Ngaahi Fakakaukau Maʻá e Efiafi Fakafāmili ʻi ʻApí

ʻOku maʻu ʻi he makasini ko ʻení ha ngaahi fakamatala mo e ʻekitivitī ʻe lava ke fakaʻaongaʻi ʻi he efiafi fakafāmili ʻi ʻapí. ʻOku ʻoatu heni ha fakakaukau ʻe ua.

“Fakamoʻui e Ngaahi Kafo Pulipuliá,” peesi 14: Vakai ki he ngaahi fehuʻi ʻi he peesi 18 ʻo e fakamatala ko ʻení pea fakakaukauʻi ke fokotuʻu ha taimi ke talanoa fakafoʻituitui ai mo hoʻo fānaú takitaha fekauʻaki mo e ponokalafí. Koeʻuhí ko e taimi ʻe niʻihi ʻoku tafoki ʻa e toʻu tupú ki he ponokalafí ke feauʻaki e ngaahi ʻahiʻahí, fakakaukau ke vakaiʻi ʻa e sīpinga ʻokú ke fokotuʻu ki he founga hono matuʻuaki e ngaahi ʻahiʻahí pea fakatukupaaʻi hoʻo fānaú ke nau toe fakalakalaka ange. Te ke lava ke fili ki hoʻo lēsoní ʻa e ngaahi lao ʻo e fāmilí ki he komipiutá pea toe vakaiʻi ʻa e lea kau ki he angamaʻá mei he konifelenisi lahí (hangē ko Elaine S. Dalton, “Ko ha Foki ki he ʻUlungaanga Maʻá,” Liahona, Nōvema 2008, 78). Te ke lava foki ʻo fakaʻaongaʻi ʻa e ngaahi manatu fakafāmilí—hangē ko e ngaahi tā ʻo e malí mo e fanga kiʻi vala tāpuaki pēpeé—ke vahevahe ʻa e ngaahi talanoa ʻo e founga kuo faitāpuekina ai hoʻo moʻuí ʻe he angamaʻá.

“Ngaahi Fakapulipuli ʻe Hongofulu ʻo e Manakoa Moʻoní,” peesi 62: Fakakaukau ke fakaʻaongaʻi ʻa e ngaahi tefitoʻi moʻoni ʻi he fakamatala ko ʻení ke akoʻi ki hoʻo fānaú fekauʻaki mo e founga te nau lava ʻo fakakaungāmeʻa aí. Te ke lava ʻo faʻu ha ngaahi foʻi lea ʻe 10, ko e taha ki he ngaahi ʻulungaanga faka-kalaisi takitaha ʻi he fakamatalá (vakai foki, 1 Kolinitō 13). ʻEke ki hoʻo fānaú ʻa e founga ʻe lava ke ngaohi ai kinautolu ʻe he ʻulungaanga takitaha ke nau hoko ko ha kaungāmeʻa lelei. Hili iá pea feinga ke ʻiloʻi ha taha ʻoku faingataʻaʻia ʻi homou uōtí pe koló pe feituʻú pea fokotuʻutuʻu ha ngaahi founga ke tokoni ki he tokotaha ko iá. Mahalo te ke fie fakahoko hoʻomou palaní ke tokoni ʻi he taimi pē ko iá pea kamata ʻaki ha lotu fakafāmili ke maʻu e ʻofa faka-Kalaisí.

ʻI Hoʻo Lea Fakafonuá

ʻOku maʻu ʻa e Liahoná mo e ngaahi nāunau kehe ʻa e Siasí ʻi ha ngaahi lea fakafonua lahi ʻi he languages.lds.org.