Te u fakahaaʻi fēfē ʻeku ʻofá ki he kakai ʻoku nau taʻe ʻofa kiate au?

Naʻe akoʻi ʻe he Fakamoʻuí ʻo pehē: “ʻOfa ki homou ngaahi filí, tāpuakiʻi ʻa kinautolu ʻoku kapeʻi ʻa kimoutolú, fai lelei kiate kinautolu ʻoku fehiʻa kiate kimoutolú, pea hūfia ʻa kinautolu ʻoku fai kovi mo fakatanga kiate kimoutolú” (Mātiu 5:44). ʻOku ʻikai ke faingofua ʻa e muimui ki he fekaú ni, koeʻuhi he ʻoku fepaki mo hotau natulá—ʻa ia, ko e tangatata fakaekakanó (vakai, Mosaia 3:19). Te tau kamatá ʻi fē? Ko ha ngaahi fakakaukau ʻeni ʻe niʻihi.

• Feinga ke sio ki he kakai kotoa pē ko e fānau ʻa e Tamai Hēvaní. ʻOku ʻikai ko ha fakakaukau lelei pē; ka ʻoku moʻoni. Tuku ke tō loloto ʻi ho lotó, pea ʻe liliu leva ai hoʻo ngaahi founga fetuʻutakí.

• ʻIloʻi ko e meʻaʻofa mei he ʻOtuá ʻa e faʻahinga ʻo e ʻofá ʻa ia ʻoku fekau mai ʻe he Fakamoʻuí ke tau maʻú, kuo pau ke mou “lotu ki he Tamaí ʻaki ʻa e ivi kotoa ʻo e lotó, koeʻuhí ke fakafonu ʻa [kimoutolu] ʻaki ʻa e ʻofá ni, ʻa ia kuó ne foaki kiate kinautolu kotoa pē ʻoku muimui moʻoni ʻi hono ʻalo ko Sīsū Kalaisí” (Molonai 7:48).

• Kumi ha fanga kiʻi founga ke tokoniʻi ʻa kinautolu ʻoku nau taʻe ʻofá. He ʻikai ke ke ʻilo pe ko fē ʻa e taimi te ne tokoniʻi kinautolu ke nau liliú, ka ʻoku tatau ai pē pe ʻoku ʻikai ke nau liliu, te ke toe lelei ange koeʻuhí ko hoʻo angaʻofá.

• Vahevahe ʻa e ongoongoleleí mo kinautolu, ʻo tatau ai pē kapau ko haʻo fakahaaʻi fakahangatonu mo mālohi hoʻo fakamoʻoní ki ha foʻi moʻoni faingofua—hangē ko e, “Ko e fānau kotoa kitautolu ʻa e ʻOtuá.”