, ʻEpeleli. 2009, 6.
Palesiteni Dieter F. Uchtdorf
Fekauʻi ke Akó
“Ko e akó ʻoku ʻikai ko ha fakakaukau lelei pē ia—ko ha fekau ia, ki he kaingalotu ʻo e Siasí. ʻOku fie maʻu ke tau ako ki he ʻngaahi meʻa ʻoku ʻi he langí pea ʻi he māmaní fakatouʻosi, pea ʻi he lalo māmaní; ʻa e ngaahi meʻa kuo ʻi ai, ʻa e ngaahi meʻa ʻoku ʻi ai, ʻa e ngaahi meʻa kuo pau ke vave ʻene hokó; ʻa e ngaahi meʻa ʻoku ʻi homou fonuá, ʻa e ngaahi meʻa ʻoku ʻi muli’ [vakai, T&F 88:79–80].”
“Tefitoʻi Moʻoni ʻe Ua ki ha Faʻahinga ʻEkonōmika Pē,” Liahona, Nōvema 2009, 55.
Vilitaki ʻi he Faʻa Kātaki
“ʻI hoku taʻu 10, naʻe kumi hūfanga hoku fāmilí ʻi ha fonua foʻou. Naʻe lelei maʻu pē ʻeku akó—ʻo toki kehe ʻi heʻemau aʻu ki Siamane Hihifó. …
“Naʻe ʻikai sai ʻetau akó he naʻe foʻou mo ngali kehe kiate au ʻa e konga lahi ia ʻo e ngaahi lēsoní. Ko e fuofua taimi ʻeni ʻi heʻeku moʻuí ne u fifili ai pe naʻá ku ʻatamai lelei feʻunga ke u ʻalu ʻo ako.
“Ne u monūʻia naʻe ʻi ai ʻeku faiako naʻá ne akoʻi au ke u faʻa kātaki. Naʻá ne akoʻi mai ʻe tokoniʻi au ʻe he ngāngāue lelei mo lele tatau maʻu pē—ʻa e vilitaki ʻi he faʻa kātaki—ke u ako ai.
“Naʻe faifai pē ʻo mahino ʻa e ngaahi lēsoni naʻe faingataʻá—ʻo aʻu pē ki he lea faka-Pilitāniá. Naʻe kamata māmālie ke u sio te u lava ʻo ako ʻo kapau te u vilitaki pē. Naʻe ʻikai vave ʻene hokó, ka naʻe hoko ia tupu mei he faʻa kātaki.”
“Fai Atu Ai Pē ʻi he Faʻa Kātaki,” Liahona, Mē 2010, 56.